Mpikarakara Fiangonana Manao Fanompoana Sarobidy

HOY ny apostoly Paoly tao amin’ny taratasiny ho an’ny fiangonan’i Filipy: “Avy amin’i Paoly sy Timoty, mpanompon’i Kristy Jesosy. Ho an’ny olona masina rehetra tafaray amin’i Kristy Jesosy any Filipy, anisan’izany ny mpiandraikitra sy ny mpikarakara fiangonana.” (Fil. 1:1) Mariho fa anisan’ireo notononin’i Paoly ny mpikarakara fiangonana. Azo inoana hoe tena nanampy ny anti-panahin’ny fiangonana tamin’izany ireo rahalahy ireo. Toy izany koa ankehitriny. Manao asa maromaro ny mpikarakara fiangonana mba hanampiana ny mpiandraikitra. Mampilamina tsara ny fiangonana izany.

² Fantatrao ve hoe iza avy ny mpikarakara fiangonana eo anivon’ny fiangonanareo? Fantatrao koa ve ny zavatra ataon’izy ireo mba hahasoa anao sy ny fiangonana manontolo? Azo antoka fa tena mankasitraka ny ezaka ataon’ireny lehilahy ireny i Jehovah. Hoy i Paoly: “Izay lehilahy manao tsara ny fanompoany, dia mahazo laza tsara, sady tena sahy miresaka momba ny finoany an’i Kristy Jesosy.”​—1 Tim. 3:13.

FEPETRA TAKIN’NY SORATRA MASINA AMIN’NY MPIKARAKARA FIANGONANA

³ Tokony hanaraka tsara ny fomba fiaina kristianina ny mpikarakara fiangonana. Mahay mandray andraikitra izy ary mamita tsara ny asa anendrena azy. Izany no tokony ho izy, rehefa jerena ny fepetra takina amin’izy ireo, araka ilay taratasy nosoratan’i Paoly ho an’i Timoty. Hoy izy: “Ny mpikarakara fiangonana koa dia tokony ho mato-tsaina, tsy mivadibadi-dela, tsy mpiboboka divay, tsy tia tombony azo amin’ny tsy marina, ary mitana mafy an’ilay zava-miafina masina, izany hoe ny finoana, sady manana feon’ny fieritreretana madio. Aoka koa aloha izy ireo hozahan-toetra mba ho hita raha mendrika. Dia ho lasa mpanompo izy ireo satria tsy misy hokianina. Aoka ny mpikarakara fiangonana hanambady tokana, ary hahay hitondra tsara ny zanany sy ny ankohonany.” (1 Tim. 3:8-10, 12) Tokony hahafeno an’ireo fepetra ambony ireo foana ny mpikarakara fiangonana. Amin’izay tsy hokianin’ny olona ny fiangonana hoe manome andraikitra olona tsy mendrika.

⁴ Tsy mpitory tapatapaka ny mpikarakara fiangonana, na tanora na zokiolona. Mafana fo amin’ny fanompoana toa an’i Jesosy kosa izy ireo. Hita amin’izany hoe manahaka an’i Jehovah izy, ka tiany ho voavonjy ny olona rehetra.​—Isaia 9:7.

⁵ Manome modely koa ny mpikarakara fiangonana eo amin’ny fitafiana sy taovolo, fiteny, toe-tsaina, ary fitondran-tena. Hajain’ny olona izy ireo satria misaina tsara. Zava-dehibe aminy koa ny fifandraisany amin’i Jehovah sy ny andraikiny eo anivon’ny fiangonana.​—Tit. 2:2, 6-8.

⁶ Efa ‘nozahan-toetra’ ireo lehilahy ireo ary hita fa “mendrika.” Nahafoy tena izy ireo, na dia talohan’ny nanendrena azy aza. Efa noporofoiny hoe ilay Fanjakana no ataony loha laharana eo amin’ny fiainany. Miezaka koa izy ireo mba hahazo izay tombontsoam-panompoana mety ho azony. Tena modely ho an’ny fiangonana tokoa izy ireo.​—1 Tim. 3:10.

INONA AVY NY ASA ATAONY?

⁷ Manao asa maro mahasoa ny rahalahiny sy anabaviny ny mpikarakara fiangonana. Manampy ny mpiandraikitra izany, satria lasa afaka mifantoka bebe kokoa amin’ny fampianarana sy ny fiandrasana ondry izy ireo. Arakaraka ny fahaizan’ny mpikarakara fiangonana sy izay ilain’ny fiangonana no andaminan’ny anti-panahy rehetra ny asa anendrena azy ireo.

⁸ Inona no anisan’ny asa ataon’izy ireo? Mety hotendrena hikarakara ny boky ny mpikarakara fiangonana iray, mba hahazoantsika ny boky ampiasaintsika sy entintsika manompo. Ny hafa indray mety hotendrena hitondra mikrô, hikarakara ny kaontin’ny fiangonana na ny faritany, hikarakara ny mpanatrika na ny fanamafisam-peo, na hanampy ny anti-panahy amin’ny fomba hafa. Maro ny asa tokony hatao mba hikojakojana sy hanadiovana ny Efitrano Fanjakana, ka matetika no asaina manampy amin’izany ny mpikarakara fiangonana.

