Avy Amin’ny Mpamaky

Fomba Fito Itaizan-janaka (Aogositra 2007) Tena valin’ny vavaka nataoko io gazety io! Manan-janaka vavy efa-taona aho. Tia an’i Jehovah izy, nefa matahotra aho sao tsy mahay mitaiza. Mangataka amin’i Jehovah isan’andro àry aho mba hanampy ahy. Misaotra betsaka anareo miahy anay ray aman-dreny.

Y.M.A., Meksika

Hoatran’ny hoe nosoratana ho anay mianakavy mihitsy ilay andian-dahatsoratra, satria manazava an’ireo hevitra maro nanahirana ny saiko! Vao mainka tsapako fa tena mikarakara ny olony i Jehovah. Nihaino ny vavaka nataoko sy nahita ny ranomasoko izy, ary fantany hoe tena nilaiko iny fanazavana iny.

J. M., Etazonia

Mandaitra sy tena mahasoa ny torohevitra nomenareo tao anatin’ireo pejy vitsivitsy ireo. Anjaranay sisa ny mampihatra!

E. L., Failandy

Ho Salama Kokoa ve Ianao Raha Be Fanantenana? (Septambra 2007) Tena nanampy ahy io lahatsoratra io. Matetika mantsy aho no manamelo-tena rehefa misy olana. Lasa nieritreritra aho hoe tsy mahay mitaiza, ka niady saina be. Olona mora kivy aho, nefa nanampy ahy tsy hanahy loatra iny fanazavana iny. Misaotra anareo nanome an’iny lahatsoratra iny.

A. S., Ekoatera

Efa Nampijaly Foana ny Areti-nify (Septambra 2007) Mpitsabo nify aho, ary mpampianatra momba ny fitsaboana nify. Miaiky aho fa tena tsara ilay lahatsoratra nosoratanareo. Namintina tsara ny tantaran’ny fitsaboana nify izy iny. Noresahiko tamin’ny namako sy ny mpiara-miasa amiko ilay izy.

C. R., Etazonia

Andriamanitra ve no Tokony Homena Tsiny? (Septambra 2007) Niresadresaka sy nihinana sakafo maivana izahay sy ny namako, ary nandinika ny fomba hiomanana amin’ny loza. Novakinay indray ireo hevitra tao amin’ilay efajoro hoe “Vonona Handositra ve Ianao?” Nojerenay ireo zavatra nomanin’ny sasany taminay, mba hoentina rehefa misy loza. Nodinihinay koa anefa hoe ilaina ny mandanjalanja. Tsy ny fanangonana ireo zavatra ilaina amin’ny loza mantsy no loha laharana ho an’ny Kristianina, fa ny fitoriana ny vaovao tsaran’ny Fanjakan’Andriamanitra. Ilaina ny miresaka amin’ny hafa ny fampanantenan’Andriamanitra hoe hanafoana ny loza rehetra izy, na voajanahary izany na vokatry ny nataon’ny olona.

R. G., Etazonia

Arovy ny Zanakao! (Oktobra 2007) Nisy nametaveta aho tamin’ny mbola kely. Mbola tsy vitako ny mitantara izany amin’ny ray aman-dreniko. Tena nampionona ahy anefa ireo lahatsoratra ireo. Manantena amin’ny foko manontolo aho fa hamaky an’io gazety io ireo ray aman-dreny, ka hiaro ny zanany. Misaotra an’i Jehovah aho noho iny fanazavana iny. Tena mampionona ny olona nisy nametaveta ilay izy.

R. I., Japon