Matokia An’i Jehovah, Ilay “Andriamanitry ny Fampiononana Rehetra”
“Hisaorana anie Andriamanitra Rain’i Jesosy Kristy Tompontsika, Rain’ny fangorahana sy Andriamanitry ny fampiononana rehetra!”—2 KOR. 1:3.
1. Inona no ilaintsika rehetra, na firy taona isika na firy taona?
VAO teraka isika dia efa mila fanampiana. Re amin’ny feontsika, ohatra, hoe te hinono isika, na te hotrotroina. Ary na dia efa lehibe aza isika, dia mbola tiantsika raha misy olona manampy antsika, na mampahery antsika, na mampionona antsika, indrindra fa rehefa misy olana mahazo antsika.
2. Inona no ampanantenain’i Jehovah an’izay matoky azy?
2 Afaka manampy na mampahery antsika ny fianakaviana sy ny namana. Tsy afaka manampy antsika amin’ny olana rehetra mampahory antsika anefa izy ireo. Andriamanitra irery no afaka manao izany, na inona na inona fahoriana mahazo antsika. Manome toky antsika ny Teniny hoe: ‘Akaikin’izay rehetra miantso azy i Jehovah. Hohenoiny izy ireo rehefa miantso vonjy.’ (Sal. 145:18, 19) “Ny mason’i Jehovah mitsinjo ny olo-marina, ary ny sofiny mihaino ny antso vonjy ataon’izy ireo.” (Sal. 34:15) Mila matoky an’Andriamanitra anefa isika, raha tiantsika hanampy antsika izy. Mampiseho izany ny hiran’i Davida hoe: “Ho toy ny tendrombohitra fandosirana i Jehovah, ho an’izay torotoro fo, eny, ho toy ny tendrombohitra fandosirana amin’ny fotoam-pahoriana. Hatoky anao izay mahalala ny anaranao, satria ianao tsy hahafoy an’izay mitady anao, Jehovah ô!”—Sal. 9:9, 10.
3. Ahoana no nampisehoan’i Jesosy fa tian’i Jehovah ny vahoakany?
3 Sarobidy amin’i Jehovah ny mpanompony, araka ny tenin’i Jesosy hoe: “Tsy vola madinika roa kely vidy ve no ivarotana fody dimy? Tsy misy hadinoina eo anatrehan’Andriamanitra anefa ireny, na iray akory aza. Fa na ny volon-dohanareo aza voaisa daholo. Koa aza matahotra, fa sarobidy noho ny fody maro ianareo.” (Lioka 12:6, 7) Hoy koa i Jehovah tamin’ny vahoakany, tamin’ny alalan’i Jeremia mpaminany: “Fitiavana mandritra ny fotoana tsy voafetra no itiavako anao. Izany no antony nisarihako anao, ka ny hatsaram-panahiko feno fitiavana no nentiko nanintonana anao.”—Jer. 31:3.
4. Nahoana isika no afaka matoky ny fampanantenan’i Jehovah?
4 Hahazo fampaherezana isika amin’ny fotoam-pahoriana, raha matoky an’i Jehovah sy mino ny fampanantenany. Mila matoky azy toa an’i Josoa isika. Hoy i Josoa: “Tsy nisy tsy tanteraka na iray aza ny fampanantenana rehetra nolazain’i Jehovah Andriamanitrareo taminareo. Efa tanteraka taminareo avokoa izy rehetra. Tsy nisy tsy tanteraka na iray aza.” (Jos. 23:14) Afaka matoky koa isika fa na mijaly aza isika izao noho ny olana mahazo antsika, dia ‘tsy mivadika amin’ny teniny Andriamanitra’ ary tsy hahafoy mihitsy ny mpanompony tsy mivadika.—Vakio ny 1 Korintianina 10:13.