⁹ Mety ho mpikarakara fiangonana mihoatra ny iray no asaina manao ny sasany amin’ireo andraikitra ireo. Samy mahazo iray amin’ireo kosa ny mpikarakara fiangonana tsirairay, any amin’ny fiangonana sasany. Mety hahazo andraikitra maromaro anefa ny mpikarakara fiangonana iray, any amin’ny fiangonana hafa. Raha tsy ampy ny mpikarakara fiangonana, dia azon’ny anti-panahy rehetra atao ny manendry rahalahy vita batisa fakan-tahaka mba hanao ny sasany amin’ireo andraikitra ireo. Hahazo traikefa izy ireo amin’izay, ary mety hilainy izany rehefa mahafeno fepetra ho mpikarakara fiangonana izy, any aoriana any. Azo asaina hanampy amin’ny asa sasany koa ny anabavy fakan-tahaka, raha tsy misy rahalahy. Mazava ho azy fa tsy hotendrena ho mpikarakara fiangonana izy ireny. Fakan-tahaka ny olona iray, raha manome modely ho an’ny hafa. Manatrika fivoriana tsy tapaka, ohatra, izy, mazoto manompo, tsara fitondran-tena, mifandray tsara amin’ny fianakaviany, mahay mifidy fialam-boly, maotina tsara ny fitafiany sy ny taovolony.

¹⁰ Raha tena vitsy ny anti-panahy eo anivon’ny fiangonana, dia azo ampiasaina hiara-midinika ny fanontaniana amin’ny batisa ny mpikarakara fiangonana mahay. Azon’izy ireo atao ilay Fizarana 1 hoe “Ny Zavatra Inoantsika Kristianina.” Anti-panahy kosa no tokony hanao an’ilay Fizarana 2 hoe “Ny Fiainantsika Kristianina”, satria raharaha lehibe momba ny fiainan’ilay olona manokana no ao amin’izy io.

¹¹ Mety hampifanakalozin’ny anti-panahy rehetra indraindray ny asa sasany ataon’ny mpikarakara fiangonana, raha hitan’izy ireo hoe tena ilaina. Tsara kokoa anefa raha elaela vao ovana ny andraikitr’ireo rahalahy mba hahaizany tsara an’ilay izy.

¹² Mety homena andraikitra hafa ny mpikarakara fiangonana, raha ‘hitan’ny olona rehetra ny fandrosoany.’ (1 Tim. 4:15) Miankina amin’ny zava-misy eo an-toerana anefa izany. Mety ho azo tendrena ho mpanampy ny mpiandraikitra ny andia-mpitory ny mpikarakara fiangonana iray, raha vitsy ny anti-panahy. Mety hasaina hikarakara andia-mpitory mihitsy aza izy. Tokony hanaraka ny tari-dalan’ny anti-panahy foana anefa izy amin’izay. Mety homena anjara amin’ny Fivoriana Momba ny Fiainantsika sy ny Fanompoana izy ireny, na hanao lahateny eo anivon’ny fiangonana, na hitarika ny Fianarana Baiboly Ataon’ny Fiangonana, raha ilaina. Misy andraikitra hafa azo omena ny mpikarakara fiangonana, rehefa misy zavatra manokana ilaina. Tokony hahafeno ny fepetra takina amin’ilay andraikitra anefa izy amin’izay. (1 Pet. 4:10) Tokony ho vonona hahafoy tena ny mpikarakara fiangonana rehefa manampy an’ireo anti-panahy.

¹³ Tsy mitovy amin’ny asan’ny anti-panahy ny an’ny mpikarakara fiangonana. Tsy midika anefa izany hoe tsy anisan’ny fanompoana masina ho an’Andriamanitra ilay izy. Tena ilaina koa ny asan’izy ireo mba hampandeha tsara ny zavatra atao eo anivon’ny fiangonana. Mety ho azo atolotra ho anti-panahy ny mpikarakara fiangonana, rehefa mandeha ny fotoana, raha ataony tsara ny andraikiny ary fenony ny fepetra ho mpiandry sy mpampianatra.

¹⁴ Rahalahy tanora ve ianao sa vita batisa vao haingana? Raha izany no izy, nahoana raha miezaka mafy mba hahafeno fepetra ho mpikarakara fiangonana? (1 Tim. 3:1) Mitombo hatrany ireo olona manompo an’i Jehovah isan-taona, ka ilaina ny rahalahy mahafeno fepetra mba hiandraikitra azy ireo. Miezaha àry ho tia manampy ny hafa. Ho vitanao izany raha misaintsaina ny ohatra tsara navelan’i Jesosy ianao. (Mat. 20:28; Jaona 4:6, 7; 13:4, 5) Vao mainka ianao haniry hanampy ny hafa rehefa hitanao hoe mahafaly ny manao an’izany. (Asa. 20:35) Nahoana àry raha mba manolo-tena hanampy an’ireo mila fanampiana, hanampy amin’ny fikojakojana Efitrano Fanjakana, na hisolo toerana amin’ireo anjaran’ny mpianatra amin’ny Fivoriana Momba ny Fiainantsika sy ny Fanompoana? Mila manana an’ireo toetra kristianina koa ianao, raha te ho lasa mpikarakara fiangonana. Tena ilaina ny mianatra samirery tsy tapaka mba hahavitana an’izany. (Sal. 1:1, 2; Gal. 5:22, 23) Miezaha koa mba ho azo ianteherana sy ho mendri-pitokisana rehefa omena andraikitra.​—1 Kor. 4:2.

¹⁵ Voatendrin’ny fanahy masina ny mpikarakara fiangonana mba hahasoa ny fiangonana. Ho hita hoe mankasitraka ny asa mafy ataon’izy ireo isika rehetra, raha miara-miasa aminy rehefa manao ny asa nanendrena azy izy ireo. Ho hita amin’izany koa hoe ankasitrahantsika ny fandaharana ataon’i Jehovah mba hampilamina tsara ny ankohonany.​—Gal. 6:10.