Lasa nahalala ny fahamarinana ianao rehefa nianatra Baiboly tamin’ny Vavolombelon’i Jehovah. Azo antoka fa nahatonga anao hifandray akaiky amin’Andriamanitra ny zavatra nianaranao. Lasa manantena koa ianao hoe ho lasa paradisa ny tany rehefa hanjaka ny Fanjakan’Andriamanitra, ary ho betsaka ny fitahiana. Vao mainka ianao mino ny Tenin’Andriamanitra, ary mahazo fitahiana be dia be noho ianao miaraka amin’ny fiangonana. Lasa hitanao koa hoe ahoana ny fomba itondran’i Jehovah ny vahoakany ankehitriny.​—Zak. 8:23.

Miomana ho amin’ny batisa ianao izao, ka tsara raha mamerina mandinika an’ireo zavatra inoantsika Kristianina miaraka amin’ny anti-panahy. (Heb. 6:1-3) I Jehovah anie hitahy foana ny ezaka ataonao mba hahafantaranao azy, sady hamaly soa anao araka ny efa nampanantenainy.​—Jaona 17:3.

1. Nahoana ianao no te hatao batisa?

2. Iza moa i Jehovah?

• “I Jehovah no tena Andriamanitra any amin’ny lanitra ambony sy etỳ amin’ny tany ambany. Tsy misy afa-tsy izy.”​—Deot. 4:39.

• “Ianao irery ihany, ilay manana anarana hoe Jehovah, no Avo Indrindra manerana ny tany manontolo!”​—Sal. 83:18.

3. Nahoana no zava-dehibe aminao ny mampiasa ny anaran’Andriamanitra?

• “Hoatr’izao àry lazaina rehefa mivavaka: ‘Rainay izay any an-danitra, hohamasinina anie ny anaranao!’”​—Mat. 6:9.

• “Izay rehetra miantso ny anaran’i Jehovah no hovonjena.”​—Rom. 10:13.

4. Milazà teny vitsivitsy ilazana an’i Jehovah ao amin’ny Baiboly.

• “Andriamanitra mandrakizay i Jehovah, ilay Mpamorona ny faran’ny tany.”​—Isaia 40:28.

• “Rainay izay any an-danitra.”​—Mat. 6:9.

• “Andriamanitra dia fitiavana.”​—1 Jaona 4:8.

5. Inona no azonao omena an’i Jehovah Andriamanitra?

• “Tiavo i Jehovah Andriamanitrao amin’ny fonao manontolo sy ny tenanao manontolo sy ny sainao manontolo ary ny herinao manontolo.”​—Mar. 12:30.

• “I Jehovah Andriamanitrao no tsy maintsy iankohofanao, ary izy irery ihany no tsy maintsy tompoinao.”​—Lioka 4:8.

6. Nahoana ianao no tsy te hivadika amin’i Jehovah?

• “Hendre, anaka, ary ampifalio ny foko, mba hamaliako an’ilay manaratsy ahy.”​—Ohab. 27:11.

7. Amin’iza ianao no mivavaka, ary ataonao amin’ny anaran’iza?

• “Lazaiko [Jesosy] marimarina aminareo fa na inona na inona angatahinareo amin’ny Ray, dia homeny anareo amin’ny anarako izany.”​—Jaona 16:23.

8. Inona ny zavatra sasany azonao angatahina amin’ny vavaka?

• “Hoatr’izao àry lazaina rehefa mivavaka: ‘Rainay izay any an-danitra, hohamasinina anie ny anaranao! Ho tonga anie ny Fanjakanao! Hatao etỳ an-tany anie ny sitraponao, tahaka ny any an-danitra! Omeo anay anio izay sakafo sahaza anay anio, ary mamelà ny helokay, tahaka ny namelanay izay meloka taminay. Ary aza avela ho resin’ny fakam-panahy izahay, fa afaho amin’ilay ratsy.’”​—Mat. 6:9-13.

• “Izao ny toky ananantsika momba an’Andriamanitra: Na inona na inona angatahintsika aminy ka mifanaraka amin’ny sitrapony, dia mihaino antsika izy.”​—1 Jaona 5:14.

9. Inona no mety hahatonga an’i Jehovah tsy hihaino ny vavaka ataon’ny olona iray?

• “Hiantso vonjy amin’i Jehovah izy ireo ... nefa tsy hamaly izy ... satria manao ratsy izy ireo.”​—Mika 3:4.

• “Ny mason’i Jehovah mitsinjo ny olo-marina, ary ny sofiny mihaino ny fitalahoany. Manohitra an’izay manao ratsy kosa i Jehovah.”​—1 Pet. 3:12.

10. Iza moa i Jesosy Kristy?

• “Dia namaly i Simona Petera hoe: ‘Ianao no Kristy, Zanak’ilay Andriamanitra velona.’”​—Mat. 16:16.

