FANAZAVANA MAHALIANA
Toerana Nalehan’i Abrahama
TENA mahaliana antsika ny fiainan’i Abrahama, satria izy no nilazan’i Jehovah hoe: “Ny firenena rehetra eny ambonin’ny tany dia hanao izay hahazoany fitahiana amin’ny alalanao.” Tsy maintsy noporofoin’i Abrahama anefa hoe nanam-pinoana sy nankatò an’Andriamanitra izy, raha tiany ny hitana an’io anjara asany ao amin’ny fikasan’Andriamanitra io.—Ge 12:1-3; As 7:2, 3.
Midika izany fa handao ny tranony sy ny havany tao Ora i Abrahama, ary tsy hiverina intsony ao amin’io tanàna nandroso io. Nandeha an-tongotra 960 km teo ho eo nankany Harana izy, ary nampiasa fitaterana faran’izay tsotra. Niampita ny Reniranon’i Eofrata izy tamin’ny 14 Nisana 1943 T.K., ary nianatsimo. Tonga hatrany amin’ny faritra afovoany amin’i Kanana izy tamin’ny farany, ary 1650 km teo ho eo ny tontalin’ny lalana nalehany.
Tamin’ny fotoana voatondron’i Jehovah, dia nataony teraka ho olombelona avy tamin’ny taranak’i Abrahama i Jesosy, ilay Zanany avy tany an-danitra. Afaka ny hahazo fiainana mandrakizay isika noho i Jesosy, ary fitahiana ho antsika izany.
SARITANY: Abrahama
Reniranon’i Eofrata. Niampita an’io renirano io i Abrahama, azo inoana fa teo atsimon’ity toerana ity, teo akaikin’i Karkemisy
Galilia Ambony. Io ilay tany hitan’i Abrahama tamin’izy nianatsimo nankany Sekema
Tendrombohitra Gerizima (havia) sy Tendrombohitra Ebala (havanana), any Sekema. Teo amin’io lohasaha io i Jehovah no nampanantena an’i Abrahama hoe: “Ny taranakao no homeko ity tany ity.” (Ge 12:6, 7)
Hebrona ankehitriny. Tsy lavitra teo i Abrahama no nanorina alitara ho an’i Jehovah (Ge 13:18)