Toko 24

Inona no Hataoko Rehefa Miady i Dada sy Neny?

Miady eo imasonao ve ny ray aman-dreninao indraindray? Inona no tena mampiady azy ireo?

□ Vola

□ Raharaha ao an-trano

□ Havana

□ Ianao

Inona no vokatr’izany eo aminao, ka tianao horesahina aminy? Soraty eto izany.

․․․․․

TSY maintsy misy vokany eo aminao ny fifamalian’ny ray aman-dreninao. Tianao mantsy izy ireo, ary mila azy ianao mba hanampy anao. Malahelo be àry ianao rehefa mahita azy miady. Ankoatra izany, dia mety hitovy hevitra amin’i Mialy ianao. Hoy izy: “Sarotra amiko ny manaja ny ray aman-dreniko, satria ry zareo aza tsy mifanaja.”

Diso fanantenana koa ianao rehefa miady ny ray aman-dreninao. Tonga saina ianao hoe hay izy ireo mba manao fahadisoana koa. Mety hitebiteby àry ianao, indrindra raha matetika loatra ny adiny, na tafahoatra. Matahotra mantsy ianao sao hisaraka izy. Hoy i Mialy: “Rehefa mahita ny dada sy mamanay miady aho, dia matahotra sao hisaraka ry zareo. Tsy maintsy hifidy aho tsinona amin’izay hoe hiara-mipetraka amin’iza. Matahotra koa aho sao hosarahina amin’ny mpiray tam-po amiko.”

Nahoana ny ray aman-dreny no miady, ary inona no tokony hataonao rehefa mitranga izany?

Nahoana izy ireo no miady?

Matetika ny mpivady no ‘mifampizaka amim-pitiavana.’ (Efesianina 4:2) Hoy anefa ny Baiboly: “Samy efa nanota ny rehetra ka tsy mahatratra ny voninahitr’Andriamanitra.” (Romanina 3:23) Tsy lavorary ny ray aman-dreninao. Aza gaga àry raha tsy mahafehy ny hatezerany izy ireo indraindray, ka lasa miady.

Tadidio koa fa miaina amin’ny “fotoan-tsarotra tsy mora setraina” isika. (2 Timoty 3:1) Maro àry ny zavatra mahasorena ny mpivady, ka mahatonga azy hiady. Anisan’izany ny asa, ny vola tsy maintsy aloa, ary ny zavatra tsy maintsy iaretana any am-piasana. Samy miasa koa ny mpivady sasany, ka mety hifamaly rehefa mifampizara ny raharaha ao an-trano.

Aza matahotra fa tsy voatery hoe hisaraka ny ray aman-dreninao, na dia tsy mitovy hevitra aza indraindray. Azo inoana fa mbola mifankatia izy ireo.

Eritrereto izao: Angamba ianao efa niara-nijery filma tamin’ny namanao, ary tsy nitovy hevitra momba ilay izy ianareo. Mitranga izany indraindray. Mety tsy hitovy hevitra mantsy na dia ny olona mpinamana be aza. Toy izany koa ny amin’ny ray aman-dreninao. Samy miady saina angamba ry zareo hoe ahoana no hampiasana ny vola ao an-trano. Tsy mitovy hevitra anefa izy rehefa miresaka momba izany. Samy te hitondra anareo hanao vakansy koa angamba izy, nefa samy manana ny heviny momba izay zavatra tena tsara hatao any. Samy maniry ny hahatafita anao amin’ny fianarana izy ireo, nefa tsy mitovy ny fomba hitany fa tena tsara, mba hampirisihana anao hianatra.

Inona no dikan’izany? Tsy voatery hitovy hevitra foana ny olona roa vao hiray saina. Mety tsy hitovy hevitra indraindray na dia ny olona mifankatia aza. Na izany aza, dia mbola tsy zakanao ihany angamba ny mahita ny ray aman-dreninao miady. Inona àry no azonao atao na lazaina amin’izy ireo?

