JEREO ny gadra vy eo amin’i Paoly, ary jereo ilay miaramila romanina miambina azy. Nigadra tany Roma i Paoly. Eo am-piandrasana izy ambara-panapaky ny Kaisara romanina izay hatao aminy. Raha mbola teo am-pifatorana izy, dia navela hitsidika azy ny olona.

Telo andro taorian’ny nahatongavan’i Paoly tao Roma, dia nandefa teny tany amin’ny filoha jiosy sasany izy mba ho tonga eo aminy ireo. Vokatr’izany, dia Jiosy maro tao Roma no tonga. Nitory taminy ny amin’i Jesosy sy ny fanjakan’Andriamanitra i Paoly. Ny sasany dia nino ary tonga Kristianina, fa ny hafa kosa tsy nino.

I Paoly dia nitory koa tamin’ireo miaramila samihafa izay ny asany dia ny niambina azy. Nandritra ireo roa taona nihazonana azy ho toy ny mpigadra, i Paoly dia nitory tamin’izay rehetra azony nanaovana izany. Vokatr’izany, na dia ny ankohonan’i Kaisara aza dia nandre ny amin’ny vaovao tsaran’ny Fanjakana, ary tonga Kristianina ny sasany taminy.

Nefa iza moa io mpitsidika manoratra eo an-databatra io? Azonao vinanina ve? Eny, i Timoty io. Natao an-tranomaizina koa i Timoty noho ny fitoriana momba ny Fanjakana, nefa afaka indray izy. Ary tonga eto izy mba hanampy an’i Paoly. Fantatrao ve izay soratan’i Timoty? Aoka hojerentsika.

Tsaroanao ve ny tanànan’i Filipy sy Efesosy tao amin’ny Tantara Faha-110? Nanampy teo amin’ny fanorenana ny fiangonana kristianina tao amin’ireo tanàna ireo i Paoly. Ankehitriny, raha mbola tao an-tranomaizina i Paoly, dia nanoratra taratasy ho an’ireo Kristianina ireo. Ao amin’ny Baiboly ireo taratasy ireo, ary antsoina hoe Efesianina sy Filipianina. Izao i Paoly dia milaza amin’i Timoty izay tokony hosoratana ho an’ireo namany kristianina tany Filipy.

Nampiseho hatsaram-po tokoa tamin’i Paoly ny Filipianina. Nandefa fanomezana ho azy teto, tao an-tranomaizina, izy ireo, ka dia nisaotra azy ireo i Paoly noho izany. I Epafrodito ilay olona izay nitondra ny fanomezana. Nefa narary mafy izy ary saiky maty. Izao izy dia efa tsara indray ary vonona ny handeha hody. Hitondra an’io taratasy avy amin’i Paoly sy Timoty io miaraka aminy izy rehefa hiverina any Filipy.

Raha mbola tao an-tranomaizina i Paoly dia nanoratra taratasy roa fanampiny izay hitantsika ao amin’ny Baiboly. Ny iray dia ho an’ny Kristianina tao amin’ny tanànan’i Kolosia. Fantatrao ve izay niantsoana azy io? Kolosianina. Ny iray hafa dia taratasy manokana ho an’ny namana akaiky iray nantsoina hoe Filemona izay nonina tany Kolosia koa. Momba an’i Onesimosy mpanompon’i Filemona ilay taratasy.

Nandositra avy tao amin’i Filemona i Onesimosy ary tonga tany Roma. Nisy fomba nahafantaran’i Onesimosy ny amin’ny fanaovana an-tranomaizina an’i Paoly teto. Tonga izy mba hitsidika, ary nitory tamin’i Onesimosy i Paoly. Tsy ela i Onesimosy dia tonga Kristianina koa. Izao i Onesimosy dia nanenina noho izy nandositra. Fantatrao àry ve izay nosoratan’i Paoly ao amin’ny taratasiny ho an’i Filemona?

