Baiboly Amin’ny Teny Géorgien

ANISAN’NY teny voalohandohany nandikana ny Baiboly ny teny géorgien, ankoatra ny teny armenianina, kôpta, latinina, syriàka, ary ny maro hafa. Tamin’ny taona 450 tany ho any na talohan’izay aza no vita ny Filazantsara sy ny taratasin’i Paoly ary ny Salamo. Maro no nandika ny Baiboly tamin’ny teny géorgien sy nanao dika mitovy azy io, tatỳ aoriana, ka lasa nisy dikan-teny samihafa.a

Nisy vokany be teo amin’ny literatiora sy soatoavina géorgien ny Baiboly. Naka hevitra sy andininy tao, ohatra, ilay nanoratra ny tantaran’i Chouchanik Mpanjakavavy, taloha kelin’ny taona 500. Miresaka an-kolaka momba ny fitsipika arahin’ny Kristianina koa i Chota Roustavéli ao amin’ilay poezia lava be mitondra ny lohateny hoe Ilay Lehilahy Nitafy Hodi-biby. Vitany tamin’ny 1220 tany ho any izy io. Anisan’ny foto-kevitra hita ao ny momba ny fisakaizana, fahalalahan-tanana, ary ny fitiavana vahiny. Mbola hitan’ny olona eto Géorgie hoe ilaina ireo toetra ireo.