Inona no azonao atao?

Hajao foana izy. Marina fa tezitra ianao rehefa miady lava ny ray aman-dreninao. Tokony ho modely ho an’ny zanany mantsy izy ireo. Tandremo anefa sao tsy manaja azy, fa vao mainka hisy ady ao an-trano. Tadidio koa fa mandidy anao hanaja sy hankatò ny ray aman-dreninao i Jehovah Andriamanitra, na dia sarotra aza izany indraindray.—Eksodosy 20:12; Ohabolana 30:17.

Ahoana anefa raha ny momba anao no mampifamaly azy ireo? Aoka hatao hoe ny reninao ihany no Vavolombelon’i Jehovah. Mety hifamaly momba izay fivavahana tokony harahinao izy mivady, ka mety tsy maintsy hilaza ianao hoe hanaraka ny fivavahan’ny reninao. (Matio 10:34-37) Miezaha hanazava ny safidinao, “amim-pahalemem-panahy sy amim-panajana lalina.” Raha manao izany ianao, dia angamba ho lasa Vavolombelona koa ilay rainao, any aoriana any.—1 Petera 3:1, 15.

Aza miaro na iza na iza. Ahoana raha teren’ny ray aman-dreninao hilaza ny hevitrao ianao, rehefa misy zavatra mampifamaly azy, na dia tsy mahakasika anao aza ilay izy? Aza milaza hoe iza no marina na iza no diso amin’izy roa. Lazao amim-panajana fa tsy te hiditra amin’ny adiny ianao. Afaka miteny, ohatra, ianao hoe: “Dada sy Neny a! Samy tiako ianareo, ka sady tsy hiaro an’i Dada aho no tsy hiaro an’i Neny. Aleo ianareo ihany no mandamina ny adinareo.”

Miresaha aminy. Lazao izay tsapanao rehefa miady izy ireo. Aza miresaka aminy anefa, raha tsy rehefa hitanao hoe vonona hihaino anao izy. Lazao moramora fa mampalahelo, na mahatezitra, na mampahatahotra anao mihitsy aza, ny mahita azy miady.—Ohabolana 15:23; Kolosianina 4:6.

Inona no tsy tokony hatao?

Aza mitady hanoro hevitra azy ireo. Mbola tanora ianao, ka tsy mahay mandamina ny adin’ny mpivady. Ity misy ohatra: Eritrereto hoe mitaingina fiaramanidina kely ianao. Mifamaly ny mpanamory azy io sy ny mpanampy azy. Azo inoana fa hatahotra ianao, ary rariny izany. Inona anefa no hitranga raha mihevi-tena ho mahay noho izy ireo ianao, ka ianao indray no miseho manoro azy ny fomba fitondrana fiaramanidina, na ianao mihitsy no mitady hitondra an’ilay izy?

Tsy ho voalamina mihitsy koa ny adin’ny ray aman-dreninao, raha ianao indray no mitady ‘hitondra’ ny tokantranony, ka miditra amin’ny adiny. Hoy ny Baiboly: “Miteraka ady fotsiny ny fiheveran-tena ho ambony, fa hendry kosa izay mila hevitra amin’ny hafa.” (Ohabolana 13:10) Azo inoana fa ho mora kokoa amin’izy mivady ny hifandamina, raha mifanazava mitokana izy.—Ohabolana 25:9.

Aza miditra amin’ilay ady. Efa mankarenin-tsofina ny mahare olona roa mifamaly, ka mainka moa fa olona telo? Marina fa te handamina mafy ny adin’ny ray aman-dreninao ianao. Tsy anjaranao anefa ny manao an’izany. Miezaha àry manaraka ilay torohevitry ny Baiboly hoe: ‘[Aza] mitsabaka amin’ny raharahan’ny hafa.’ (1 Tesalonianina 4:11) Aza miditra amin’ny adiny àry.

