Inona no Lazain’ny Baiboly?

Tokony Hitandrina Andro Iray Isan-kerinandro ve Isika?

MANOKANA andro iray isan-kerinandro hanaovana zavatra mifandray amin’ny fivavahana ny olona an-tapitrisany eran-tany, na Silamo izy, na Jiosy, na mitonona ho Kristianina. Silamo mafana fo, ohatra, i Ibrahim ary mivavaka sy mihaino toriteny any amin’ny mosquée isaky ny zoma. Hoy izy: “Te ho akaiky an’Andriamanitra sy hiadan-tsaina aho.”

Milaza ve ny Baiboly fa asain’Andriamanitra mitandrina andro iray isan-kerinandro isika? Tsy hahazo famelombelomana ve isika raha tsy amin’ny andro iray manokana no mivavaka amin’Andriamanitra?

Fandaharana tsy maharitra

Nampiasa an’i Mosesy mpaminany Andriamanitra, 3 500 taona mahery lasa izay, mba hanomezana lalàna maromaro. Voalaza tao fa tokony hisy andro fialan-tsasatra maromaro na Sabata, izay hatokana ho an’ny fivavahana. Ny Sabata isan-kerinandro no niverina matetika indrindra. Manomboka ny zoma amin’ny filentehan’ny masoandro izy io ary mifarana ny asabotsy amin’ny filentehan’ny masoandro.—Eksodosy 20:8-10.

Tokony ho nitandrina an’io andro fialan-tsasatra isan-kerinandro io ve ny firenena rehetra? Tsia. Ny Israelita sy ny olona niova ho amin’ny Fivavahana Jiosy ihany no nomena ny Lalàn’i Mosesy. Hoy Andriamanitra tamin’i Mosesy: “Tsy maintsy tandreman’ny zanak’Israely ny sabata ... Famantarana eo amiko sy amin’ny zanak’Israely mandritra ny fotoana tsy voafetra izany.”a—Eksodosy 31:16, 17.

Milaza ny Baiboly fa “aloky ny zavatra ho avy” ny Lalàn’i Mosesy. (Kolosianina 2:17) Anisan’ny fandaharana iray tsy maharitra àry ny Sabata, ary mifanitsy amin’ny fandaharana iray ambony kokoa amin’ny hoavy. (Hebreo 10:1) Asehon’ny Baiboly fa raha araka ny fomba fihevitr’i Jehovah, dia tsy manan-kery intsony ilay Lalàna nomena ny Israelita rehefa maty i Jesosy, ary anisan’io Lalàna io ny fitandremana Sabata isan-kerinandro. (Romanina 10:4) Inona no nisolo an’io Lalàna io?

Fomba fivavahana vaovao

Lazain’ny Baiboly mazava hoe fivavahana manao ahoana no ankasitrahan’Andriamanitra rehefa tsy nanan-kery intsony ny Lalàn’i Mosesy. Mbola mitaky ny hanokanana andro iray isan-kerinandro mba hivavahana ve izy?

Asehon’ny Soratra Masina fa misy zavatra notandreman’ny Israelita mbola asaina tandreman’ny fiangonana kristianina. Anisan’izany ny didy mba hifady ny fanompoan-tsampy sy ny fijangajangana ary ny fihinanana ra. (Asan’ny Apostoly 15:28, 29) Tsy anisan’izany kosa ny Sabata isan-kerinandro.—Romanina 14:5.

Inona koa no resahin’ny Baiboly momba ny fivavahan’ny Kristianina tamin’ny taonjato voalohany? Niara-nivory tsy tapaka izy ireo mba hivavaka, hamaky ny Soratra Masina, hihaino lahateny, ary hihira fiderana an’Andriamanitra. (Asan’ny Apostoly 12:12; Kolosianina 3:16) Nahazo toromarika ny Kristianina, tamin’ireny fivoriana ireny, sady nanatanjaka ny finoany ary nifampahery.—Hebreo 10:24, 25.

Tsy milaza mihitsy ny Baiboly hoe tokony hatao ny alahady na amin’ny andro iray manokana ny fivoriana kristianina. Nahoana àry ny olona maro mitonona ho Kristianina no mihevitra ny alahady ho andro masina? Efa taorian’ny nanoratana ny Baiboly manontolo ny olona vao lasa zatra nivavaka alahady. Efa nino sy nanaraka fombafomba samihafa tsy mifanaraka amin’ny Soratra Masina ny olona tamin’izany.

Nilaza ve Andriamanitra tatỳ aoriana hoe misy andro iray tsy maintsy iarahana mivavaka? Tsia. Hazavaina amin’ny an-tsipiriany ao amin’ny Baiboly izay rehetra takina amin’ny fivavahana marina. Tsy misy soratra masina hafa nanampiana ny Baiboly. Nahazo herin’ny fanahy masina ny apostoly Paoly rehefa nilaza hoe: “Na izahay, na anjely avy any an-danitra, no mitory vaovao tsara aminareo ankoatra an’ilay vaovao tsara efa notorinay taminareo, dia aoka izy ho voaozona.”—Galatianina 1:8.

Mamelombelona ny fanompoana an’Andriamanitra

Niezaka mafy nitandrina andro iray isan-kerinandro ireo mpitondra fivavahana tamin’ny andron’i Jesosy. Tsy nankasitrahan’Andriamanitra anefa izy ireo rehefa nivavaka, satria ratsy toetra. Tia vola izy ireo, nanambany ny sarambaben’olona tso-piaina, nitady laza, nanao ny tsy marina, ary nitsabaka be tamin’ny politika. (Matio 23:6, 7, 29-33; Lioka 16:14; Jaona 11:46-48) Nihambo ho solontenan’Andriamanitra izy ireo. Novany anefa ilay Sabata nirin’Andriamanitra mba hamelombelona ny olona, ka nofenoiny fitsipik’olombelona sarotra arahina.—Matio 12:9-14.

Mazava àry fa tsy izay fivavahana mitandrina andro iray manokana no mampifaly an’Andriamanitra. Hoy i Jesosy: “Mankanesa atỳ amiko ianareo rehetra miasa mafy sy mavesatra entana, fa hamelombelona anareo aho.” (Matio 11:28) Mamelombelona tokoa ny fivavahana tena manaraka ny fampianaran’i Jesosy. Tsy feno fihatsarambelatsihy sy fombafomba mandreraka izany.

Tena manahaka an’ireo mpanara-dia an’i Jesosy voalohany ny Vavolombelon’i Jehovah eran-tany, rehefa manompo an’Andriamanitra. Mianatra Baiboly isan-kerinandro ny Vavolombelona. Arakaraka ny zava-misy no hifidianany ny andro ivoriany, fa tsy hoe manaraka fombafomba tsy avy ao amin’ny Baiboly izy ireo. Nahoana raha manatrika fivoriana toy izany any amin’izay akaiky anao? Ho hitanao fa tena mamelombelona tokoa izany.

[Fanamarihana ambany pejy]

EFA NOERITRERETINAO VE IZAO:

● Misy andro iray isan-kerinandro tsy maintsy ivavahana amin’Andriamanitra ve?—Romanina 10:4; 14:5.

● Nahoana isika no tokony hiara-mivory?—Hebreo 10:24, 25.

● Fivavahana manao ahoana no tena mamelombelona?—Matio 11:28.

[Tabilao/Sary, pejy 10, 11]

(Jereo ny gazety)

TALATA

ALAROBIA

1 ALAKAMISY

2 ZOMA

3 ASABOTSY

4 ALAHADY