11. Nahoana i Jesosy no tonga tetỳ an-tany?

• “Tsy tonga mba hotompoina [ny Zanak’olona] fa mba hanompo, ka hanome ny ainy ho vidim-panavotana ho takalon’ny maro.”​—Mat. 20:28.

• “Tsy maintsy mitory ny vaovao tsaran’ny Fanjakan’Andriamanitra any amin’ny tanàna hafa koa aho [Jesosy], fa izany no nanirahana ahy.”​—Lioka 4:43.

12. Ahoana no ampisehoanao hoe mankasitraka ny sorona nataon’i Jesosy ianao?

• “Maty ho an’ny rehetra izy, mba tsy ho velona ho an’ny tenany intsony izay velona, fa ho an’ilay efa maty ho azy ireo sady efa natsangana.”​—2 Kor. 5:15.

13. Inona ny fahefana ananan’i Jesosy?

• “Efa nomena ahy ny fahefana rehetra any an-danitra sy etỳ an-tany.”​—Mat. 28:18.

• “Izany mihitsy no nahatonga an’Andriamanitra hanandratra azy ho amin’ny toerana ambony kokoa, sady hanome azy amin-katsaram-panahy anarana ambony kokoa noho ny anarana hafa rehetra.”​—Fil. 2:9.

14. Mino ve ianao hoe ny Filan-kevi-pitantanan’ny Vavolombelon’i Jehovah “ilay mpanompo mendri-pitokisana sy malina” notendren’i Jesosy?

• “Iza tokoa moa ilay mpanompo mendri-pitokisana sy malina izay notendren’ny tompony hikarakara an’ireo mpanompo ao an-tranony, ka hanome sakafo azy ireo amin’ny fotoana mety?”​—Mat. 24:45.

15. Olona ve ny fanahy masina?

• “Fa hoy ilay anjely: ‘Ho tonga aminao ny fanahy masina ary hanarona anao ny herin’ny Avo Indrindra. Izany no antony hiantsoana an’ilay haterakao hoe masina, Zanak’Andriamanitra.’”​—Lioka 1:35.

• “Koa raha ianareo, na dia ratsy fanahy aza, mahalala manome zavatra tsara ho an’ny zanakareo, mainka fa ilay Ray any an-danitra! Tena hanome ny fanahy masina ho an’izay mangataka aminy izy.”​—Lioka 11:13.

16. Ahoana no nampiasan’i Jehovah ny fanahiny masina?

• “Ny tenin’i Jehovah no nampisy ny lanitra, ary ny fofonain’ny vavany no nampisy ny zava-drehetra eny.”​—Sal. 33:6.

• “Hahazo hery kosa ianareo rehefa tonga aminareo ny fanahy masina, ka ho vavolombeloko ... any amin’ny faritra lavitra indrindra eto an-tany ianareo.”​—Asa. 1:8.

• “Tsy avy amin’ny hevitr’olombelona ny faminaniana rehetra ao amin’ny Soratra Masina. Tsy noho ny sitrapon’olombelona na oviana na oviana mantsy no nampisy ny faminaniana, fa teny avy amin’Andriamanitra kosa no nolazain’ny olona, araka izay nitarihan’ny fanahy masina azy.”​—2 Pet. 1:20, 21.

17. Inona moa ny Fanjakan’Andriamanitra?

• “Hanangana fanjakana iray ilay Andriamanitry ny lanitra. Tsy ho rava mihitsy izy io sady tsy homena olon-kafa. Dia hotorotoroin’io fanjakana io sy hofoanany ireo fanjakana rehetra ireo, fa izy irery ihany no haharitra mandrakizay.”​—Dan. 2:44.

18. Inona ny zavatra hataon’ny Fanjakan’Andriamanitra ho anao?

• “Hofafany ny ranomaso rehetra amin’ny mason’izy ireo, ary tsy hisy intsony ny fahafatesana, sady tsy hisy intsony ny alahelo na ny fitarainana na ny fanaintainana, fa efa lasa ny zavatra taloha.”​—Apok. 21:4.

19. Ahoana no ahafantaranao fa efa kely sisa ny Fanjakan’Andriamanitra dia hitondra fitahiana ho antsika?

• “Nanatona azy mitokana ny mpianany, ka niteny hoe: ‘Lazao aminay hoe rahoviana no hitranga izany, ary inona no ho famantarana hoe efa manatrika ianao ary efa akaiky ny faran’izao tontolo izao?’ Dia namaly azy ireo i Jesosy hoe: ‘... Hisy firenena hiady amin’ny firenena, ary hisy fanjakana hiady amin’ny fanjakana. Ary hisy mosary sy horohoron-tany any amin’ny toerana samihafa. Ary hotorina maneran-tany ity vaovao tsaran’ilay Fanjakana ity, ho vavolombelona amin’ny firenena rehetra, vao ho tonga ny farany.’”​—Mat. 24:3, 4, 7, 14.

