APOLYONA

(Apôlyôna) [Mpandringana].

Teny grika nandikan’ny apostoly Jaona ny teny hebreo hoe “Abadona”, ao amin’ny Apokalypsy 9:11. Midika hoe “Mpandringana” izy io, ary iantsoana an’ilay “anjelin’ny lavaka mangitsokitsoka.” Boky maro no milaza fa anjely na hery ratsy i Apolyona. Anjely irahin’Andriamanitra hitondra loza ho an’ny fahavalony anefa no resahin’ny Apokalypsy.

Ilazana an’izay ataon’Andriamanitra, ohatra, ny matoanteny hoe apôllymi ao amin’ny Jakoba 4:12, manao hoe: “Iray monja ny mpanome lalàna sy mpitsara, dia ilay afaka mamonjy sy mandringana.” (Ampit. Mt 10:28.) Niaiky ny fanahy ratsy navoakan’i Jesosy tamin’ny lehilahy iray tao amin’ny synagogan’i Kapernaomy, fa irak’Andriamanitra i Jesosy. Hoy àry izy: “Misy zavatra iombonanay aminao angaha moa, ry Jesosy avy any Nazareta? Tonga mba handringana anay ve ianao?” (Mr 1:24; Lk 4:34) Nampitandrina an’ireo mpanohitra i Jesosy fa ho ringana izy ireo raha tsy mibebaka. (Lk 13:3-5; 20:16) Porofoin’ireo andininy ireo sy ny hafa àry fa i Kristy Jesosy nomem-boninahitra no Apolyona.​—Ampit. Ap 19:11-16; Lk 8:31; jereo koa ABADONA.