Aza manao izay hampiady azy. Ny ankizy mihitsy indraindray no manao izay hampiady ny ray aman-dreny. Rehefa tsy mamela azy hanao zavatra iray, ohatra, ny reniny, dia lasa izy midongy any amin’ny rainy mba havela hanao an’ilay izy. Marina fa mety hahazo izay tadiavinao ianao rehefa fetsifetsy toy izany. Tadidio anefa fa mampiady ray aman-dreny izany, rehefa mandeha ny fotoana, ary mety haharitra ela ny disadisa eo aminy.

Aza mitady hanafay ny ray aman-dreninao. Te hanafay ny rainy ny tanora iray atao hoe Pedro, ka nanao zavatra voararan’ny Baiboly. Hoy izy: “Te hanafay azy aho, satria tsy tiako maizina ny nanaovany an’i Neny sy nanaovany anay dahy.” Tsy maintsy nizaka ny vokatry ny ditrany anefa i Pedro. Inona no ianarantsika avy amin’izany? Raha maditra ianao, dia vao mainka hitombo ny olana ao an-tranonareo.—Galatianina 6:7.

Iza amin’ireo soso-kevitra tato amin’ity toko ity no hitanao hoe tena sarotra ampiharina? ․․․․․

Marina fa tsy azonao sakanana tsy hiady ny ray aman-dreninao. Matokia anefa fa afaka manampy anao tsy hitebiteby firy i Jehovah, rehefa miady izy ireo.—Filipianina 4:6, 7; 1 Petera 5:7.

Ataovy izay hanarahana ireo soso-kevitra etsy aloha ireo. Mety mba hiezaka handamina ny olana misy eo aminy ihany ny ray aman-dreninao, rehefa mandeha ny fotoana. Tsy hiady be intsony aza angamba izy roa.

ANDININ-TENY

‘Aoka ho teny mahafinaritra foana no holazainareo.’—Kolosianina 4:6.

SOSO-KEVITRA

Raha matetika loatra ny adin’ny ray aman-dreninao, na tafahoatra, dia ilazao moramora izy mba hitady olona hanoro hevitra azy.

FANTATRAO VE... ?

Mety tsy hitovy hevitra indraindray na dia ny olona mifankatia aza.

ZAVATRA ERITRERETIKO HATAO!

Izao no hataoko rehefa miady ny ray aman-dreniko: ․․․․․

Izao no holazaiko raha anontaniany aho hoe iza amin’izy mivady no diso: ․․․․․

Izao no hanontaniako ny ray aman-dreniko momba izany: ․․․․․

AHOANA NY HEVITRAO?

● Nahoana no miady ny ray aman-dreny sasany?

● Nahoana no tsy diso ianao raha miady izy ireo?

● Misy lesona azonao raisina ve, rehefa mahita azy ireo miady ianao? Inona izany?

[Teny notsongaina, pejy 201]

Tsy dia malahelo aho rehefa miady dada sy mamanay. Fantatro tsinona hoe mba manao fahadisoana koa ry zareo, sady manana ny manahirana azy.’’—Ravaka

[Efajoro/Sary, pejy 206, 207]

Nisaraka ve ny ray aman-dreninao?

Malahelo be ve ianao, fa nisaraka ny ray aman-dreninao? Inona no azonao atao mba tsy hanaovana zavatra mety hanenenana? Araho ireto soso-kevitra ireto:

● Aza manantena zavatra tsy hisy. Matetika ny ankizy no te hampihavana avy hatrany ny ray aman-dreniny, rehefa misaraka izy ireo. Hoy i Aina: “Mbola nentin’ny dada sy mamanay nandehandeha izahay indraindray, na dia efa nisaraka aza ry zareo. Nifampibitsibitsika foana izahay sy ny zokiko vavy hoe: ‘Andao mody handeha haingana, dia havelantsika irery ireo.’ Tsy nety anefa ilay tetikay. Mbola misaraka ry zareo hatramin’izao.”