• “Amin’ny andro farany, dia hisy fotoan-tsarotra tsy mora atrehina. Fa ny olona ho tia tena, ho tia vola, hieboebo, hanambony tena, ho mpanevateva, tsy hankatò ray aman-dreny, tsy hahay hankasitraka, ho mora mivadika, tsy ho tia ny mpianakaviny, tsy ho azo ifanarahana, ho mpanendrikendrika, tsy hahafehy tena, ho masiaka be, tsy ho tia ny tsara, ho mpamadika, ho mafy loha, hirehareha, ho tia fahafinaretana fa tsy ho tia an’Andriamanitra, hoatran’ny hoe mpivavaka be ny fahitana azy nefa tsy misy heriny eo amin’ny fiainany ny maha mpivavaka azy.”​—2 Tim. 3:1-5.

20. Ahoana no ampisehoanao hoe zava-dehibe aminao ilay Fanjakana?

• “Katsaho foana àry aloha ilay Fanjakana sy ny fahamarinan’Andriamanitra.”​—Mat. 6:33.

• “Hoy i Jesosy tamin’ny mpianany avy eo: ‘Raha misy te hanaraka ahy, dia tsy maintsy mandà ny tenany izy ka mitondra ny hazo fijaliany ary manaraka ahy foana.’”​—Mat. 16:24.

21. Iza moa i Satana sy ny demonia?

• “Avy amin’ny Devoly rainareo ianareo ... Efa mpamono olona hatrany am-boalohany izy.”​—Jaona 8:44.

• “Natsipy mafy ilay dragona lehibe, ilay menarana tany am-boalohany, ilay antsoina hoe Devoly sy Satana, izay mamitaka ny tany manontolo. Natsipy mafy tetỳ an-tany izy, ary ny anjeliny koa niara-natsipy taminy.”​—Apok. 12:9.

22. Inona no niampangan’i Satana an’i Jehovah sy izay rehetra manompo azy?

• “Hoy ilay vehivavy tamin’ilay menarana: ‘Mahazo mihinana ny voan’ireo hazo ato amin’ny zaridaina izahay ka! Efa niteny anefa Andriamanitra momba ny voan’ilay hazo eo afovoan’ny zaridaina hoe: “Aza mihinana amin’io ianareo, ary aza mikitika an’io, fa raha tsy izany dia ho faty ianareo.”’ Dia hoy ilay menarana tamin’ilay vehivavy: ‘Tsy ho faty ianareo ka! Fa fantatr’Andriamanitra fa amin’ny andro ihinananareo ny voan’io hazo io, dia hahiratra ny masonareo, ary ho tahaka an’Andriamanitra ianareo ka hahalala ny tsara sy ny ratsy.’”​—Gen. 3:2-5.

• “Namaly an’i Jehovah i Satana hoe: ‘Hoditra solon’ny hoditra! Hanome an’izay ananany rehetra ny olona mba hiarovana ny ainy.’”​—Joba 2:4.

23. Ahoana no ampisehoanao hoe diso ny fiampangan’i Satana?

• “Manompoa [an’Andriamanitra] amin’ny fo manontolo.”​—1 Tan. 28:9.

• “Tsy hanaiky hivadika mihitsy aho mandra-pahafatiko.”​—Joba 27:5.

24. Nahoana ny olona no maty?

• “Tahaka ny nidiran’ny ota teo amin’izao tontolo izao noho ny nataon’ny lehilahy iray, ary ny ota no nahatonga ny fahafatesana, ka niely tamin’ny olona rehetra ny fahafatesana, satria samy efa nanota izy rehetra.”​—Rom. 5:12.

25. Manao ahoana ny olona rehefa maty?

• “Fantatry ny velona hoe ho faty izy, fa ny maty kosa tsy mahalala na inona na inona.”​—Mpito. 9:5.

26. Inona no fanantenana ho an’ireo olona efa maty?

• “Hatsangan’Andriamanitra ny marina sy ny tsy marina.”​—Asa. 24:15.

27. Firy ny olona hiara-manjaka amin’i Jesosy any an-danitra?

• “Hitako ny Zanak’ondry nitsangana teo amin’ny Tendrombohitra Ziona. Nisy 144 000 niaraka taminy, ary nisoratra teo amin’ny handrin’izy ireo ny anaran’ny Zanak’ondry sy ny anaran’ny Rainy.”​—Apok. 14:1.

Rehefa nianatra Baiboly ianao, dia lasa nahalala ny zavatra takin’i Jehovah aminao. Fantatrao koa hoe ahoana no hanarahana ny fitsipiny. Nampihatra ny zavatra nianaranao ianao, ka mety ho efa nanova ny fitondran-tenanao sy ny fomba fiainanao. Efa tapa-kevitra ny hanaraka ny fitsipik’i Jehovah foana ianao izao, ka azony ekena ny fanompoana ataonao rehefa mitory ny vaovao tsara ianao.

