Fanasongadinana Ireo Hevi-dehibe

INONA avy ireo hevi-dehibe amin’ny lahateny iray? Tsy hevitra mahaliana lalovana kely fotsiny akory no atao hoe hevi-dehibe, fa hevitra tena lehibe, ka velabelarina sy hazavaina tsara. Ireo no hevitra tena ilainao mba hahatratrarana ny zava-kendrenao.

Ny fahaizanao mifidy sy mandamina ireo hevitra hohazavainao no tena hanampy anao hanasongadina ireo hevi-dehibe. Matetika ny fanazavana azo avy amin’ny fikarohana no betsaka kokoa noho izay tena hampiasaina. Ahoana no hahafantaranao izay tena hampiasainao?

Voalohany aloha, dia eritrereto ny mpihaino. Fantany tsara ve ilay foto-kevitra, sa tsia? Eken’ny ankamaroany ve izay lazain’ny Baiboly, sa misy somary misalasala? Inona no zava-tsarotra tsy maintsy atrehiny eo amin’ny fiainany andavanandro, raha ampihariny izay lazain’ny Baiboly momba ilay loha hevitrao? Faharoa: Ataovy mazava tsara ao an-tsainao ny zava-kendren’ilay lahateninao amin’ireo mpihaino ireo. Ampiasao ireo fitsipika roa ireo mba hamakafakana ireo fanazavana azonao tamin’ny fikarohana, ka izay tena mety ihany no raiso.

Raha nomena drafitra iray misy foto-kevitra sy hevi-dehibe ianao, dia tokony hanaraka izany akaiky. Tena hihatsara anefa ny lahateninao raha arahinao ireo fitsipika roa etsy ambony, rehefa mamelabelatra ny hevi-dehibe tsirairay. Anjaranao kosa ny mifidy ireo hevi-dehibe, raha tsy omena drafitra ianao.

Ho mora kokoa ny manao ilay lahateny rehefa mazava tsara ao an-tsainao ireo hevi-dehibe, ka nalahatrao tsara eo ambaniny ireo hevitra fanampiny manazava azy ireo. Ho azon’ny mpihaino tsara koa ilay lahateny amin’izay.

Fomba samihafa handaminana ireo hevitra hohazavainao. Misy fomba samihafa azo arahina, rehefa mandamina ireo hevitra ao amin’ny lahateninao. Fantaro tsara ireny fomba ireny, ary ho hitanao fa maro aminy no mandaitra, arakaraka ny zava-kendrenao.

Fomba iray azo ampiasaina matetika, ny filaharana araka ny foto-kevitra. (Ilaina ny hevi-dehibe tsirairay, satria manampy ny mpihaino hahazo tsara ilay loha hevitrao, na manampy anao hahatratra ny zava-kendren’ilay lahateny.) Fomba iray hafa ny filaharan-javatra arakaraka ny fotoana nisehoany. (Ohatra, azo resahina aloha ireo zava-nitranga talohan’ny Safodrano, izay vao ireo talohan’ny nandravana an’i Jerosalema tamin’ny 70 am.f.i., ary avy eo ireo fisehoan-javatra amin’ny androntsika.) Fomba fahatelo ny filazana ny antony aloha, vao ny vokany. (Azo ampifamadihina koa ilay izy, izany hoe ny vokany aloha no resahina, vao ny antony nahatonga azy.) Fomba fahefatra ny fampitahana zavatra mifanohitra. (Ny tsara sy ny ratsy, na ny mampandroso sy ny tsy mampandroso, ohatra.) Mety ho hita ao amin’ny lahateny iray indraindray ny maromaro amin’ireo fomba ireo.

Fony nampangaina lainga teo anoloan’ny Synedriona jiosy i Stefana, dia nanao toriteny nafonja, izay nitanisa zavatra arakaraka ny nisehoany. Vakio ilay izy ao amin’ny Asan’ny Apostoly 7:2-53, ka mariho fa efa maty paika ireo hevitra nofidin’i Stefana. Nasehony mazava tsara aloha fa zavatra tsy azon’ny mpihaino lavina no hotantarainy. Nolazainy avy eo fa nolavin’ny rahalahiny i Josefa, nefa nampiasain’Andriamanitra mba hitondra famonjena. Nohazavainy manaraka izany, fa tsy nankatoavin’ny Jiosy koa i Mosesy, izay nampiasain’Andriamanitra. Ary nasongadiny tamin’ny farany fa naneho toe-tsaina toy ny an’ny Jiosy fahiny ireo nampamono an’i Jesosy Kristy.