Hoy ny Ohabolana 13:12: “Marary ny fo raha mihemotra foana ny fahatanterahan’ny zavatra antenaina.” Mba tsy hampalahelo anao loatra àry, dia tadidio fa tsy afaka manery ny ray aman-dreninao hanao izay tianao ianao. Tsy ianao koa no nahatonga azy hisaraka, ka tsy ho vitanao mihitsy ny hampihavana azy.—Ohabolana 26:17.

● Aza mankahala azy. Aza mitana lolompo na mankahala ny rainao na ny reninao, na izy roa. Hanimba anao izany. Nahatsiaro ny alahelony tamin’izy 12 taona i Faly. Hoy izy: “Tezitra be tamin’ny dadanay aho. Tsy vitan’izay fa tena nankahala azy aho, na dia tsy tiako aza ny miteny an’izany. Tsy azoko hoe naninona izy no nilaza fa tia anay, nefa nariany izahay.”

Matetika anefa no samy diso ny mpivady matoa misaraka. Mahalana ny hoe ny iray ihany no tena diso. Azo inoana fa tsy noresahin’ny ray aman-dreninao taminao daholo ny olana nisy teo amin’izy ireo, na ny antony nampisaraka azy. Na ry zareo aza angamba tsy mahalala tsara ny antony nisarahany. Aza maika hitsara azy àry. (Ohabolana 18:13) Marina fa tezitra be ianao noho ny nataony, ary rariny izany. Aza mitana lolompo anefa na mitady hamaly faty. Mety tsy ho afaka aminao intsony mantsy ireo toetra ratsy ireo. Tsy mahagaga raha milaza ny Baiboly hoe: “Ialao ny fahatezerana ary atsaharo ny fahavinirana.”—Salamo 37:8.

● Aza mamita-tena. Misy tanora tsy mankahala an’ilay rainy na reniny nanary azy, fa vao mainka kosa tia be azy. Mpisotro toaka sady adalam-behivavy, ohatra, ny rain’ny ankizilahy iray. Efa imbetsaka izy no nandao ny tokantranony, ary nisaraka tamin’ny vadiny mihitsy tamin’ny farany. Nilaza anefa ilay ankizilahy fa mbola tiany be foana ilay rainy!

Fahita ny zavatra toy izany. Miara-mipetraka amin’ny reniny ny ankamaroan’ny ankizy manana ray aman-dreny nisaraka. Afaka mitsidika ny rainy anefa izy ireo. Ilay reny no tsy maintsy mitaiza ny zanany. Lasa tsy manam-bola firy anefa izy, na dia mahazo vola avy amin’ilay rain-janany ihany aza. Ilay ray kosa lasa be vola kokoa. Inona no vokany? Satrin’ny ankizy ho any amin’ny rainy, satria mahazo zavatra be dia be izy any, sady afaka mifalifaly! Tsy tiany kosa ny miara-mipetraka amin’ny reniny, satria tsy maintsy mihafy izy, sady voafehifehy. Mampalahelo fa nisy ankizy nandao ny reniny kristianina, mba hipetraka any amin’ny rainy tsy kristianina. Manam-bola kokoa mantsy ilay rainy, sady mamela azy hanao izay tiany.—Ohabolana 19:4.

Te hanao an’izany koa ve ianao? Eritrereto tsara aloha hoe inona no zavatra tena ilainao. Tadidio fa mila fananarana sy torohevitra momba ny fitondran-tena ianao. Ireo no hanampy anao ho tsara toetra sy hanana hoavy sambatra. Tsy misy zava-tsarobidy noho ireo, azon’ny ray aman-dreny omena ny zanany.—Ohabolana 4:13.

[Sary, pejy 202, 203]

Toy ny hoe mpandeha fiaramanidina manoro izay tokony hataon’ny mpanamory ianao, raha mitady hanoro ny ray aman-dreninao hoe ahoana no handaminany ny adiny