Fanomezana ho An’ny Fianakaviana
1. Nahoana ny Sabata no nahasoa ny fianakaviana israelita?
1 Fanomezana avy amin’i Jehovah ny Sabata fahiny, ary nataony hahasoa ny fianakaviana. Niala sasatra ny Israelita tamin’io, sady afaka nandinika ny toetra tsaran’i Jehovah. Afaka nanararaotra io fotoana io koa ny ray aman-dreny mba handentehana ny Lalàna tao am-pon’ny zanany. (Deot. 6:6, 7) Noho ny Sabata àry, dia nanana fotoana hisaintsainana ny fifandraisany tamin’i Jehovah ny Israelita, isan-kerinandro.
2. Inona no ianarantsika avy amin’ilay lalàna momba ny Sabata?
2 Tsy asain’i Jehovah mitandrina ny Sabata intsony isika ankehitriny. Ianarantsika avy amin’iny lalàna iny anefa fa tena tiany hatanjaka ara-panahy ny vahoakany. (Isaia 48:17, 18) Izany no anisan’ny antony nanomezany ny Fotoam-pivavahan’ny Fianakaviana.
3. Inona no antony nanaovana ny Fotoam-pivavahan’ny Fianakaviana?
3 Inona no zava-kendren’ny Fotoam-pivavahan’ny Fianakaviana? Nanomboka tamin’ny Janoary 2009, dia natambatra tamin’ny Sekolin’ny Fanompoana sy Fivoriana Momba ny Fanompoana ny Fianarana Boky. Natao izany mba hanana fotoana raikitra ny mpianakavy, hanatsarana ny fifandraisany amin’i Jehovah. Nasaina nanokana takariva iray isan-kerinandro àry ny fianakaviana mba hanaovana fotoam-pivavahana. Tsara raha ilay andro nanaovana fianarana boky taloha izany, raha mety. Tsy tokony hatao maimaika ilay fianarana, ary hatao mifanaraka amin’izay ilain’ny mpianakavy.
4. Nahoana no tsy voatery hoferana ho adiny iray ny Fotoam-pivavahan’ny Fianakaviana?
4 Be tokoa ny fotoana lanintsika mba hamonjena ny Fianarana Boky taloha. Eo ny fotoana hiakanjoana, handehanana mankany am-pivoriana, sy ny sisa. Adiny iray fotsiny ilay fivoriana, nefa saika lany tamin’izy io ny takariva manontolo. Azon’ny fianakaviana anaovana fanompoana masina ho an’i Jehovah io takariva io izao. Tsy voatery hoferana ho adiny iray àry ny Fotoam-pivavahan’ny Fianakaviana. Tokony hatao mifanaraka amin’izay ilain’ny mpianakavy kosa ny faharetan’izy io.
5. Tsy maintsy fiaraha-midinika foana ve no atao amin’io takariva io? Hazavao.
5 Tsy maintsy fiaraha-midinika foana ve? Mandray soa ny mpivady, na ny ray aman-dreny sy ny zanany, rehefa miara-mandinika hevitra avy ao amin’ny Soratra Masina. Mifampahery izy ireo, ary lasa mifankatia kokoa. (Rom. 1:12) Ny fiaraha-midinika àry no tokony hisongadina amin’ny Fotoam-pivavahan’ny Fianakaviana. Afaka manao fianarana samirery koa anefa ny mpianakavy tsirairay avy eo. Rehefa vita, ohatra, ilay fiaraha-midinika, dia mbola mijanona ao amin’ny efitra iray ihany ny rehetra, fa samy mianatra mitokana. Angamba izy ireo mamita ny fanomanany fivoriana, na mamaky gazety. Misy mifidy ny tsy handefa tele mihitsy amin’io takariva io.
6. Ahoana no tokony hanaovana an’ilay fiaraha-midinika?
6 Ahoana no hanaovana an’ilay fiaraha-midinika? Tsy voatery hoe fanontaniana sy valiny foana izy io. Azo atao toy ny fivoriana andavanandro ilay izy mba ho velombelona sy hahaliana. Azo zarazaraina ilay fotoana, ary zavatra maromaro no atao. Misy, ohatra, miara-mamaky Baiboly aloha, avy eo manomana anjara amin’ny fivoriana, ary farany manao fanazaran-tena ho amin’ny fanompoana. Misy soso-kevitra vitsivitsy eo amin’ny pejy 6.