Hanampy anao hisaintsaina foana ny zavatra takin’i Jehovah aminao ity famerenana ity. Hampahatsiahivina ato ireo zavatra sasany tokony hataonao mba hahazoanao sitraka aminy. Hazavaina ato fa zava-dehibe ny manana feon’ny fieritreretana madio sy ny manome voninahitra an’i Jehovah amin’izay rehetra atao.​—2 Kor. 1:12; 1 Tim. 1:19; 1 Pet. 3:16, 21.

Efa betsaka izao ny zavatra nianaranao, ka azo antoka hoe vonona hankatò ny fitsipik’i Jehovah ianao ary te ho anisan’ny fandaminany. Misy fanontaniana sy andinin-teny ato hanampy anao handinika hoe ahoana izany manaiky ny lamina apetrak’i Jehovah izany, na eo anivon’ny fiangonana, na ao an-trano, na rehefa mifandray amin’ny manam-pahefana eto amin’izao tontolo izao. Vao mainka ianao hankasitraka ny fandaharana ataon’i Jehovah mba hampianarana sy hanatanjahana ny finoan’ny vahoakany, anisan’izany ny fivorian’ny fiangonana. Hivory foana sy handray anjara amin’izany ianao raha mbola mamela anao hanao an’izany ny toe-javatra misy anao.

Horesahina ato amin’ity fizarana ity koa hoe tena zava-dehibe ny mandeha mitory foana, ka manampy ny olona hahafantatra an’i Jehovah sy ny zavatra ataony ho an’ny olombelona. (Mat. 24:14; 28:19, 20) Ankoatra izay, dia hanampy anao izy ity mba hahatakatra hoe tena zava-dehibe ny fanokanan-tenanao sy ny batisanao. Matokia fa tena faly i Jehovah mahita ny zavatra ataonao mba hampisehoana hoe ankasitrahanao ny hatsaram-panahy miavaka asehony aminao.

1. Inona ny fitsipik’Andriamanitra momba ny fanambadiana? Inona ihany no antony azo isarahana raha jerena ny Soratra Masina?

• “Angaha mbola tsy novakinareo fa ilay namorona ny olona tany am-piandohana, dia nanao azy ho lahy sy vavy, ka nilaza hoe: ‘Noho izany, dia handao ny rainy sy ny reniny ny lehilahy ka hikambana amin’ny vadiny, ary ho nofo iray ihany izy roa’? Koa tsy roa intsony izy ireo, fa nofo iray ihany. Aoka àry izay nampiraisin’Andriamanitra zioga, tsy hosarahin’olona. ... Izay lehilahy misaraka amin’ny vadiny ka manambady olon-kafa, dia manitsakitsa-bady, raha tsy hoe noho ny fijangajangana ihany angaha no antony isarahany.”​—Mat. 19:4-6, 9.

2. Nahoana no tokony ho vita soratra ara-dalàna ny lehilahy sy vehivavy miara-mipetraka toy ny mpivady? Efa vita soratra ara-dalàna ve ianareo mivady (raha manambady ilay mpitory)?

• “Ampahatsiahivo foana izy ireo mba hanaiky sy hankatò ny fanjakana sy ny manam-pahefana.”​—Tit. 3:1.

• “Aoka ho mendri-kaja amin’ny olona rehetra ny fanambadiana, ary aza avela ho voaloto ny fandrianan’ny mpivady, fa homelohin’Andriamanitra ny mpijangajanga sy ny mpanitsakitsa-bady.”​—Heb. 13:4.

3. Inona no andraikitrao eo anivon’ny fianakaviana?

• “Henoy, anaka, ny anatry ny rainao, ary aza lavina ny tenin’ny reninao.”​—Ohab. 1:8.

• “Ny lehilahy no lohan’ny vadiny, hoatran’i Kristy izay lohan’ny fiangonana ... Ry lehilahy, tiavo foana ny vadinareo, tahaka ny nitiavan’i Kristy ny fiangonana.”​—Efes. 5:23, 25.

• “Ianareo ray, aza mampahatezitra ny zanakareo, fa tezao foana araka izay anatra omen’i Jehovah sy izay atorony izy.”​—Efes. 6:4.

• “Ianareo zanaka, ankatoavy amin’ny zava-drehetra ny ray aman-dreninareo, fa izany no mampifaly ny Tompo.”​—Kol. 3:20.

• “Ianareo vehivavy, maneke ny vadinareo.”​—1 Pet. 3:1.

4. Nahoana isika no tokony hanaja ny aina?

• “[Andriamanitra] no manome ho an’ny olon-drehetra ny aina sy ny fofonaina ary ny zava-drehetra. ... Matoa isika velona sy mihetsika ary misy, dia noho izy.”​—Asa. 17:25, 28.

