Miteko co Mapostolu
2 Vano, nihuku nofesta yo pentekositi, otheene caya yaahothukumana nipuro nimoca. 2 Woohipica, yaahoruma itthu yaaweela wiirimu yaalikana khampa iphyoo yuulupale ni yahocara inupa yonkomacilyaaya. 3 Ni ayo, yaahopacera woona itthu yaakhala khampa malimi omooro ni yaahomwareela wamuru wo khula ntthu, 4 ni otheene caya, wahaacara nnepa wowaarya ni yaahopacera wuuluma iluuka coovirikana, khampa nnepa wowaarya waakaviheraaya.
5 Ule ukatyuule, ayuuta owiivaherera otheene* yaaphwanyannyaa ilapo co watuniyani cotheene yaari u Yerusalemu. 6 Wiiwiya waya itthu yaanyakunle, yahowa atthu enci ni yaahotikhinihiya, kontha yanwiiwa atthari a Yesu yuulumaka iluuka ayova yuulumaaya. 7 Khweeliini, yaahokhala ootikhinihiya venci ni yaheera: “Khaanakhala akalileya otheene ala anoolumaala? 8 Ninkhitiri cani uwiiwa yuulumaka iluukeehu? 9 Iriyariihu ahaavo atthu ankhuma u Partu, u Meetu ni atthu o Elamita, u Mesopotaamiya, u Yuteeya, u Kapatoosiya, u Pontu, ni ciicammo iprovinsiya yo Asiya, 10 atthu o Firiisiya ni o Panfiiliya, o Wiiciipitu ni atthu yaakhuma u Libiya waattamana u Sireeni, atthu owootola yaakhuma u Rooma, ayuuta ni maproseelitu;* 11 atthu o Kereta ni ciicammo atthu o Arapiya. Nihowiiwa yuulumaka citthu cootikhiniha ca Nluku niiluka cihu.” 12 Khweeliini, yaahokhala ootikhinihiya ni yahosanka, ni yankohana: “Ila itthwiila maanaaya isiyani?” 13 Masi atthu akhwaawe, yaanatarawaca yeeraka: “Ahoohapalaciya.”
14 Vano, Peturu ahonwa ni aheemela iriyari yo maapostolu 11 ni ahopacera ukhuwela, eeraka: “Alopwana o Yuuta, ni otheene nyuuva nnokhala u Yerusalemu, nviriyane itthu kinhalaaka wuuhimeeryani. 15 Khweeliini, ala atthwaala khaahapaliye toko nyuuva nnoopuweleenyu, ukhala wiira nanlelo uwicisu. 16 Uhiya commo, ila phiitthu yaahimilyaawe porofeeta Joweeli: 17 ‘“Mahuku ookhicera,” neera Nluku, “kinaahala waamwarusela nnepaaka wowaarya atthu okhapila cotheene ni asaaneenyu asilopwana ni asaaneenyu asithiyana, anaahala ukhala maporofeeta, amiraweenyu anaahala ukhalana iwooni ni alopwana owuuluvala anaahala uloha, 18 ni ayo mahukwaayo, anantekwaaka alopwana ni athiyana kinaahala waamwarusela nnepaaka wowaarya ni ayo anaahala ulalyeera ihapari comaana. 19 Ni kinaahala upanka mitikhiniho wiirimu ni mathoonyero watuniyani, nnyo citthunnyo, phinnya: Iphome, mooro, ni mahutte omwiisi. 20 Ncuwa, ninaahala utathuwa ipiphi ni mweeri unaahala utathuwa iphome, nihinaaya uphiya nihuku nuulupale ni noottitthima na Yehova. 21 Ni otheene ale anhala ulompa yaromolaka ncina na Yehova, anaahala woopwa.”’
