Fanontanian’ny mpamaky
◼ Koa satria Daniela nilaza fa tsy hanaiky handray fanomezana avy amin’i Belsazara mihitsy izy noho ny nilazana ny hevitry ny soratra teo amin’ny rindrina, nahoana moa izy tatỳ aoriana no nanao ny fitafiana sy rojo nampanantenaina fa hatao valisoa?
Talohan’ny handresen’ny Mediana sy Persiana indrindra an’i Babylona dia tao anatin’ny fanasana indrindra Belsazara mpanjaka sy ny tao an-dapany. Tamin’izay no nampanalain’ny mpanjaka ireo kapoaka avy any amin’ny tempolin’i Jehovah, ka nisotro divay tamin’izany ireo nasaina sady nidera ireo andriamanitra Babyloniana. Tapaka tampoka anefa ny firavoravoana rehefa nisy tanana niseho amin’ny fomba mahagaga ka nanoratra zavatra hafahafa teo amin’ny rindrina. — Daniela 5:1-5.
Tsy afaka nilaza ny hevitr’io soratra hafahafa io ireo olon-kendry sy mpanandro tany Babylona, na dia nampanantena aza i Belsazara fa hanome rojo volamena sy toerana ambony eo anivon’ny fanjakana ho an’izay rehetra hahay hamaky azy sy hilaza ny heviny. — Daniela 5:7-9.
Rehefa nampidirina teo anatrehan’ny mpanjaka Daniela Hebreo tamin’ny farany, dia naverin’ny mpanjaka taminy ny fanolorany tamin’ny fampanantenana fa hampiakanjo jaky azy izy ary hanisy rojo volamena amin’ny tendany, ka hanao azy ho ny olo-manan-kaja fahatelo tao amin’ny fanjakana. Namaly tamim-pahamendrehana toy izao ilay mpaminany: “Aoka ihany ho anao ny fanomezanao, ary ny valim-pitianao omeo ny hafa; nefa hovakiko amin’ny mpanjaka ihany ny soratra, ary hampahafantariko azy ny heviny.” — Daniela 5:17.
Araka izany, dia tsy nilaina mihitsy ny nividy an’i Daniela na nanolotra valisoa ho azy mba hilazany ny hevitr’ilay soratra. Afaka nitana ny fanomezany ilay mpanjaka na nanome izany ho an’olon-kafa. Hanome ny fanazavana i Daniela, tsy hoe mba hahazoana valisoa, fa satria nandray fahefana izy hanao izany, avy amin’i Jehovah, ilay Andriamanitra marina, izay nadiva hampihatra ny fanamelohany an’i Babylona.
Araka ny Daniela 5:29, rehefa avy namaky sy nilaza ny hevitry ny soratra araka ny nolazainy i Daniela, dia nasain’ny mpanjaka nomena azy ihany ireo valisoa nampanantenaina. Tsy Daniela akory no nanao ny akanjo sy nandray ny rojo. Nampanaovina azy izany araka ny baikon’ny mpanjaka tsy refesi-mandidy tao amin’ny fanjakana, dia Belsazara mpanjaka. Izany anefa akory tsy mifanipaka amin’ny Daniela 5:17 nampisehoan’ilay mpaminany mazava fa tsy fitiavan-tena akory no nanosika azy.
Hilaza i Jesosy atỳ aoriana fa “izay mandray mpaminany, satria mpaminany izy, dia handray ny valim-pitian’ny mpaminany”. (Matio 10:41.) Sarotra ny mampihatra an’io fotopoto-pitsipika io amin’i Belsazara, satria tsy hoe noho izy niaiky fa mpaminan’ilay Andriamanitra marina Daniela, dia hoe naneho fiheverana sy fanajana azy izy. Vonona tokoa io mpanjaka io hanome fanomezana toy izany ho an’izay rehetra hahalaza ny hevitry soratra nifono zava-niafina, na dia mpanandro mpanompo sampy aza izany. Nandray ny valiny tandrifina azy izy, dia izay nambaran’ny soratra ara-paminaniana hita teo amin’ny rindrina nanao hoe: “Ary tamin’io alina io ihany dia novonoina Belsazara, mpanjakan’ny Kaldeana. Ary Dariosa Mediana no nandray fanjakana.” — Daniela 5:30; 6:1.