5. Nahoana isika no tsy tokony hamono olona, anisan’izany ny zaza any am-bohoka?

• “Raha misy olona miady ka mahavoa vehivavy bevohoka, ary ... raha misy maty ..., dia tsy maintsy manome aina ho solon’ny aina ianao.”​—Eks. 21:22, 23.

• “Nahita ahy ny masonao na dia mbola vao niforona aza aho; voasoratra tao amin’ny bokinao ny faritra rehetra amin’ny vatako sy ny andro niforonan’ireny, tamin’ny mbola tsy nisy akory ireny na iray aza.”​—Sal. 139:16.

• “Halan’i Jehovah ... ny tanana mandatsaka ran’olona tsy manan-tsiny.”​—Ohab. 6:16, 17.

6. Inona ny didin’Andriamanitra momba ny ra?

• “[Fadio] ny ra, sy ny biby nokendaina.”​—Asa. 15:29.

7. Nahoana isika no tokony ho tia ny mpiara-manompo amintsika?

• “Izao no didy vaovao omeko anareo: Mifankatiava ianareo, ka hoatran’ny nitiavako anareo no tokony mba hifankatiavanareo koa. Raha mifankatia ianareo, dia izany no hahafantaran’ny olona rehetra fa mpianatro ianareo.”​—Jaona 13:34, 35.

8. Mba tsy hamindrana aretina mety hahafaty, nahoana ny olona iray voan’ny areti-mifindra no tokony a) tsy hanao fihetsika maneho fitiavana, toy ny hoe mifamihina amin’olona na manoroka? b) tsy ho tezitra rehefa tsy ampandrosoin’ny olona ao an-tranony? d) hanao fitsirihana ra, alohan’ny hiarahany amin’ny olona iray tiany hovadina? e) hiresaka amin’ny anti-panahy mpandrindra alohan’ny hanaovana batisa azy?

• “Aza avela hisy trosan’olona mihitsy any aminareo, afa-tsy ny fifankatiavanareo ihany. ... ‘Tiavo ny namanao tahaka ny tenanao.’ Tsy mba manisy ratsy ny namany izay manam-pitiavana.”​—Rom. 13:8-10.

• “Aza mitady izay hahasoa ny tenanareo fotsiny, fa izay hahasoa ny hafa koa.”​—Fil. 2:4.

9. Nahoana isika no tian’i Jehovah hamela ny heloky ny hafa?

• “Mahaiza foana mifandefitra sy mifamela heloka tanteraka, na dia misy manana antony itarainana momba ny sasany aza. Namela tanteraka ny helokareo i Jehovah, ka mba manaova hoatr’izany koa ianareo.”​—Kol. 3:13.

10. Inona no tokony hataonao raha misy mpiara-manompo manendrikendrika anao na misoloky anao?

• “Raha manota ny rahalahinao, dia mankanesa any aminy, ka rehefa mitokana ianareo, dia ampahafantaro azy ny fahadisoany. Raha mihaino anao izy, dia efa nahatafarina ny rahalahinao ianao. Raha tsy mihaino kosa izy, dia mitondrà olona iray na roa miaraka aminao, mba ho azo antoka ny zava-drehetra, noho ny tenin’ny vavolombelona roa na telo. Raha tsy mihaino an’ireo izy, dia miresaha amin’ny fiangonana. Raha mbola tsy mihaino ny fiangonana koa izy, dia ataovy toy ny olon’izao tontolo izao sy toy ny mpamory hetra.”​—Mat. 18:15-17.

11. Ahoana no fiheveran’i Jehovah an’ireto fahotana ireto?

▪ Fijangajangana

▪ Fampiasana sary rehefa mivavaka

▪ Firaisan’ny samy lehilahy na ny samy vehivavy

▪ Halatra

▪ Filokana

▪ Fimamoana

• “Aza manaiky ho voafitaka ianareo. Fa ny mpijangajanga, ny mpanompo sampy, ny mpanitsakitsa-bady, ny lehilahy manaiky hanaovan’ny lehilahy firaisana, ny lehilahy miray amin’ny lehilahy, ny mpangalatra, ny olona manana faniriana tsy mety afa-po, ny mamo lava, ny mpanevateva, ary ny mpanao an-keriny, dia tsy handova ny Fanjakan’Andriamanitra.”​—1 Kor. 6:9, 10.

12. Anisan’ny fijangajangana ny karazana firaisana rehetra ataon’ny olona tsy mpivady. Tapa-kevitra ny hanao inona ianao momba an’izany?

• “Andosiro ny fijangajangana!”​—1 Kor. 6:18.

13. Nahoana isika no tsy tokony hampiasa zava-mahadomelina na fanafody mahadomelina tsy avy amin’ny dokotera?

• “[Atolory] ho sorona velona sy masina ary ankasitrahan’Andriamanitra ny tenanareo. Manao fanompoana masina ianareo amin’izany sady mampiasa tsara ny sainareo. Ary aza manaiky hovolavolain’izao tontolo izao intsony. Fa miovà kosa ka havaozy ny sainareo mba hamantaranareo tsara ny sitrapon’Andriamanitra, izay tsara sy tena mety ary tonga lafatra.”​—Rom. 12:1, 2.