Nangataka an’i Filemona i Paoly mba hamela heloka an’i Onesimosy. ‘Averiko any aminao izy’, hoy ny soratr’i Paoly. ‘Nefa ankehitriny dia tsy hoe mpanomponao fotsiny izy. Rahalahy kristianina tsara dia tsara koa izy.’ Rehefa niverina tany Kolosia i Onesimosy dia nitondra niaraka taminy ireo taratasy roa ireo, ny iray ho an’ny Kolosianina ary ny iray hafa ho an’i Filemona. Azontsika alaina sary an-tsaina ny hafalian’i Filemona rehefa nahalala fa tonga Kristianina ny mpanompony.

Rehefa nanoratra ho an’ny Filipianina sy ho an’i Filemona i Paoly, dia nanana vaovao tsara marina tokoa. ‘Maniraka an’i Timoty atỳ aminareo aho’, hoy i Paoly tamin’ny Filipianina. ‘Nefa hitsidika anareo koa aho, tsy ho ela.’ Ary nanoratra ho an’i Filemona izy hoe: ‘Manomàna trano hipetrahako any.’

Rehefa nafahana i Paoly dia nitsidika ireo rahalahiny sy anabaviny kristianina tany amin’ny toerana maro. Tatỳ aoriana anefa dia nogadraina indray tany Roma i Paoly. Tamin’izay dia fantany fa hovonoina izy. Koa nanoratra ho an’i Timoty izy ary nangataka azy mba ho tonga haingana. ‘Nahatoky teo anatrehan’Andriamanitra aho’, hoy ny nosoratan’i Paoly, ‘ary hamaly soa ahy Andriamanitra.’ Taona vitsivitsy taorian’izay dia novonoina i Paoly, noravana indray i Jerosalema, tamin’ny alalan’ny Romanina tamin’ity indray mitoraka ity.

Nefa misy zavatra hafa koa ao amin’ny Baiboly. I Jehovah Andriamanitra dia nampanoratra ny apostoly Jaona ireo bokiny farany, anisan’izany ny bokin’ny Apokalypsy. Io bokin’ny Baiboly io dia manambara ny hoavy. Aoka hianarantsika izao izay raketin’ny hoavy.

INONA no hitanao eto? Eny, tafika iray mitaingina soavaly fotsy. Nefa mariho ny toerana iaviany. Ireo soavaly dia midina avy any an-danitra eny amin’ny rahona! Moa ve tena soavaly any an-danitra ireo?

Tsia, tsy tena soavaly ireo. Fantatsika izany satria tsy afaka mihazakazaka eny amin’ny rahona ny soavaly, sa tsy izany? Nefa ny Baiboly dia miresaka ny amin’ny soavaly any an-danitra. Fantatrao ve ny antony iresahany toy izany?

Satria fahiny ny soavaly dia nampiasaina betsaka teo amin’ny ady. Ny Baiboly àry dia miresaka ny amin’ny olona mitaingin-tsoavaly avy any an-danitra mba hampisehoana fa manana ady atao amin’ny olona etỳ an-tany Andriamanitra. Fantatrao ve izay iantsoana ny toeran’io ady io? Hara-magedona. Hanafoana ny faharatsiana rehetra eto an-tany izany.

I Jesosy no hitarika izany ady ao Hara-magedona izany. Tadidio fa i Jesosy no nofidin’i Jehovah mba ho mpanjakan’ny fitondram-panjakany. Izany no antony itondrany satroboninahitry ny mpanjaka. Ary ny sabatra dia mampiseho fa hamono ny fahavalon’Andriamanitra rehetra izy. Tokony ho gaga va isika satria handringana ny olona ratsy rehetra Andriamanitra?