5. Nahoana isika no afaka mampionona na mampahery ny hafa?
5 Nilaza ny apostoly Paoly fa “Andriamanitry ny fampiononana rehetra” i Jehovah. Ny hoe ‘mampionona’ dia midika koa hoe manampy, mampitony, mampahery olona mijaly na malahelo. Atao izay hampihenana ny alahelony na ny fanaintainany. Izany indrindra no ataon’i Jehovah Raintsika. (Vakio ny 2 Korintianina 1:3, 4.) Tsy misy na inona na inona, ary na iza na iza, mahasakana azy amin’izay tiany hatao. Afaka manao izay rehetra ilaina izy mba hampiononana na hampaherezana ny olona tiany. Noho isika mahazo fampiononana aminy, dia haintsika koa ny mampionona an’ireo mpiray finoana amintsika “ao anatin’ny fahoriana isan-karazany”, “amin’ny alalan’ny fampiononana izay ampiononan’Andriamanitra antsika.” I Jehovah tokoa no tena mahay mampionona ny kivy!
Fomba hiatrehana zava-mampahory
6. Inona avy no mety hampahory antsika?
6 Maro ny antony ilantsika fampiononana na fampaherezana. Tena mangidy, ohatra, ny hoe maty havana, indrindra fa raha vady na zanaka no maty. Mampahory koa ny fanavakavahana, ny fitsarana an-tendrony, ny aretina, ny fahanterana, ny fahantrana, ary ny olana ara-panambadiana. Mety hanahiran-tsaina koa ny olana mitranga eran-tany.
7. a) Nahoana isika no mila fanampiana rehefa misy zavatra mampahory antsika? b) Inona no azon’i Jehovah atao mba hanasitranana ny fo “torotoro sy kivy”?
7 Mila fanampiana isika rehefa misy zavatra mampahory antsika. Tiantsika mantsy raha tony ny fontsika sy ny saintsika, ary ho salama ara-batana sy ara-panahy isika. Mety ho “torotoro sy kivy” tokoa ny fontsika, rehefa misy zava-mampahory. (Sal. 51:17) Afaka manampy antsika hiatrika izany anefa i Jehovah, satria ‘manasitrana an’ireo torotoro fo izy, ary manisy fehy ny ratrany.’ (Sal. 147:3) Na mafy aza ny manjo antsika, dia afaka mampitony ny fontsika Andriamanitra, raha mivavaka aminy isika sady matoky azy tanteraka sy mankatò ny didiny.—Vakio ny 1 Jaona 3:19-22; 5:14, 15.
8. Ahoana no anampian’i Jehovah antsika rehefa miady saina isika?
8 Mila fampaherezana koa isika matetika mba hampitonena ny saintsika, satria miady saina mafy isika rehefa miatrika fitsapana. Tsy ho vitantsika ny hiatrika fitsapana, raha miady irery isika. Hoy ny mpanao salamo: “Rehefa nihabetsaka ny tebiteby tato anatiko, dia ny fampiononanao [na fampaherezanao] no nanafosafo ahy.” (Sal. 94:19) Hoy koa i Paoly: “Aza manahy na amin’inona na amin’inona, fa amin’ny zava-drehetra, dia ampahafantaro an’Andriamanitra ny fangatahanareo, amin’ny alalan’ny vavaka sy ny fitalahoana mbamin’ny fisaorana. Ary ny fiadanan’Andriamanitra izay lehibe lavitra noho ny eritreritra rehetra no hiambina ny fonareo sy ny sainareo amin’ny alalan’i Kristy Jesosy.” (Fil. 4:6, 7) Tena mahasoa ny mamaky sy misaintsaina ny Soratra Masina, rehefa miady saina isika.—2 Tim. 3:15-17.
