Orsan-drano Mafy Aina
AVY AMIN’NY MPANORATRA NY MIFOHAZA! ANY JAPON
◼ KAROHY tsara ange ao amin’ny toerana iray mandomando, fa mety hahita orsan-drano ianao e! Anisan’ny zavaboary mafy toto indrindra eran-tany izy io. Saika misy azy daholo na lomotra, na ranomandry, na renirano efa ritra, na loharano mafana, na farihy, na ranomasina, ary na ao an-tokotaninao aza. Bitika dia bitika izy io, ka zara raha hita. Fohy ny vatany ary mizara efatra, sady voarakotra hoditra manify miaro azy. Valo kosa ny tongony, ary misy hoho maromaro mifaraingo. Toy ny an’ny orsa miresaresa ny bikabikany sy ny fandehany, ka izay no iantsoana azy hoe orsan-drano.
Karazam-biby miadam-pamindra ny orsan-drano. Misy karazany an-jatony izy io. Mamoaka atody 1 ka hatramin’ny 30 ny vavy isaky ny manatody. Mety hahazo orsan-drano an’aliny ianao, raha mandroaka fasika na tany mando kelikely fotsiny. Ny lomotra eny amin’ny tafo no tena ahitana azy.
Velona foana io bibikely io, na dia any amin’ny toerana tsy azo iainana aza. Hoy Ny Rakipahalalana Britannica (anglisy): “Napetraka tao amin’ny toerana tsy nisy rivotra nandritra ny valo andro ny orsan-drano sasany. Nafindra tao anaty gazy heliôma nandritra ny telo andro izy ireo avy eo, ary natao antonony ny hafanana. Nalefa tao amin’ny toerana nisy hatsiaka 272 degre ambanin’ny zero, nandritra ny ora maromaro, izy ireo taorian’izay. Velona soa aman-tsara indray izy ireo, rehefa naverina ho antonony ny hafanana.” Maty ny olona, rehefa mihoatra ny fetran’ny zakany ny habetsahan’ny taratra X atao aminy. Na ampitomboina aman-jatony maro aza anefa io fetra io, dia mbola tsy mahafaty ny orsan-drano. Ary mety mbola ho tantiny tsara aza ny toerana tsy azo iainana any ana habakabaka, araka ny tombantomban’ny manam-pahaizana!
Ahoana no ahavitany izany? Toy ny maty izy amin’ireny fotoana ireny ary zara raha mihetsika, ka tsy tsikaritra akory hoe mbola velona! Asitriny ao anaty vatany ny tongony, ary soloany karazana siramamy hafakely ny rano miala amin’ny vatany. Mihorona toy ny baolina kely izy, ary lasa mifono savoka. Velona ao anatin’ny minitra vitsivitsy na ora vitsivitsy izy, rehefa averina ao amin’ny toerana mando toy ny mahazatra azy. Nahavita namelona orsan-drano tsy niaina nandritra ny 100 taona mihitsy aza ny manam-pahaizana!
Mahatalanjona tokoa ny fomba ideran’ireny “biby mandady” ireny an’i Jehovah, na dia tsy miloa-bava aza izy.—Salamo 148:10, 13.
[Sary nahazoan-dalana, pejy 30]
© Diane Nelson/Visuals Unlimited