Miteko co Mapostolu
4 Ukati Peturu ni Joau waawulumanaaya apoovu, yahowa anankuttho, ahooleli ontempulu ni masatuseu. 2 Ayo yaahooviruwa venci, kontha maapostolu yanwiitthuciha apoovu ni yanlalyeera wunwelelihiya wa Yesu, woohikhuwakhuwa. 3 Vano, yahaavara ni yahaatthukela nkhattya mpaka usa, kontha waaheela. 4 Masi, atthu enci yeewelenle itthu Peturu ni Joau yoolumilyaaya, yahokupali ni atthu yaakupanli yaahophiya 5.000.
5 Waaseele, akhulupale, mahumu aapoovu ni anamantikha yahothukumana u Yerusalemu, 6 nkhayi ni Anasi nhooleli aanankuttho, Kayifasi, Joau, Alexantere ni amucyaawe otheene nhooleli aanankuttho. 7 Yahomweesa Peturu ni Joau iriyaryaaya ni yahaakoha yeeraka: “Niikuru caapani ni mwancina naapani mpankileenyu ila itthwiila?” 8 Peturu unancanreene nnepa wowaarya ahowiirela:
“Maliiteri aapoovu ni mahumu aapoovu, 9 ukhala wiira ilelo ninaakohakohiya nlattu wompankela itthu yomaana ula nlopwana ooheettoola, ni nnopheela ucuwela tipani nvonihile, 10 nyuuva naapoovu otheene o Isarayeli, ncuwele wiira ula nlopwanoola vonihiye mwancina na Yesu Kristu o Nasaree, ule nyuuva mmwiivileenyu wanipottoni. Masi Nluku homunweleliha, iyee, nlattu wo uyo, ula nlopwanoola hovonihiya iriyariinyu. 11 Uyo Yesu uyo, khanle ‘nluku nootekiliya nyuuva anamateka nkhottileenyu ni uyo hokhalihiya nluku nuulupale nowanloothoni.’ 12 Vano, khaavo nokhitiri unoopola, ukhala wiira khanivo-tho ncina nikhwaawe Nluku thanlilyaawe iriyari yaatthu wiira noopoliye.”
13 Ukati woonilyaaya ulipa nrima wa Peturu ni Joau, ni yaacuwenlyaaya wiira yaari atthu oohisoma, yahokhala ootikhinihiya ni yahoona wiira khweeliini ayo yahomweettana Yesu. 14 Ayo khayoona yowaakhula, kontha yahomoona nlopwana aavonihiyooyo nari nkhayi naayo. 15 Vano, yahowiirela wiira akhume nsinedriyu. Uhala waya, yahopacera woopaca mwaha ayaayooru, 16 yeeraka: “Naapankeke isiyani ala alopwanaala? Kontha khweeliini, ahopanka ntikiniho nicuweliye naatthu otheene ankhala u Yerusalemu, ni hi khaninlamuliya uvaanyiha. 17 Phimaana, wiira ila itthwiila ihimwaryeele waapoovu, nttwee niwoopopihace ni niwiirele ahituruwele-tho umuulumana ntthu yoopelaka mwaha nno ncinanno.”
18 Vano, yahowiihana ni yahowiirela wiira ahuulume-tho ni ahiitthucihe-tho itthu mwancina na Yesu. 19 Vano, Peturu ni Joau yahaakhula yeeraka: “Muupuwele nyuuva wakhala wiira ikhanle itthu yomaana wamiithoni wa Nluku, uwiiwelelani nyuuvano uhiya umwiiwelela Nluku. 20 Masi hiivano, khaninlamuliya uhiya wuuluma citthu coonileehu ni ciiwileehu.” 21 Uwoopopihaca waya-tho, yaahaahiya nlattu woohoona itthu yoopheela waattarusela ni ciicammo nlattu waapoovu, kontha atthu otheene yaanonttottopela Nluku nlattu wo itthu yeerannyeele. 22 Kontha nlopwana aavonihiyooyo aarina myaakha coopwahaka 40.
23 Ukati waahiyaciyaaya, yahorwaa uwoonanana atthari akhwaawe ni yahaattonkela citthu anankuttho oolupale ni mahumu aapoovu yaahimilyaaya. 24 Wiiwa waya iyo itthwiiyo, yahopacera unlompa Nluku, yeeraka:
“Nkhulupale thi nyuuva Pwiiya mpankile irimu, ituniya, ipahari ni citthu cotheene cirivo, 25 nvarelaka nteko nnepeenyu wowaarya, nyuuva nhohimya nimoolumo oolumilyaawe Davidi nantekweenyu ni nhiya-taateehu, mwiiraka: ‘Nlattuni atthu ankhalaaya oonyoonyiya ni nlattuni apoovu anoopuwelaaya citthu coohinamaana? 26 Mamwene owatuniyani aheetthenkaca ni akhulupale ahothukumana wiira anwanane Yehova ni ule nthanlilyaawe.’ 27 Khweeliini, Herooti ni Ponsiyu Pilatu ahothukumana ila isittattiila, naatthu omaloko makhwaawe, naapoovu o Isarayeli wiira amwaanane nantekweenyu munthanlileenyu, Yesu, 28 wiira niikuru cinyu, apanke ile impheeleenyu ni yiirannye ile ilakenleenyu. 29 Sontte Yehova, moone mananna ala atthwaala annopopihaaya ni nnikavihere hiiva anantekwenyu, uhihiyerera ulalyeera nuulumo ninyu nilipaka nrima. 30 Ni nvarele nteko ikuru cinyu wiira mwaavonihe atthu, ni mpanke mathoonyero ni mitikhiniho, mwancina na Yesu nantekweenyu owaarya.”
31 Umaliha waya ulompa, nipuro naaryaaya nahottettemela ni wahaacara nnepa wowaarya, vano yaahopacera ulalyeera nuulumo na Nluku yalipaka nrima.
32 Uhiya commo, atthu otheene yaaminni yaarina moopuwelelo mamocaaru, ni khaavo eera wiira citthu caarinaawe caari coveekhaawe, masi yammeelana citthu cotheene caarinaaya. 33 Ni maapostolu khayaahiyerera ulalya wunwelelihiya wa Apwiiya Yesu Kristu yalipaka nrima, ni otheene caya, yancaalihiya nuunamaana woonironnya wa Nluku. 34 Khweeliini, khaavo yanthwa itthu, kontha otheene yaarina inupa caya, imatta caya, yantumiha ni yanwaana nsurukhuuyo 35 ni yaanaavaha maapostolu. Ni maapostulwaayo yaanonkawela khula ntthu itthu yanthwa. 36 Iyo phi itthu yaapankilyaawe Yusufu, maapostolu yaamwiihanaaya Pernape (nataphuleliyaka maanaaya “mwaana oomaaliha”), Nlevita aayariye u Siipere, 37 aarina imattaawe. Uyo ahotumiha ni ahaawaanela nsurukhuuyo maapostolu.