9. Inona no hanampy antsika tsy hatahotra na hanahy?
9 Mety hatahotra na hanahy isika indraindray, rehefa kivy be. Mety hanjary hieritreritra isika hoe tsy ho vitantsika ny zavatra sasany asain’i Jehovah ataontsika, na ny andraikitsika eo anivon’ny fiangonana. Mbola afaka mampahery sy manampy antsika koa i Jehovah amin’izay. Rehefa notendrena hitarika ny Israelita, ohatra, i Josoa, mba hiady tamin’ny firenena matanjaka be, dia nilaza tamin’ny vahoaka i Mosesy hoe: “Mahereza sy matanjaha. Aza matahotra na mivadi-po eo anatrehany, fa i Jehovah Andriamanitrao no miara-mandeha aminao. Tsy handao anao izy ary tsy hahafoy anao mihitsy.” (Deot. 31:6) Nampian’i Jehovah tokoa i Josoa, ka nahavita nitarika ny vahoaka nankany amin’ny Tany Nampanantenaina sy nandresy ny fahavalony rehetra. Efa nanampy an’i Mosesy koa i Jehovah talohan’izay, teo amin’ny Ranomasina Mena.—Eks. 14:13, 14, 29-31.
10. Inona no azontsika atao raha misy fiantraikany amin’ny fahasalamantsika ny zavatra mampahory antsika?
10 Mety hanimba ny fahasalamantsika ny zava-mampahory. Mety hahasoa antsika, amin’izay, ny mihinana sakafo mahasalama, miezaka ho ampy torimaso, manao fanatanjahan-tena, ary miezaka ho madio foana. Tsara koa ny mieritreritra zavatra mampahery ao amin’ny Baiboly. Mampahery, ohatra, ny mitadidy fa nahavita niaritra fijaliana i Paoly. Tadidio koa ilay teniny hoe: “Voageja amin’ny lafiny rehetra izahay, nefa tsy hoe tery loatra ka tsy afa-mihetsika. Very hevitra izahay, nefa tsy hoe tsy misy lalan-kivoahana mihitsy. Enjehina izahay, nefa tsy afoy. Azera izahay, nefa tsy maty.”—2 Kor. 4:8, 9.
11. Inona no azontsika atao raha mahatsiaro ho marary ara-panahy isika?
11 Mety hanimba ny fahasalamantsika ara-panahy ny fitsapana sasany. Afaka manampy antsika koa i Jehovah amin’izay. Manome toky antsika ny Teniny hoe: “Manohana an’izay rehetra lavo i Jehovah, ary mampitraka an’izay rehetra mitanondrika.” (Sal. 145:14) Mila mangataka ny fanampian’ny anti-panahy isika, raha mahatsiaro hoe marary ara-panahy. (Jak. 5:14, 15) Ilaintsika koa ny mitadidy hoe afaka ny hiaina mandrakizay isika. Hanampy antsika hiatrika fitsapana izany.—Jaona 17:3.
Olona nahazo fampiononana tamin’i Jehovah
12. Ahoana no nampaherezan’i Jehovah an’i Abrahama?
12 Hoy ny mpanao salamo tamin’i Jehovah: “Tsarovy ny teninao tamin’ny mpanomponao. Koa miandry aho, satria efa nampanantena ianao. Izany no mampionona ahy rehefa ory aho, fa voatsimbina ny aiko noho ny teninao.” (Sal. 119:49, 50) Manana ny Tenin’Andriamanitra voasoratra isika ankehitriny, ary misy tantara maro ao mampiseho fa mampionona na mampahery ny mpanompony tokoa i Jehovah. Diniho, ohatra, izay nitranga tamin’i Abrahama. Natahotra be angamba izy rehefa fantany hoe horavana i Sodoma. Nanontany an’Andriamanitra izy hoe: “Dia haripakao miaraka amin’ny ratsy fanahy tokoa ve ny olo-marina?” Nampahery an’i Abrahama i Jehovah, rehefa nanome toky azy fa tsy horavany ilay tanàna, na dia 50 monja aza ny olo-marina ao. Mbola nanontany ihany anefa i Abrahama hoe ahoana raha misy olo-marina 45? 40? 30? 20? 10? Naharitra nihaino azy i Jehovah isaky ny nanontany izy, ary nanome toky azy fa tsy horavany ilay tanàna, raha mahatratra an’ilay isa nolazain’i Abrahama ny isan’ny olo-marina ao. Novonjeny anefa i Lota sy ny zanany vavy, na dia tsy ampy folo aza ny olo-marina tao.—Gen. 18:22-32; 19:15, 16, 26.