Jereo indray ny Tantara Faha-10. Inona no hitanao eto? Eny, ny Safodrano lehibe izay nandringana ny olona ratsy fanahy. Iza no nahatonga an’io Safodrano io? I Jehovah Andriamanitra. Jereo izao ny Tantara Faha-15. Inona no mitranga eo? Ravan’ny afo nalefan’i Jehovah i Sodoma sy Gomora.

Avadiho mankao amin’ny Tantara Faha-33 ange. Jereo izay mitranga amin’ny soavaly sy ny kalesy fiadian’ny Ejipsianina. Iza no nahatonga ny rano hanafotra azy ireo? I Jehovah. Nataony izany mba hiarovana ny olony. Jereo ny Tantara Faha-76. Ho hitanao eto fa i Jehovah dia namela mihitsy ny Israelita olony hiharan’ny fandringanana, noho ny faharatsian’izy ireo.

Koa tsy tokony ho gaga àry isika raha haniraka ny tafiny any an-danitra i Jehovah mba hamarana ny faharatsiana rehetra eto an-tany. Nefa hevero ange izay ambaran’izany e! Avadiho ny pejy ary aoka hojerentsika.

JEREO ireo hazo lava, voninkazo tsara tarehy ary tendrombohitra avo ireo. Tsy mahafinaritra ve eto? Jereo ny fomba fihinan’ilay diera eo amin’ny tanan’ilay zazalahy kely. Ary jereo ny liona sy ny soavaly mitsangana erỳ amin’ny ahi-maitso erỳ. Tsy ho tianao ve ny hipetraka ao amin’ny trano iray eo amin’ny toerana toy izao?

Irin’Andriamanitra ny hahavelomanao mandrakizay eto an-tany ao amin’ny paradisa. Ary tsy iriny ny hahitanao ny fahoriana sy ny fanaintainana izay mampijaly ny olona ankehitriny. Izao no fampanantenana omen’ny Baiboly an’ireo izay hiaina ao amin’ny paradisa vaovao: ‘Ho eo amin’izy ireo Andriamanitra. Tsy hisy fahafatesana na ranomaso na fanaintainana intsony. Efa lasa ny zavatra taloha.’

Hataon’i Jesosy izay hitrangan’izany fiovana mahatalanjona izany. Fantatrao ve hoe rahoviana? Eny, aorian’ny fanadiovany ny tany amin’ny faharatsiana sy ny olona ratsy fanahy rehetra. Tadidio fa fony i Jesosy tetỳ an-tany dia nanasitrana ny olona tamin’ny karazan’aretina rehetra, ary nanangana olona tamin’ny maty mihitsy. Nataon’i Jesosy izany mba hampisehoana izay hataony manerana ny tany rehetra rehefa ho tonga Mpanjakan’ny fanjakan’Andriamanitra izy.

Hevero ange fa tena hahatalanjona izany paradisa vaovao eto an-tany izany! I Jesosy, miaraka amin’ny sasany amin’ireo hofidiny, dia hanapaka any an-danitra. Ireo mpanapaka ireo dia hikarakara ny olona tsirairay avy eto an-tany ary hanao izay hahasambatra azy. Aoka hojerentsika izay ilaintsika hatao mba hahazoana antoka fa homen’Andriamanitra antsika ny fiainana mandrakizay ao amin’ny paradisany vaovao.

AZONAO lazaina ve izay vakin’ilay zazavavy kely sy ireo namany? Eny, izany dia ny boky izay vakinao koa: Ny Bokiko Misy Fitantarana avy ao Amin’ny Baiboly. Ary eo am-pamakiana ny tantara izay vakinao izy ireo: “Ny fomba hahavelomantsika mandrakizay.”

Fantatrao ve izay ianaran’izy ireo? Voalohany, dia ny hoe ilaintsika ny mahafantatra ny amin’i Jehovah sy Jesosy Zanany raha te ho velona mandrakizay isika. Hoy ny Baiboly: ‘Izao no fomba hahavelomana mandrakizay. Mianatra momba ilay hany Andriamanitra marina, sy ny Zanany izay nirahiny ho etỳ an-tany, dia i Jesosy Kristy.’