7. Tokony ho fotoana manao ahoana izy io?
7 Tokony ho fotoana manao ahoana izy io? Mandray kokoa ny sainao rehefa mianatra, raha mahazo aina ianao sady tsara fanahy ny olona miaraka aminao. Azo atao ny miara-mianatra eny an-tokotany raha tsara ny andro. Asio fiatoana kely koa, raha ilaina. Misy fianakaviana mihinana sakafo maivana rehefa vita ny fianarana. Tsy amin’io mihitsy ny ray aman-dreny no tokony hibedy na hanafay ny ankizy. Azo resahina kely anefa izay olana na fahazarana tokony hahitsy. Raha mila fanampiana manokana kosa ny ankizy iray, dia aleo resahina mitokana amin’ny fotoana hafa izy, satria mety ho menatra raha tenenina eo imason’ny hafa. Tsy tokony hankaleo be ilay takariva fa mba atao mahafinaritra, satria Andriamanitra falifaly no ivavahantsika.—1 Tim. 1:11.
8, 9. Inona avy ny fanomanana tokony hataon’ny loham-pianakaviana?
8 Inona no fanomanana tokony hatao? Hahasoa kokoa ny Fotoam-pivavahan’ny Fianakaviana raha manomana foana ny loham-pianakaviana. Jereny mialoha hoe inona no hodinihina ary ahoana no hanaovana azy. (Ohab. 21:5) Tsara raha manontany ny vadiny ny lehilahy. (Ohab. 15:22) Tsara koa raha manontany ny zanany izy indraindray, mba ho fantany izay mahaliana sy mampanahy azy ireo.
9 Tsy voatery hanomana be foana ny raim-pianakaviana, na hoe hitady zava-baovao foana. Mety hisy fandaharana efa fanaon’izy ireo isan-kerinandro mantsy, ka tsy mila omanina be intsony. Mety ho tsara raha vao vita mihitsy ilay fianarana no manomana ny manaraka izy, amin’izay mbola tadidiny ny zavatra ilain’ny ankohonany. Misy loham-pianakaviana manoratra mialoha izay fandaharana hatao, ary mametaka izany amin’ny toerana talaky maso. Hahaliana ilay izy amin’izay, sady tsy ho andrin’ny mpianakavy ny hanaovana azy. Afaka manomana koa izy ireo raha ilaina.
10. Inona no azon’ny mpitory atao mandritra ny Fotoam-pivavahan’ny Fianakaviana, raha irery izy?
10 Ahoana raha irery ianao? Afaka manao fianarana samirery ianao, amin’ilay takariva ho an’ny Fotoam-pivavahan’ny Fianakaviana. Anisan’ny fianarana samirery ny famakiana Baiboly, fanomanana fivoriana, ary famakiana gazety. Ankoatra an’ireo, dia misy mpitory mianatra foto-kevitra ara-baiboly. Mampahery koa indraindray ny manasa mpitory hafa, na fianakaviana iray, mba hiaraka handinika loha hevitra avy ao amin’ny Soratra Masina.
11, 12. Inona avy ny soa azo rehefa atao tsy tapaka ny Fotoam-pivavahan’ny Fianakaviana?
11 Inona no soa azo rehefa atao tsy tapaka ilay izy? Anisan’ny fanompoana masina ny Fotoam-pivavahan’ny Fianakaviana, ka lasa akaiky kokoa an’i Jehovah izay manao izany amin’ny fo manontolo. Lasa mifandray am-po koa ny mpianakavy. Mpisava lalana ny mpivady iray, ary tsy manan-janaka. Hoy izy ireo momba ny fitahiana azony: ‘Tena tsy andrinay ilay takariva fanaovanay Fotoam-pivavahan’ny Fianakaviana. Lasa miraiki-po kokoa sy akaiky kokoa [an’i Jehovah] izahay roa. Vao mifoha izahay amin’ilay andro iarahanay mianatra, dia mifampahatsiahy hoe: “Misy inona àry androany hariva ô? Fotoam-pivavahan’ny Fianakaviana!”’
12 Manampy an’ireo be atao koa ilay takariva fanaovana fotoam-pivavahana. Hoy ny anabavy mpisava lalana iray mitaiza irery ny zanany roa lahy: “Tapatapaka foana ny fianaram-pianakavianay, satria reraka be aho. Hoatran’ny tsisy fotoana hanaovana an’ilay izy mihitsy. Tiako ny hisaotra anareo amin’ny foko manontolo noho ilay takariva fanaovana Fotoam-pivavahan’ny Fianakaviana. Lasa afaka mianatra tsy tapaka izao izahay mianakavy, ary tena mandray soa.”