Aza atao maro loatra ny hevi-dehibe. Vitsivitsy ihany dia efa ampy mba hamelabelarana foto-kevitra iray. Mazàna tsy mihoatra ny dimy ny hevi-dehibe. Marina izany, na 5 na 10 na 30 minitra, na mihoatra, ny halavan’ny anjaranao na ny lahateninao. Aza mitady hanasongadina hevi-dehibe maro loatra. Hevi-dehibe vitsivitsy monja no ho araky ny mpihaino, ao amin’ny lahateny iray. Ary arakaraka ny halavan’ny lahateny iray, no tsy maintsy hanamafisana sy hanazavana kokoa ireo hevi-dehibe.

Na firy na firy ireo hevi-dehibe ampiasainao, dia velabelaro tsara ny tsirairay aminy. Omeo fotoana ampy tsara ny mpihaino mba handinihany ny hevi-dehibe tsirairay, ka hiraiketan’izany tsara ao an-tsainy.

Tokony ho tsotra ny fandrenesan’ny mpihaino ny anjaranao na ny lahateninao. Tsy miankina foana amin’ny habetsahan’ireo hevitra hazavainao anefa izany. Ho mora arahina sy tadidina ny lahateninao, raha voalamina mazava tsara eo ambanin’ny hevi-dehibe vitsivitsy ireo fanazavana fanampiny, ary velabelarinao tsirairay ireo hevi-dehibe.

Asongadino ireo hevi-dehibe. Raha voalamina tsara ny fanazavanao, dia tsy ho sarotra ny hanamafy ireo hevi-dehibe, rehefa manao ilay anjara na lahateny ianao.

Izao no fomba lehibe indrindra fampisongadinana hevi-dehibe: Manomeza porofo sy andinin-teny ary fanazavana hafa izay hampifantoka ny saina ho amin’ilay hevi-dehibe sy hanamafy kokoa azy io. Tokony hanazava kokoa na hanamarina ilay hevi-dehibe ny hevitra fanampiny rehetra toy izany. Aza manampy hevitra tsy misy ifandraisana amin’ilay hevi-dehibe, satria fotsiny hoe mahaliana ilay izy. Asehoy mazava tsara ny ifandraisan’ireo hevitra fanampiny amin’ilay hevi-dehibe tokony hohamafisiny. Aza avela haminavina izany samirery ny mpihaino. Azo aseho toy izao izany fifandraisana izany: Averina indray ireo teny fototra milaza ilay hevi-dehibe, na averina tsindraindray ny votoatin’ilay hevi-dehibe.

Misy mpandahateny mitanisa ireo hevi-dehibe mba hampisongadinana azy. Tsara izany, saingy izany akory tsy mahasolo ny fifidianana tsara ny hevitra sy ny famelabelarana azy mirindra tsara.

Azonao lazaina fotsiny dieny eo am-piandohana ilay hevi-dehibe, alohan’ny hanomezana ilay fanaporofoan-kevitra. Hanampy ny mpihaino hahatakatra tsara ilay fanazavana homenao izany, no sady hampisongadina io hevi-dehibe io. Azonao hamafisina koa ilay hevitra raha fintininao rehefa avy novelabelarinao tsara.

Eny am-pitoriana. Azo ampiharina amin’ny resaka ataonao eny amin’ny fanompoana koa ireo toromarika ireo. Rehefa manao fanomanana ianao, dia eritrereto izay mampanahy indrindra ny olona eo an-toerana. Mifidiana foto-kevitra iray mampiseho fa handamina izany ny fanantenana omen’ny Baiboly. Mifidiana hevi-dehibe roa eo ho eo mba hamelabelarana io foto-kevitra io. Fidio ireo andinin-teny hampiasainao mba hanamafisana ireo hevitra ireo. Eritrereto avy eo, ny fomba hanombohanao ny resakao. Ahafahanao manovaova resaka ny fanomanana toy izany. Hanampy anao hilaza zavatra izay ho tadidin’ny tompon-trano koa izany.