Ahoana no azontsika ianarana momba an’i Jehovah Andriamanitra sy Jesosy Zanany? Ny fomba iray dia ny famakiana Ny Bokiko Misy Fitantarana avy ao Amin’ny Baiboly, manomboka eo amin’ny voalohany ka hatramin’ny farany. Miresaka betsaka ny amin’i Jehovah sy Jesosy izy io, sa tsy izany? Ary miresaka betsaka ny amin’ny zavatra efa nataon’izy ireo sy ny zavatra izay mbola hataony. Nefa ilaintsika ny manao zavatra bebe kokoa ankoatra ny famakiana fotsiny an’ity boky ity.

Hitanao ve ilay boky hafa eo amin’ny tany? Ny Baiboly io. Asaivo misy olona mamaky aminao ireo tapany ao amin’ny Baiboly izay iorenan’ireo fitantarana ato amin’ity boky ity. Ny Baiboly dia manome antsika ny fanazavana feno ilaintsika mba hahafahantsika rehetra hanompo an’i Jehovah amin’ny fomba tsara ka hahazo ny fiainana mandrakizay. Koa tokony ho zatra ny hianatra ny Baiboly matetika isika.

Nefa tsy ampy ny fianarana fotsiny momba an’i Jehovah Andriamanitra sy Jesosy Kristy. Mety hanana fahalalana be dia be ny amin’izy ireo sy ny fampianarany isika, nefa tsy hahazo ny fiainana mandrakizay. Fantatrao ve izay mbola ilaina?

Ilaintsika koa ny miaina mifanaraka amin’ny zavatra ianarantsika. Tadidinao ve i Jodasy Iskariota? Iray tamin’ireo 12 izay nofidin’i Jesosy mba ho apostoliny izy. Nanana fahalalana be dia be momba an’i Jehovah sy Jesosy i Jodasy. Nefa inona no nitranga taminy? Taoriana kely dia tonga tia tena izy, ary nanolotra an’i Jesosy tamin’ny fahavalony tamin’ny sekely volafotsy 30. Koa tsy hahazo ny fiainana mandrakizay i Jodasy.

Tadidinao ve i Gehazy, ilay lehilahy nianarantsika tao amin’ny Tantara Faha-69? Naniry hahazo akanjo sy vola sasany izay tsy azy izy. Koa nandainga izy mba hahazoana ireo zavatra ireo. Nefa nofaizin’i Jehovah izy. Ary hofaiziny koa isika raha tsy mankatò ny lalàny.

Nefa nisy olona tsara fanahy maro izay nanompo hatrany an’i Jehovah tamim-pahatokiana. Irintsika ny ho toa azy ireny, sa tsy izany? I Samoela kely dia ohatra tsara harahintsika. Tadidio, araka ny hitantsika tao amin’ny Tantara Faha-55, fa vao efatra na dimy taona monja izy fony nanomboka nanompo an’i Jehovah tao amin’ny tabernakeliny. Koa na toy inona na toy inona hakelezanao, dia tsy kely loatra ianao mba hanompo an’i Jehovah.

Tsy isalasalana fa ny olona tiantsika rehetra harahina dia i Jesosy Kristy. Fony izy zazalahy aza, araka ny asehon’ny Tantara Faha-87, dia efa tao amin’ny tempoly izy, niresaka tamin’ny hafa ny amin’ny Rainy any an-danitra. Aoka hanahaka azy isika. Aoka isika hanambara amin’ny olona maro araka izay azo atao ny amin’i Jehovah Andriamanitra mahatalanjona sy ny Zanany, i Jesosy Kristy. Raha manao ireo zavatra ireo isika, dia ho afaka ny ho velona mandrakizay ao amin’ny paradisa vaovaon’Andriamanitra ho eto an-tany.