AKANA

(Akàna).

1. Iray amin’ireo telo lahy zanak’i Ezera lehibem-pokon’ny Seirita, ary ny anarany no voatonona farany. (Ge 36:20, 21, 27) “Jakana” no iantsoan’ny soratra nataon’ny Masoreta azy ao amin’ny 1 Tantara 1:42, fa “Akana” toy ny ao amin’ny Genesisy 36:27 kosa no ao amin’ny Fandikan-teny Grikan’ny Fitopolo (Kôdeksa Alexandrinus) sy ao amin’ireo sora-tanana hebreo 22.

2. [Rehefa atao tsilalaon-teny io anarana io dia misy ifandraisany amin’ny hoe Akara, izay midika hoe “Ilay Nahatonga Loza (Olana)”]. Zanakalahin’i Karmy avy ao amin’ny ankohonan’i Zabdy, izay anisan’ny fianakaviamben’i Zera ao amin’ny fokon’i Joda. Antsoina koa hoe Akara izy.​—1Ta 2:7.

Nolazain’i Jehovah mazava tamin’ireo Israelita niampita an’i Jordana fa “hatokana haringana” izay azo babo voalohany, izany hoe ny tanànan’i Jeriko, satria “an’i Jehovah.” Tokony homena ho isan’ireo zava-tsarobidy ho an’i Jehovah ny volafotsy sy ny volamena. (Js 6:17, 19) I Akana anefa nahita akanjo lafo vidy avy any Sinara sy vaingam-bolamena iray nilanja sekely 50 (mitentina 6400 dolara eo ho eo) ary sekely volafotsy 200 (440 dolara). Nafeniny mangingina tao ambanin’ny tranolainy izany. (Js 7:21) Nandroba an’Andriamanitra izy raha ny marina! Voadika ilay toromarika nomen’i Jehovah, ka tsy notahiny intsony ny Israelita rehefa nanafika ny tanàna manaraka dia i Ay. Nandositra ny fahavalony ny Israelita. Iza no meloka? Tsy nisy nibaboka. Nandalo fitsarana ny Israelita rehetra ka nasaina nandalo teo anatrehan’i Jehovah ny foko tsirairay. Avy eo dia nasaina nandalo isaky ny fianakaviambe ny tao amin’ny fokon’i Joda, ary tamin’ny farany ny vatan-dehilahy tao amin’ny ankohonan’i Zabdy, ka i Akana no “voatana.” (Js 7:4-18) Teo izy vao niaiky ny helony. Novonoina ho faty avy hatrany izy. Notoraham-bato i Akana, sy ny fianakaviany (izay azo antoka fa nahalala ny ratsy nataony), ary ny biby fiompiny. Nodorana niaraka tamin’ny fananany rehetra izy ireo avy eo, teo amin’ny Lemak’i Akora izay midika hoe “Loza; Olana.”​—Js 7:19-26.