13. Miankina amin’ny inona ny soa horaisin’ny fianakaviantsika?
13 Fanomezan’ilay Raintsika ny Fotoam-pivavahan’ny Fianakaviana, toy ny Sabata fahiny, ary natao hahasoa antsika. (Jak. 1:17) Niankina tamin’izay nataon’ireo Israelita tamin’ny Sabata, no hampahatanjaka azy ara-panahy na tsia. Miankina amin’izay ampiasantsika ny takariva ho an’ny Fotoam-pivavahan’ny Fianakaviana koa ny soa horaisin’ny fianakaviantsika. (2 Kor. 9:6; Gal. 6:7, 8; Kol. 3:23, 24) Ampiasao tsara àry io takariva io, dia ho afaka hilaza toy ny mpanao salamo ianareo mianakavy hoe: “Izaho kosa, dia ny manakaiky an’Andriamanitra no tsara amiko. I Jehovah Tompo Fara Tampony no ataoko fialofako.”—Sal. 73:28.
[Teny notsongaina, pejy 5]
Tsy tokony hankaleo be ilay takariva fa mba atao mahafinaritra, satria Andriamanitra falifaly no ivavahantsika
[Efajoro, pejy 6]
TEHIRIZO
Inona avy no Azo Atao Amin’ny Fotoam-pivavahan’ny Fianakaviana?
Baiboly:
• Miara-mamaky ampahany amin’ny famakiana Baiboly isan-kerinandro. Afaka mifandimby mamaky ny mpianakavy, ka manao anjaran’olona iray avy raha tantara ilay vakina.
• Atao toy ny tantara an-tsehatra izay novakina tao amin’ny Baiboly.
• Samy mamaky mialoha an’ireo toko natao hovakina ny tsirairay, ary mitady fanontaniana iray na roa. Miara-mikaroka ny valiny ny rehetra.
• Manamboatra karatra kely misy andinin-teny iray, isan-kerinandro. Ianarana tsianjery ilay izy, ary hazavaina. Angonina ireo karatra ka asiana famerenana isan-kerinandro mba hahitana hoe firy ny andininy tadidin’ny tsirairay.
• Mihaino famakiana Baiboly noraisim-peo, sady manaraka ao amin’ny Baiboly.
Fivoriana:
• Miara-manomana ampahany amin’ny fivoriana.
• Miara-mianatra ny hira hatao ny herinandro manaraka.
• Raha misy manana anjara sekoly na fampisehoana, dia azo dinihina ny fomba hanaovana azy, ary atao eo anatrehan’ny mpianakavy ilay izy.
Zavatra ilain’ny mpianakavy:
• Mandinika hevitra avy ao amin’ny boky Manontany ny Tanora na Mianara Amin’ilay Mpampianatra Lehibe.
• Ampanaovina fanazaran-tena ny ankizy, mba hahaizany hiatrika olana any am-pianarana.
• Ny ray aman-dreny no maka ny toeran’ny ankizy. Manao fikarohana ireo ankizy, ka izy ireo indray no mody manao hoe ray aman-dreny mampisaintsaina ny zanany.
Fanompoana:
• Mianatra ny fomba fitory hampiasaina amin’ny faran’ny herinandro.
• Mandinika izay tanjona azon’ny mpianakavy tratrarina, mba hanompoana bebe kokoa amin’ny vanim-potoanan’ny Fahatsiarovana na vakansy.
• Manomana vetivety ny fomba hamaliana an’ireo fanontaniana fametraky ny olona eny amin’ny faritany, ary avy eo manao fanazaran-tena.
Soso-kevitra hafa:
• Miara-mamaky lahatsoratra ao amin’ny gazety farany.
• Mamaky lahatsoratra iray mialoha avy ao amin’ireo gazety farany ny tsirairay, ary mamelabelatra an’ilay izy.
• Manasa mpitory iray na mpivady mba hiaraka aminareo. Azo adinadinina koa izy ireo.
• Mijery ny video-ntsika ary mandray lesona avy amin’ilay izy.
• Miara-mandinika ny lahatsoratra “Manontany ny Tanora” na “Natao Hodinihin’ny Mpianakavy”, avy ao amin’ny Mifohaza!
• Miara-mandinika ny lahatsoratra “Ampianaro ny Zanakao” na “Ho An’ny Ankizy sy ny Tanora”, avy ao amin’ny Tilikambo.
• Mamaky ampahany amin’ny Diary farany na boky vaovao, ary mandray lesona avy amin’izany.
• Rehefa avy nanatrika fivoriambe, dia mamerina indray ireo hevi-dehibe.
• Mandinika zavaboary iray, ary maka lesona avy amin’izany momba ny toetran’i Jehovah.
• Miara-manao zavatra, toy ny hoe manamboatra sambofiara kely, na manao sarintany, na tabilao mamintina hevitra.