14. Milazà fanao sasany misy ifandraisany amin’ny demonia ary raran’Andriamanitra.

• “Tsy tokony hisy eo aminao mihitsy ny olona ... manao sikidy, na mampiasa herin’ny maizina, na mitady fambara, na milalao ody, na mamosavy, na mankany amin’ny mpamoha angatra na mpilaza ny hoavy, na olona manontany amin’ny maty.”​—Deot. 18:10, 11.

15. Raha nanao fahotana lehibe ny olona iray, inona no tokony hataony haingana raha te hahazo sitraka amin’i Jehovah indray izy?

• “Niaiky ny fahotako teo anatrehanao aho ...; tsy mba nosarontsaronako ny fahadisoako. Hoy aho: ‘Hiaiky ny heloko eo anatrehan’i Jehovah aho.’”’”​—Sal. 32:5.

• “Misy marary ve aminareo? Aoka izy hiantso ny anti-panahin’ny fiangonana. Dia aoka ry zareo hivavaka ho azy sy hanosotra menaka azy amin’ny anaran’i Jehovah. Fa hanasitrana an’ilay marary ny vavaka atao amim-pinoana, ary hanarina azy i Jehovah. Raha nanota koa izy, dia havela ny helony.”​—Jak. 5:14-15.

16. Inona no tokony hataonao raha misy Kristianina fantatrao hoe nanao fahotana lehibe?

• “Raha misy aminareo nahita olona nanao ratsy, na mahafantatra ny nataon’ilay olona, na vavolombelon’izany, ary naheno antso avo mba hijoro ho vavolombelona nefa tsy milaza an’izay fantany, dia manota izy ka hizaka ny vokatry ny fahadisoany.”​—Lev. 5:1.

17. Raha misy fampandrenesana hoe tsy Vavolombelon’i Jehovah intsony ny olona iray, inona no tokony hataonao?

• “[Aza mifanerasera] intsony amin’izay antsoina hoe rahalahy nefa mpijangajanga, na manana faniriana tsy mety afa-po, na mpanompo sampy, na mpanevateva, na mamo lava, na mpanao an-keriny. Aza atao na dia ny miara-misakafo amin’ny olona hoatr’izany aza.”​—1 Kor. 5:11.

• “Raha misy tonga eo aminareo ka tsy mampianatra an’izany fampianarana izany, dia aza mampiantrano na miarahaba azy akory.”​—2 Jaona 10.

18. Nahoana no hoe izay olona tia an’i Jehovah ihany no tokony hataonao namana akaiky?

• “Ho hendry izay miaraka amin’ny hendry, fa hahita loza kosa izay minamana amin’ny tsisy saina.”​—Ohab. 13:20.

• “Aza manaiky ho voafitaka ianareo. Manimba ny fahazarana mahasoa ny naman-dratsy.”​—1 Kor. 15:33.

19. Nahoana no tsy manao politika ny Vavolombelon’i Jehovah?

• “Tsy anisan’izao tontolo izao izy, hoatr’ahy [Jesosy] tsy anisan’izao tontolo izao.”​—Jaona 17:16.

20. Nahoana ianao no tokony hankatò ny fitondram-panjakana?

• “Aoka ny olona rehetra samy hanaiky ny manam-pahefana, fa avy amin’Andriamanitra daholo ny fahefana rehetra. Andriamanitra mantsy no namela ny manam-pahefana ho eo amin’ny toerany avy.”​—Rom. 13:1.

21. Inona no hataonao raha misy lalàn’olombelona mifanohitra amin’ny lalàn’Andriamanitra?

• “Andriamanitra no mpitondra anay ka izy no tsy maintsy ankatoavinay, fa tsy olona.”​—Asa. 5:29.

22. Inona ny andinin-teny afaka manampy anao ho tapa-kevitra ny tsy ho anisan’izao tontolo izao rehefa mifidy asa?

• “Tsy hifamely amin’ny sabatra intsony ireo firenena, sady tsy hianatra ady intsony.”​—Mika 4:3.

• “Mivoaha avy ao aminy [Babylona Lehibe], ianareo vahoakako, raha tsy tianareo ny hiray tsikombakomba aminy amin’izay fahotana nataony, ary raha tsy tianareo hahazo anareo ny loza hanjo azy.”​—Apok. 18:4.

23. Inona no karazana fialam-boly hataonao, ary inona no tsy hataonao?

• “Mankahala an’izay tia herisetra [i Jehovah].”​—Sal. 11:5.

• “Ankahalao ny ratsy, mifikira amin’ny tsara.”​—Rom. 12:9.

