Fanontanian’ny Mpamaky

Inona no lazain’ny Baiboly momba ny fianianana?

Ny fianianana dia ‘voady na fanambarana atao na fampanantenana fa hanao zavatra iray, ary Andriamanitra matetika no atao vavolombelona.’ Mety ho am-bava izy io na an-tsoratra.

Misy mieritreritra fa tsy mety ny mianiana, satria nilaza i Jesosy hoe: “Aza mianiana mihitsy ... Fa aleo ny teninareo rehefa ‘Eny’ dia eny, rehefa ‘Tsia’ dia tsia, fa avy amin’ilay ratsy ny ankoatra an’izany.” (Mat. 5:33-37) Mazava ho azy fa fantatr’i Jesosy hoe mitaky ny hanaovana fianianana sasany ny Lalàn’i Mosesy, ary misy mpanompon’Andriamanitra nanam-pinoana aza nanao an’izany koa. (Gen. 14:22, 23; Eks. 22:10, 11) Fantany koa fa na i Jehovah aza mba nianiana. (Heb. 6:13-17) Tsy te hilaza àry i Jesosy hoe tsy azo atao mihitsy ny mianiana. Nampitandrina kosa izy fa tsy mety ny mianiana fahatany, na mianiana amin’ny zavatra tsy misy dikany. Tokony hoheverintsika ho masina ny fianianana, ary tsy maintsy manatanteraka an’izay lazaintsika isika.

Ahoana àry no tokony hataonao raha asaina mianiana ianao? Voalohany, hamarino tsara raha afaka manatanteraka an’ilay izy ianao na tsia. Raha tsy azonao antoka izany, dia aleo tsy mianiana. Mampitandrina mantsy ny Tenin’Andriamanitra hoe: “Aleo tsy mivoady, toy izay mivoady nefa tsy manatanteraka.” (Mpito. 5:5) Diniho avy eo izay toro lalan’ny Baiboly mifandray amin’ilay fianianana, dia avy eo manaova zavatra mifanaraka amin’ny feon’ny fieritreretanao. Inona no sasany amin’izany toro lalana izany?

Mifanaraka amin’ny sitrapon’Andriamanitra ny fianianana sasany. Manao voady, ohatra, ny Vavolombelon’i Jehovah rehefa atao mariazy. Karazana fianianana ihany izany. Mampanantena eo imason’Andriamanitra sy izay olona manatrika eo izy ireo, fa hotiaviny sy holalainy ary hohajainy ny vadiny raha mbola velona koa izy roa. (Tsy tena ireo teny ireo no lazain’ny mpivady hafa, nefa manao voady eo anatrehan’Andriamanitra ihany izy ireo.) Ambara hoe mpivady ry zareo aorian’izay, ary tokony ho toy ny lamban’akoho ny fanambadian’izy ireo ka faty no isarahana. (Gen. 2:24; 1 Kor. 7:39) Mety tsara io fandaharana io sady mifanaraka amin’ny sitrapon’Andriamanitra.

Mifanohitra amin’ny sitrapon’Andriamanitra ny fianianana sasany. Tsy tokony hianiana, ohatra, ny tena Kristianina hoe handa ny finoany na hampiasa fitaovam-piadiana mba hiarovana firenena iray. Mandika ny didin’Andriamanitra mantsy izy raha manao an’izany. Tsy miditra amin’ny ady na amin’ny fifandirana eto amin’izao tontolo izao ny Kristianina, satria ‘tsy anisan’izy io.’​—Jaona 15:19; Isaia 2:4; Jak. 1:27.

Miankina amin’ny feon’ny fieritreretana ny fianianana sasany. Alohan’ny hanapahana hevitra hoe hianiana na tsia, dia azontsika atao indraindray ny mieritreritra tsara an’ilay torohevitr’i Jesosy hoe: “Aloavy amin’i Kaisara izay an’i Kaisara, fa amin’Andriamanitra kosa izay an’Andriamanitra.”​—Lioka 20:25.

Andao hatao hoe mangataka zom-pirenena na te hanamboatra pasipaoro ny Kristianina iray. Dia ahoana raha asaina mianiana izy? Inona no tafiditra amin’ny fianianana hoatr’izany ao amin’io tany io? Raha hita mazava hoe mifanohitra amin’ny lalàn’Andriamanitra ilay izy, dia tsy hamela azy hanao an’ilay fianianana ny feon’ny fieritreretany. Mety hamela azy hanova kely an’ilay fianianana anefa ny fanjakana, mba hifanaraka amin’ny feon’ny fieritreretany ilay izy.

Raha efa novana hoatr’izay ilay fianianana, dia mety hifanaraka amin’ilay toro lalana ao amin’ny Romanina 13:1 ny fanaovana an’ilay izy. Izao no voalaza ao: “Aoka ny olona rehetra samy hanaiky ny manam-pahefana.” Mety hieritreritra àry ilay Kristianina hoe tsy misy maharatsy ny mianiana hanao zavatra efa asain’Andriamanitra atao.

Ahoana indray raha asaina mampiasa zavatra ianao, na asaina manao fihetsika sasany rehefa mianiana? Miankina amin’ny feon’ny fieritreretanao koa izany. Mianiana amin’ny sabany, ohatra, ny Romanina sy ny Skytianina fahiny. Famantarana ny andriamanitry ny ady mantsy ny sabatra, dia io no ataony antoka hoe mendri-pitokisana izy. Ny Grika indray manangan-tanana rehefa mianiana. Nasehony tamin’izany hoe misy andriamanitra iray mandinika an’izay lazainy sy ataony ary hanao ampamoaka ny olombelona izy io.

Mazava ho azy fa tsy hianiana amin’ny sainam-pirenena ny mpanompon’i Jehovah, na amin’ny zavatra hafa mifandray amin’ny fivavahan-diso. Ahoana anefa raha any amin’ny fitsarana ianao, dia asaina mametraka ny tananao eo ambony Baiboly sy hianiana hoe hilaza ny marina? Raha izay indray, dia mety tsy hampaninona anao ny hanao an’ilay izy. Resahin’ny Soratra Masina mantsy hoe nisy olona nanam-pinoana nianiana sady nanao fihetsika sasany taloha. (Gen. 24:2, 3, 9; 47:29-31) Tsara ny mitadidy hoe mianiana eo anatrehan’Andriamanitra ianao, raha mianiana hoatr’izany. Mila miomana hilaza ny marina amin’izay fanontaniana apetraka aminao àry ianao.

Sarobidy amintsika ny fifandraisantsika amin’i Jehovah. Tokony handinika sy hivavaka àry isika rehefa asaina mianiana. Mila ataontsika azo antoka hoe tsy mandika ny toro lalan’ny Baiboly isika sady manaja ny feon’ny fieritreretantsika. Raha manapa-kevitra ianao hoe hianiana dia aza mivadika amin’izany.​—1 Pet. 2:12.