Faritanin’i Galilia

FARITANY nanan-karena sy be mponina, tany amin’ny ilany avaratr’i Palestina, tamin’ny andron’ny Baiboly. Mbola kanto iny toerana iny: Manga mahafinaritra ny Ranomasin’i Galilia, mitomandavana ireo havoana eny amin’ny ilany avaratra, ary mahavokatra erỳ ny tany lemaka. Tao amin’io faritra kanto io i Jesosy no nandany ny androatokom-piainany teto an-tany, satria any Galilia no misy an’i Nazareta, tanàna nahabe azy.​—Mt 2:21-23; Lk 2:51, 52.

Saika mpamboly, mpiompy, mpiandry ondry, ary mpanarato avokoa ny Galilianina, ary ahitana taratra izany ny ankamaroan’ny fanoharana nampiasain’i Jesosy. Nambanin’ny Fariseo sy ny lehiben’ny mpisorona tany Jerosalema ny olon-tsotra tany Galilia, satria nazoto niasa mafy. Mora fantatra tamin’ny fomba fiteniny ny Galilianina.​—Mt 26:73.

Tany amin’ny faritanin’i Galilia no nitranga ny ankamaroan’ireo zavatra niavaka teo amin’ny fanompoan’i Jesosy. Teo amin’ny tehezan-tendrombohitra iray tany akaikin’i Kapernaomy, ohatra, i Jesosy no nanao an’ilay Toriteny teo An-tendrombohitra. (Mt 5:1, 2) Nanao fahagagana izy tany Galilia, ka nanasitrana olona maro.​—Mr 1:32-34; 6:53-56; Jn 4:46-54.

Ahoana no nandraisan’ny olona tany Galilia ny fitorian’i Jesosy sy ny fahagagana nataony? Tamin’ny voalohany, ny olona dia “gaga noho ny teny mahafinaritra naloaky ny vavany”, tamin’izy nitory tao Nazareta, tanàna nahabe azy. Nitady hamono azy anefa izy ireo, rehefa nampitovin’i Jesosy tamin’ireo Israelita tamin’ny andron’i Elia sy Elisa. (Lk 4:22-30) Nandray tsara ny fitorian’i Jesosy ny ankamaroan’ny Galilianina na izany aza: Galilianina ireo olona voalohany lasa mpianany, ary Galilianina daholo ny apostoliny (afa-tsy i Jodasy Iskariota ihany angamba). (Mt 4:18-22; Lk 6:12-16) Galilianina koa ireo mpianatra 120 teo ho eo, izay nahazo fanahy masina tamin’ny Pentekosta taona 33.​—As 1:15; 2:1-7.