• “Na inona na inona marina, na inona na inona zava-dehibe, na inona na inona mety, na inona na inona madio, na inona na inona mahatehotia, na inona na inona tsara laza, na inona na inona mendrika, ary na inona na inona mendri-piderana, dia izany foana saintsainina.”​—Fil. 4:8.

24. Nahoana ny Vavolombelon’i Jehovah no tsy manao fivavahana iraisam-pinoana?

• “Tsy azonareo atao ny mihinana amin’ny ‘latabatr’i Jehovah’ sady mihinana amin’ny latabatry ny demonia.”​—1 Kor. 10:21.

• “‘Misaraha aminy’, hoy i Jehovah, ‘ary aza mikasika intsony an’izay maloto’, ‘dia handray anareo aho.’”​—2 Kor. 6:17.

25. Inona no torolalana hanampy anao hanapa-kevitra hoe handray anjara amin’ny fety iray sa tsia?

• “Nifangaroharo tamin’ireo firenena kosa izy ireo, ka nanaraka ny fanaony. Notompoin’izy ireo ny sampin’ireny, ka lasa fandrika ho azy.”​—Sal. 106:35, 36.

• “Ny maty ... tsy mahalala na inona na inona.”​—Mpito. 9:5.

• “Tsy anisan’izao tontolo izao izy, hoatr’ahy tsy anisan’izao tontolo izao.”​—Jaona 17:16.

• “Ampy izay ny fotoana nanaovanareo ny sitrapon’izao tontolo izao, tamin’ianareo nanana fitondran-tena tsy misy henatra, nanaram-po tamin’ny filan’ny nofo, nisotro tafahoatra, nanao fety tsy voafehy, nifaninana nisotro, ary nanao fanompoan-tsampy maharikoriko.”​—1 Pet. 4:3.

26. Nahoana ny tantaran’olona ao amin’ny Baiboly no manampy anao hanapa-kevitra hoe hankalaza aniversera sa tsia?

• “Tamin’ny andro fahatelo, dia nitsingerina ny andro nahaterahan’i Farao. Dia nanao fety ho an’ny mpanompony rehetra izy, ka navoakany ny lehiben’ny mpandroso zava-pisotro sy ny lehiben’ny mpanao mofo mba ho hitan’ny mpanompony. Naveriny tamin’ny toerany ilay lehiben’ny mpandroso zava-pisotro ... Fa nahantony kosa ilay lehiben’ny mpanao mofo.”​—Gen. 40:20-22.

• “Rehefa nankalazaina ny fitsingerenan’ny andro nahaterahan’i Heroda, dia nandihy tamin’ilay fety ny zanakavavin’i Herodiasy. Dia faly be i Heroda, ka nianiana fa homeny an’ilay tovovavy daholo izay angatahiny. Nampirisihin’ny reniny anefa ilay tovovavy ka niteny hoe: ‘Ento atỳ amiko eo ambony vilia ny lohan’i Jaona Mpanao Batisa.’ Koa naniraka olona hanapaka ny lohan’i Jaona tao am-ponja izy.”​—Mat. 14:6-8, 10.

27. Nahoana ianao no te hankatò ny tari-dalana omen’ny anti-panahy?

• “Ankatoavy sy ekeo ireo mitarika eo aminareo. Miahy anareo foana mantsy izy ireny, toy ny olona mbola hatao ampamoaka. Amin’izay dia ho faly izy ireny rehefa manao an’izany fa tsy hisento, satria tsy hahasoa anareo izany.”​—Heb. 13:17.

28. Nahoana no tena ilainao sy ny fianakavianao ny manokana fotoana tsy tapaka mba hamakiana sy hianarana Baiboly?

• “Ny lalàn’i Jehovah no mahafinaritra azy, ary ny lalàny no vakiny sy saintsaininy andro aman’alina. Ho toy ny hazo nambolena eo amoron’ny rano mikoriana izy, dia hazo mamoa amin’ny fotoanany, sady tsy mba malazo ny raviny. Ary hety tsara daholo izay ataony.”​—Sal. 1:2, 3.

29. Nahoana ianao no tia manatrika fivoriana sy mandray anjara amin’izany?

• “Hanambara ny anaranao amin’ny rahalahiko aho; eo anivon’ny fiangonana no hiderako anao.”​—Sal. 22:22.

• “Andao ... isika hifampiahy mba hifandrisika hampiseho fitiavana sy hanao asa tsara, ka tsy hahafoy ny fiarahantsika mivory, hoatran’ny sasany efa zatra tsy mivory, fa hifampahery kosa. Vao mainka tokony hanao an’izany isika, satria hitanareo fa mihamanakaiky ilay andro.”​—Heb. 10:24, 25.

30. Inona no asa lehibe indrindra nampanaovin’i Jesosy antsika?

• “Mandehana àry, ampianaro ny olona any amin’ny firenena rehetra mba ho lasa mpanara-dia ahy. Ataovy batisa ... izy ireo, sady ampianaro hankatò an’izay rehetra nandidiako anareo.”​—Mat. 28:19, 20.