13. Ahoana no nampisehoan’i Hana fa natoky an’i Jehovah izy?
13 Naniry mafy hanan-janaka i Hana vadin’i Elkana, nefa momba. Tena ory izy noho izany. Nivavaka tamin’i Jehovah izy, ka nilaza taminy i Ely Mpisoronabe hoe: “Homen’ny Andriamanitry ny Israely anao anie izay nangatahinao taminy!” Nampahery an’i Hana izany, ka “hita tamin’ny endriny fa tsy niady saina intsony izy.” (1 Sam. 1:8, 17, 18) Natoky an’i Jehovah i Hana, ka napetrany taminy ny olana nahazo azy. Mbola tsy fantany izay hitranga, nefa nilamin-tsaina sahady izy. Namaly ny vavaka nataony i Jehovah rehefa nandeha ny fotoana, satria bevohoka izy ary niteraka zazalahy atao hoe Samoela.—1 Sam. 1:20.
14. Nahoana i Davida no nila fampiononana, ary tamin’iza izy no nangataka izany?
14 Nahazo fampiononana koa i Davida. Tsara toetra i Davida satria tia manao ny tsara sy tia ny fivavahana marina. “Mijery ny fo” i Jehovah ka hitany izany rehefa nifidy azy ho mpanjakan’ny Israely izy. (1 Sam. 16:7; 2 Sam. 5:10) Nijangajanga tamin’i Batseba anefa i Davida tatỳ aoriana. Nasainy novonoina koa ny vadin’i Batseba mba hanafenana ny fahotany. Rehefa tsapany anefa hoe tena ratsy ny nataony, dia nivavaka tamin’i Jehovah izy hoe: “Koseho ny fahadisoako, araka ny haben’ny famindram-ponao. Sasao tanteraka aho ho afaka amin’ny fahadisoako, ary diovy aho ho afaka amin’ny fahotako. Fantatro ny heloka vitako, ary eo anatrehako mandrakariva ny fahotako.” (Sal. 51:1-3) Tena nibebaka i Davida, ka namela azy i Jehovah. Tsy maintsy nizaka ny vokatry ny nataony anefa izy. (2 Sam. 12:9-12) Na izany aza, dia nampionona an’io lehilahy nanetry tena io ny hoe namindra fo taminy i Jehovah.
15. Ahoana no nanampian’i Jehovah an’i Jesosy taloha kelin’ny hahafatesany?
15 Niatrika fitsapana maro i Jesosy tetỳ an-tany. Navelan’Andriamanitra hitranga izany, ary tsy nivadika izy. Natoky an’i Jehovah foana izy, ary nasehony hoe i Jehovah no manana zo hitondra. Rehefa fantany fa efa akaiky ny olona hamadika sy hamono azy, dia nivavaka tamin’i Jehovah izy hoe: “Aoka tsy ny sitrapoko no atao, fa ny anao.” Nisy anjely niseho tamin’izay, ary nampahery azy. (Lioka 22:42, 43) Nampahery sy nanohana azy i Jehovah tamin’ny fotoana nilany izany indrindra.
16. Ahoana no anampian’i Jehovah antsika, rehefa misy fitsapana mahatandindomin-doza ny aintsika?
16 Hanampy antsika tsy hivadika i Jehovah, rehefa misy fitsapana mahatandindomin-doza ny aintsika. Hampahery antsika koa, amin’izay, ny fanantenana fitsanganana amin’ny maty. Efa tsy andrintsika ny fotoana ‘hanafoanana ny fahafatesana, izay fahavalo farany’! (1 Kor. 15:26) Ao amin’ny fitadidian’i Jehovah ny mpanompony tsy mivadika rehetra efa maty, sy ny olon-kafa efa nodimandry. Tadidiny tsara daholo izy ireny, ka tsy maintsy hatsangany. (Jaona 5:28, 29; Asa. 24:15) Raha matoky isika fa ho tanteraka ny fampanantenan’i Jehovah hoe hatsangana ny maty, dia hampionona antsika sy hahavelom-panantenana antsika izany rehefa iharan’ny fanenjehana isika.
