• Fandaminana
    Fandresen-dahatra Miorina Amin’ny Soratra Masina

    • Fandaminana

      Famaritana: Fikambanana na vondron’olona voalamina mba hiara-manatanteraka asa na hanatratra tanjona iray. Misy mpiandraikitra eo amin’izy ireo, ary misy fepetra takina amin’izy ireo sy fitsipika mifehy azy. Lasa anisan’ny fandaminan’i Jehovah ireo Vavolombelona nanokan-tena ho azy sy natao batisa. Safidy ilay izy, fa tsy an-tery na nolovaina avy amin’ny ray aman-dreny. Ny fampianaran’io fandaminana io sy ny zavatra ataony no nahasarika azy ireo. Te handray anjara amin’ny asa ataony koa izy ireo.

      Manana fandaminana eto an-tany tokoa ve i Jehovah?

      Diniho izao:

      Voalamina ve ireo anjely any an-danitra?

      Dan. 7:9, 10: “Mbola nijery ihany aho mandra-pametraka seza fiandrianana, ary nipetraka teo Ilay Efa Nisy Hatry ny Ela Be. Fotsy mangatsakatsaka ny fitafiany, ary toy ny volonondry madio ny volon-dohany. Afo miredareda ny seza fiandrianany, ary afo mandoro ny kodiaran’ilay izy. Renirano afo no nikoriana sy nivoaka avy teo anatrehany. Arivoarivo no nanompo azy, ary iray alina ampitomboina iray alina no nijoro teo anatrehany. Nanomboka ny Fitsarana, ka nisy boky nosokafana.”

      Sal. 103:20, 21: “Derao i Jehovah, ry anjeliny mahery dia mahery, izay manatanteraka ny baikony sy mihaino ny feony. Derao i Jehovah, ry tafiny rehetra, dia ianareo mpanompony izay manao ny sitrapony.” (Azo antoka fa voalamina izany hoe ‘tafika’ izany.)

      Ahoana no nampitan’Andriamanitra ny toromariny tamin’ny mpanompony tetỳ an-tany taloha?

      Nanome toromarika an’ireo filoham-pianakaviana toa an’i Noa sy Abrahama i Jehovah, tamin’ny mbola vitsy ny mpanompony. Ireo indray avy eo no nampita izany tamin’ny fianakaviany. (Gen. 7:1, 7; 12:1-5) I Mosesy kosa no nampiasain’i Jehovah hanome toromarika ny Israelita nafahany avy tany Ejipta. (Eks. 3:10) Nalamin’Andriamanitra ho firenena izy ireo teo an-tendrombohitra Sinay, ka nomeny lalàna sy didy momba ny fanompoana azy sy ny fifandraisana amin’olona. (Eks. 24:12) Nanendry mpisorona izy mba hitarika ny fanompoana sy ny fivavahana aminy, sy mba hampianatra azy ireo izay zavatra takiny. Naniraka mpaminany koa izy indraindray mba handrisika ny vahoaka na hampitandrina azy. (Deot. 33:8, 10; Jer. 7:24, 25) Marina fa nihaino ny vavaky ny mpanompony tsirairay i Jehovah, kanefa nampiasa rafitra efa voalamina tsara izy mba hampitana toromarika tamin’ny mpanompony.