Yoopacera ya Peturu
3 Ciicammo nyuuva athiyana ootheliya, nwiiwelele awannyinyu, wiira yaahiiwelele nuulumo na Nluku, yiiwelele nlattu womeettelweenyu omaana, hataa ukhalaka wiira khamuulumile itthu, 2 nlattu wowoona meettelweenyu omaana, ni ihisima yinci irineenyu. 3 Ureera winyu uhikhale wo mwiirutthuni paasi, toko utthava ikharari, uwara ikhankaani co wooru ni ikuwo consurukhu mwinci. 4 Masi ukhaleke ureera wo wanrimani uhinoonnya, uhinontta ni woonihera unamaana ni wiiyeviha. Nwo ureera nwo, phirina ifayita yuulupale wamiithoni wa Nluku. 5 Iyo phiitthu yaapankaaya athiyana okhalayi owaamini, yaamwaareriha Nluku ni yaahisimaka asiwannyaya, 6 toko Sara aamwiiwelela Aparahaamu mpaka umwiihana pwiiya. Ni nyuuva nnaahala ukhala mwanawe mwaahihiyerereke woova wuutthemakani.
7 Inanna imocaaru, nlopwana oothela hihiyerere ukhala naamwaarawe toko cinreeranaaya.* Mwaattitthimihe athiyana toko munwacereenyu mwaapu woohipica uphwyaa, ukhala wiira ayo ahooniheriya unamaana wookumi nkhayi ni nyuuva wiira ulompa winyu uhikhottiye.
8 Ciicammo, nkhale owiiwanana,* nthoonyerane uthunku, nthoonyerane nifento nomayamunna, ciicammo nthoonyerane ikiriri ni wiiyeviha. 9 Nhilivyaanihere itthu yootakhala ni itthu yootakhala, ni mwaruwaniyaka nyuuva nhiruwane. Uhiya commo, mwaapankele citthu comaana akhunaninyu, kontha phiitthu yiihaneliyeenyu wiira nrwee mwaakhele citthu comaana.
10 Vano “ule nofenta ukumi ni nopheela ukhala mahuku menci atteeliyaka va watuninyani va, akhikicere nlimi nawe wiira huulume citthu cootakhala ni malakwaawe wiira huulume citthu cowoothiya. 11 Anyeme upanka citthu cootakhala ni apanke citthu comaana. Mwaavye nnema ni mwiikurumice ukhala ninnema. 12 Masi miitho a Yehova* anawaaweheeha anasariya, ni manyarwaawe anawiiwa isontte caya masi Yehova ananrusa atthu ampanka citthu cootakhala.”
13 Tipani nohala wuupankani pusya, mweekurumicaka upanka citthu comaana? 14 Masi hataa nhuvaka nlattu woweettela isariya nnaahala ukhala ootteeliya. Nyuuva nhoove itthu ayo atthwaayo inoovaaya* ni hataa nhikhale ni masukhuli. 15 Masi munttitthimihe Kristu Pwiiyeenyu wanrimani winyu, ni mwiitthenkace wiira nkhitiri uwaakhula ale anhala wuukohakohani nlattu wo niweherero nirineenyu, masi nwaakhule ni unamaana ni ihisima.
16 Nkhalane nrima wootaphuwa, wiira khula ikwaha nnohaleenyu wuulumiya pusya ni ale anhala uwuulumani pusya yoone ihaaya nlattu wo meettelweenyu omaana khampa atthari a Kristu. 17 Kontha phataari uhuva nlattu woopanka citthu comaana, wakhala wiira Nluku naatthuniha iyo itthwiiyo, uhiya upanka citthu cootakhala. 18 Kristu khwile ikwaha imoca wiira anoopole mmatampini, nasariya wiira awoopole ale oohisariya, wiira ookavihereni umphiyeera Nluku. Uyo khwile niirutthu toko yaapinaatamu onwelelihiye niirutthu yomminepani. 19 Nuuyo aahorwaa ulalyeera malayikha yaari nkhattya wiira yanhala uhukhumwiya, 20 ale yahaamwiiwelenle Nluku ukati uyo wanwehereraawe* Nowee mahuku aatekaawe ikalawa, yaakenle atthu 8 wiira yoopwee ucara wo maaci.
21 Itthu inlikana ni ila ukhanle upattisiya unwoopolani nyuuva nnaco kahi nlattu wookumihiya citthu cootakhala comwiirutthuni, masi unlepela Nluku ninrima wootaphuwa, nlattu wowunwelelihiya wa Yesu Kristu. 22 Uyo ri moono wonlopwana wa Nluku, ukhala wiira uyo rweele wiirimu, hovahaceriya malayikha,ukhulupale ni ikuru.