17. Ahoana no ampiononan’i Jehovah antsika rehefa misy havantsika maty?
17 Tena mampionona antsika ny mahalala fa mbola ho velona ireo havantsika nodimandry, ka hiaina ao amin’ny tontolo vaovao iray tena mahafinaritra sy tsy misy an’ireo zavatra rehetra mampahory antsika ankehitriny. Ho faly handray an’ireo hatsangana amin’ny maty sy hampianatra azy ireo ny “vahoaka be”, izay ho tafavoaka velona amin’ny fandringanana an’ity tontolo ratsy ity.—Apok. 7:9, 10.
Manohana anao ny sandrin’i Jehovah
18, 19. Ahoana no ahazoantsika fampiononana na fampaherezana rehefa misy fanenjehana?
18 Nanome toky ny vahoakan’ny Israely i Mosesy, tao amin’ny hira mampahery iray nosoratany. Hoy izy: “Ilay Andriamanitry ny andro fahiny no fiafenanao, ary manohana anao ireo sandriny izay maharitra mandritra ny fotoana tsy voafetra.” (Deot. 33:27) Nilaza tamin’ny Israelita koa i Samoela tatỳ aoriana hoe: ‘Manaraha foana an’i Jehovah fa aza miala aminy, ary manompoa an’i Jehovah amin’ny fonareo manontolo. Tsy hahafoy ny olony i Jehovah, noho ny amin’ny anarany be voninahitra.’ (1 Sam. 12:20-22) Tsy hanary antsika mihitsy i Jehovah, raha tsy mivadika aminy mihitsy isika. Hanome foana ny fanampiana ilaintsika izy.
19 Omen’i Jehovah ny fanampiana sy fampiononana ilainy foana ny vahoakany, amin’izao andro farany misy fotoan-tsarotra izao. Rahalahy sy anabavy an’arivony maneran-tany no nenjehina sy nogadraina, tao anatin’ny zato taona mahery, satria fotsiny hoe manompo an’i Jehovah. Voaporofon’ny zavatra niainan’izy ireo fa mampahery ny mpanompony tokoa i Jehovah rehefa misy fitsapana. Voaheloka higadra 23 taona noho ny finoany, ohatra, ny rahalahy iray tany amin’ny Firaisana Sovietika teo aloha. Na izany aza, dia nahazo sakafo ara-panahy foana izy, ary nampahery azy izany. Hoy io rahalahy io: ‘Nianatra nitoky tamin’i Jehovah aho nandritra ireny taona ireny, ary nanome hery ahy izy.’—Vakio ny 1 Petera 5:6, 7.
20. Nahoana isika no matoky fa tsy hanary antsika mihitsy i Jehovah?
20 Mila mitadidy an’ireto teny mampahery ireto isika, na inona na inona fahoriana mahazo antsika: “Tsy hahafoy ny olony i Jehovah.” (Sal. 94:14) Na dia mila fampaherezana aza anefa isika, dia manana tombontsoa hampahery ny hafa koa. Ho hita ao amin’ny lahatsoratra manaraka fa azontsika atao ny mampionona na mampahery an’ireo ory, amin’izao fiainana feno olana izao.
Ahoana no Havalinao?
• Inona avy no mety hampahory antsika?
• Ahoana no ampaherezan’i Jehovah ny mpanompony?
• Inona no hevitra mampahery azontsika saintsainina, rehefa tandindomin-doza ny aintsika?
[Efajoro/Sary, pejy 25]
FOMBA HIATREHANA AN’IREO OLANA METY HISY FIANTRAIKANY AMIN’NY
▪ fo Sal. 147:3; 1 Jaona 3:19-22; 5:14, 15
▪ saina Eks. 14:13, 14; Deot. 31:6; Sal. 94:19; Fil. 4:6, 7
▪ fahasalamana ara-batana 2 Kor. 4:8, 9
▪ fahasalamana ara-panahy Sal. 145:14; Jak. 5:14, 15