Yonayeeli ya Akorintu

9 Koolumaka mwaha woovaha ncanko wiira mwaakavihere atthu ookhuluvelyaa, mi moonelwaaka pooti wahoohimyeeraakani wiira nhaana mpankaka iyo itthwiiyo. 2 Kontha mi kinaacuwela wiira nyuuva nnaapheela ukavihera, ni kinawaahimyeeraka mayamunna o Masetoniya iyo itthwiiyo keettottopaka. Miiva kinawaahimyeeraka ayo wiira mayamunna o Akaya ari owiitthenkaceene ikhumelo yo mweecana wiira akavihere, ni nwo wiikurumica winyunwo uhowiiriha atthu enci o Masetoniya upheela ukavihera. 3 Masi vano kinawaaveleeliha mayamunna, wiira wiittottopawakanwo kihimyaka wiira nnaapheela ukavihera, uhikhale wo mahala, ni wiira nthoonyere wiira khweeliini nri owiitthenkaceene khampa miiva kihimyacilyaaka. 4 Waahikhaleke commo, vano kawaaka nwo nkhayi ni mayamunna o Masetoniya ni yoophwanyakani nhiitthenkacile, nyuuva mwaatthi nnahala woona ihaaya ni hataa nihiiva ninaahala woona ihaaya, nlattu wowuukhuluvelani. 5 Phimaana, konnyaaka wiira unaahala ureera waakurumica mayamunna uwa toko wuuthotolani ni waakhelela ncanko mwaakhuluvelihileenyu wiira mwanhala uvaha. Niiyo inanneeyo, nnahala uthoonyera wiira nnovaha ninrimeenyu wotheene, kahi nlattu wookhanyererihiya.

6 Vano, koolumaka yoola mwahoola, ule naala ipyoo vakaani, ciicammo nohala uhepha vakaani, ni ule naala ipyoo yinci, ciicammo naahala uhepha yinci. 7 Khula ntthu avahe khampa cilakenlyaawe wanrimani wawe, woohicukulaca ni woohikhanyererihiya, kontha Nluku nanfenta ule novaha wantteelaka nrima.

8 Uhiya commo, Nluku haana ikuru yowuuthoonyerani unamaana wowuuronyani venci cinene, wiira ihuuthweeni hataa itthu, wankhitiriinyu uvara miteko cotheene comaana. 9 (Khampa wantikhiyaaya weeriyaka co: “Uyo naakawa woohoonela isooyo; nawaavaha atthu oohuva. Isariya irinaawe khimmala.” 10 Nluku nanvaha namalima ipyoo yinci, ni uyo nawaavaha atthu iphaawu wiira akhuure, ciicammo naahala winciviha ipyoo cinyu wiira mwaale ni ciicammo naahala winciviha ile inhaleenyu uhepha, nlattu nyuuva woweettela isariya.) 11 Nhina wo citthu cotheene, Nluku neera oocaalihakani; ni atthu anaahala unsukhuru Nluku nlattu wo micanko cinyu cinhaleehu waavaha; 12 Kontha ncanko unvaheeyu, kahi paasi unhala waaca waakavihera mayamunna ookhuluvelyaa, masi ciicammo inhala ukhala itthu inhala uwiiriha ayova unsukhurweela Nluku. 13 Ayo ananttitthimiha Nluku, kontha micanko cinyu cinawoonihera wiira nyuuva nnawiiwelela ihapari comaana cinlalyeereenyu cimmuuluma Kristu, ni cinawoonihera wiira nnovaha mpheelaka waakavihera ayo atthu ookhuluvelyaayo ni atthu akhwaawe. 14 Ni ayo anaalompaka Nluku yooromolakani nyuuva, ni anawuufentani nlattu wo unamaana woonironya unoothoonyeraaweni Nluku.

15 Ninsukhurweele Nluku nlattu wo itthu yomaana cinene inivahilyaawe ihinkhitiriihu uttonkaca.