31. Inona no toe-tsaina mampifaly an’i Jehovah rehefa manao fanomezana ho an’ny asan’ilay Fanjakana isika na manampy an’ireo mpiara-manompo amintsika?

• “Manomeza voninahitra an’i Jehovah amin’ireo zava-tsarobidy anananao.”​—Ohab. 3:9.

• “Aoka ny tsirairay samy hanao araka izay fanapahan-keviny tao am-pony, tsy amin’alahelo na an-tery, fa ny mpanome amim-pifaliana no tian’Andriamanitra.”​—2 Kor. 9:7.

32. Inona no zava-tsarotra efa ampoizin’ny Kristianina?

• “Sambatra izay enjehina noho ny fahamarinana, fa azy ny Fanjakan’ny lanitra. Sambatra ianareo raha haratsin’ny olona sy enjehiny ary amoronany lainga hoe nanao an’izao zava-dratsy rehetra izao noho ny amiko. Mifalia sy miravoravoa, satria lehibe ny valisoanareo any an-danitra. Efa nenjehiny hoatr’izany koa mantsy ny mpaminany talohanareo.”​—Mat. 5:10-12.

33. Nahoana no tombontsoa miavaka ny hoe vita batisa ka lasa Vavolombelon’i Jehovah?

• “Naharavoravo ahy ny teninao sady nahafaly ny foko. Fa mitondra ny anaranao aho, ry Jehovah Andriamanitry ny tafika ô!”​—Jer. 15:16.

Matetika no misy batisa amin’ny fivoriamben’ny faritra na vondrom-paritra ataon’ny Vavolombelon’i Jehovah. Rehefa hifarana ny lahatenin’ny batisa, dia asain’ilay mpandahateny hitsangana ireo hatao batisa, ka asainy hamaly mafy an’ireto fanontaniana roa ireto:

1. Efa nibebaka tamin’ireo fahotanao sy nanokan-tena ho an’i Jehovah ve ianao, ary mampiseho fa ekenao ny famonjeny amin’ny alalan’i Jesosy Kristy?

2. Mazava aminao ve fa rehefa atao batisa ianao, dia lasa Vavolombelon’i Jehovah sady lasa anisan’ny fandaminany?

Rehefa mamaly hoe “Eny” ireo hatao batisa, dia “miresaka amin’ny olona ny zavatra inoany” na manao fanambarana ampahibemaso hoe mino ny vidim-panavotana izy sady nanokan-tena tanteraka ho an’i Jehovah. (Rom. 10:9, 10) Mila mivavaka sy misaintsaina mialoha an’ireo fanontaniana ireo izy, mba ho resy lahatra tsara rehefa hamaly an’ireo.

Efa nanokan-tena ho an’i Jehovah tamin’ny alalan’ny vavaka ve ianao, ka nampanantena hoe izy irery ihany no hotompoinao ary ny sitrapony no ho zava-dehibe indrindra eo amin’ny fiainanao?

Tena resy lahatra ve ianao hoe tokony hatao batisa raha vao misy hirika hanaovana an’izany?

Hoatran’ny ahoana ny fitafiana mety rehefa hatao batisa? (1 Tim. 2:9, 10; Jaona 15:19; Fil. 1:10)

Tokony ho hita amin’ny fomba fiakanjontsika hoe “maotina” sy ‘misaina tsara’ isika, ka ho hita fa “mpivavaka amin’Andriamanitra.” Hoatran’ny ahoana àry ny akanjo tokony hanaovan’izay hatao batisa? Tsy tokony hanao akanjo fitondra milomano tsy maotina na misy teny faneva na dokam-barotra izy ireo. Tokony hanao akanjo madio sy milamina, voafidy tsara, ary mifanentana amin’ilay fotoan-dehibe izy ireo.

Ahoana no tokony ho fihetsitsika rehefa vita batisa? (Lioka 3:21, 22)

Modely ho an’ny Kristianina ny batisan’i Jesosy. Fantany fa dingana lehibe ny batisa ka nasehony tamin’ny fihetsiny izany. Tsy toerana fisangisangiana, na filalaovana, na filomanosana àry ilay toerana anaovana batisa. Tsy tokony hanao zavatra mety hanamaivan-danja an’ilay fotoana isika. Tsy hisehoseho be koa ilay olona vao vita batisa ka hoatran’ny hoe nahazo fandresena lehibe. Marina fa fotoana mahafaly io andro io, nefa tokony hahay handanjalanja ihany isika.

Mila mivory tsy tapaka sy miaraka amin’ny fiangonana ianao. Nahoana izany no hanampy anao hanefa an’ilay voady nataonao tamin’ianao nanokan-tena ho an’i Jehovah?

Nahoana ianao no mbola tokony hianatra samirery sy hanompo tsy tapaka foana aorian’ny batisanao?