22 “Nyuuva apoovu o Isarayeli, nviriyane ala moolumwaala: Nluku, howooniherani sana-saana wiira uyo phinthanlile Yesu o Nasaree, wiira apanke mitikhiniho ni mathoonyero uhoolo winyu toko cincuweleenyu. 23 Toko Nluku caacuwelihilyaawe khalayiiru, wiira Yesu anhala wiiviya, nyuuva nhaavaha atakhali wiira ankhomele ni amwiive. 24 Masi, Nluku homoopola ni homunweleliha, ukhala wiira ukhwa khinakhala itthu yaalamuliya untthema. 25 Davidi hantikha amwaacaka uyo, eeraka: ‘Yehova ri ni mi, ni uyo ri moonwaaka wonlopwana wiira kihisanke. 26 Phimaana, wahokitteela nrima ni kahooluma kitteeliyaka cinene, ni mi kinaahala ukhala kiwehereraka, 27 kontha khunhala ukihiya mmahiye ni khunhala uhiya irutthu yanswalyaa ookhuluvelya yunttaka. 28 Weeva uhokicuweliha iphiro imphwanyiha ukumi, unaahala ukitteeliha nrima cinene uhoolo waa.’
29 “Mayamunna, nkihiye kuuhimeeryeni woohuukhuwakhuwani wiira nhiya-taateehu Davidi, hokhwa ni hosikhiya, ni mahiyaawe ahaavo mpaka nna va. 30 Ukhala wiira aari porofeeta, ni ancuwela wiira Nluku ahonkhuluveliha wiira ucuulwaawe wanhala wunkoma wakhaterani wawe yo Umwene. 31 Uyo, ahohimyaca wunwelelihiya wa Kristu, ciicammo ahohimyaca wiira irutthwaawe khayaahala uhinnya mmahiye yunttaka. 32 Nluku homunweleliha Yesu ni otheene cihu vaa ninaacuwela iyo itthwiiyo. 33 Phimaana, ukhala wiira uyo hottitthimihiya ni honkoma moono wonlopwana wa Nluku ni haakhela nnepa wowaarya, waakhuluvelihiyaawe naathumwaane ni honivaha, toko nyuuva nnooneenyu ni nneeweenyu. 34 Khweeliini, Davidi kharweele wiirimu, masi uyo aheera: ‘Yehova howiirela Apwiiyaaka: “Wonkome moonwaaka wonlopwana, 35 mpaka wanhalaaka uweesa awanannyaa vathi inyaa caa.”’ 36 Phimaana, atthu otheene o Isarayeli ahaana acuwelaka wiira, Nluku honkhaliha Yesu Pwiiya ni Kristu, mmwiivileenyu wa nipottoni.”
37 Wiiwa waya nnyo citthunnyo, yaahokhala ooriipiya nrima, ni yaahomwiirela Peturu ni maapostolu makhwaawe co: “Mayamunna, vano nipankeke isiyani?” 38 Peturu ahowiirela co: “Nttharuwe ni khula ntthu apattisiye mwancina na Yesu Kristu, wiira nleveleliye matampiinyu ni mwaakhele nnepa wowaarya. 39 Kontha atthu akhuluvelihiye iyo itthuvweeyo, thi nyuuva, asaaneenyu, atthu ankhuma ilapo coottayi, ni otheene Yehova Nlukwiihu, naathanlaawe.” 40 Uyo, aanooluma ni aanaalalyeera atthu otheene eeraka: “Nhaataane naala atthu ootakhala nrimaala.” 41 Vano, atthu otheene yiiwelenle moolumo a Peturu waatteelaka nrima, yahopattisiya ni nno nihukunno yaahaavo atthu 3.000 yaatakaneelanne maapostolu. 42 Ayo khayaahiyerera weettela citthu yeetthucihiyaaya ni maapostolu, ukhala nkhayi naakhunanaya, ulya ni ciicammo ulompa nkhayi.
43 Khweeliini, atthu otheene yahopacera woova, ni maapostolu yahopacera upanka mitikhiniho ni mathoonyero. 44 Otheene ale yaakhanle makristau, yaakhala nkhayi ni yanameelana citthu cotheene caarinaaya; 45 yaanaatumiha mihakhu caarinaaya, imatta caya ni nsurukhu waakhelaaya yaanaakawela atthu otheene anvahaka khula ntthu itthu yanthwa. 46 Khula mahuku yanthukumana ntempulu, yanlya icoolya caya nkhayi naakhunanaya ni yaanaakawela akhunanaya icoolya caya, waatteelaka nrima ni yaapanka iyo itthwiiyo ni nrimaaya wotheene. 47 Khula mahuku yaanonttottopela Nluku ni apoovu otheene waanaacivela, ni Yehova anwuncerera atthu yaapheela ukhala atthari.