Iwarakha yoopacera yantikheliyaaya akorintu
9 Keera miiva kintthu ootaphuwa? Keera miiva ki Apostolu? Keera miiva kihowoona Apwiiyeehu Yesu? Keera nyuuva mwaatthi nkhanle atthari a Yesu nlattu wo nteko unaavarelaaka ayo Apwiiyaayo? 2 Hataa ukhalaka wiira akinakhala Apostolu aatthu akhwaawyaayo, khweeliini, kikhanle Apostolu aawinyu nyuuva mwaatthi va! Kontha nyuuva nnawoonihera wiira miiva kikhanle apostolu Aapwiiya.
3 Itthu miiva inwaakhulaaka ale ankikoha, ikhanle phiila: 4 Niireke khanirina isariya* yoolya ni yoowurya? 5 Niireke hiiva khanirina isariya yonthela nthiyana rina waamini, toko apankilyaaya maapoostolu akiina, mayamunnaaya Apwiiya ni Sefas? 6 Awula, kiireke miiva ni Pernape phihirina isariya yoohiyerera nteko wowiilihera? 7 Natoropani aahala ukupali uvara nteko avarelaka nteko citthu cawe? Tipani naala mwiri wo uva woohilya mihokorokho caya? Awula tipani noliha inama woohiwurya ileetyaaya?
8 Kiireke kinooluma nnya citthunnya nimoopuwelelo aapinaatamu? Awula kiireke nlamulo ciicammo khaninhimya nnya citthunnya? 9 Kontha munlamuloni na Moceesi uhantikhiya co: “Nhitthuke malaku o mope ukati unkakatthaaya* itiriku.” Niireke Nluku oolumile ala moolumwaala oopuwelaka imope? 10 Awula niireke khoolumile nnya citthunnya anaacaka hiiva? Khweeliini, antikhile nnya citthunnya anuupuwelaka hiiva, kontha nlopwana nolima ni nlopwana naakattha, nopanka nnyo citthunnyo awehereraka wiira naahala waakhela itthu.
11 Wakhala wiira hiiva nihaala iriyariinyu citthu cinkhuma wa Nluku, niireke wiira khawaareera nyuuvano unikavihera nnivahaka citthu cinnithwaa? 12 Wakhala wiira atthu akhwaawe ahaana isariya yowuupankelani iyo itthwiiyo nyuuva, niireke wiira hiiva khanirina isariya nyuuva yoonipankela iyo itthwiiyo waapwaha ayo? Masi uhookhalaru commo, khaninvarela nteko iyo isariya* irineehwiiyo, masi ninaavilela wiira nihaakakathule ale yaaminni ihapari cimmuuluma Kristu. 13 Nyuuva khannocuwela wiira alopwana anvara miteko ca Nluku ntempulu anaalya citthu co ntempulu? Ni ale anvara nteko wakhilompeni anaavahiya vakaani citthu cinvahereriya wakhilompeni? 14 Inanna imocaaru, Apwiiya ahohimya wiira ale anlalyeera ihapari comaana alyeeke nlattu wo ihapari comaana.
15 Uhookhalaru commo, mi nkinatoko wuulepelani hataa itthu imoca. Khweeliini, nkinwantikhelani ila iwarakheela wiira nkivahe itthu, kontha phataari ukhwa, uhiya . . . khaavo nohala ukihiimya miiva wiittottopa! 16 Masi, miiva akinlamuliya wiittottopa nlattu woolalyeera ihapari comaana, kontha uyo nteko unlamuliyaaka uvara. Khweeliini, kaahilalyeereke ihapari comaana miiva kihotakhaliya! 17 Masi kavaraka uyo ntekooyo ninrimaaka wotheene, kinaahala waakhela itthuvo; masi hataa ukhalaka wiira akinvara ninrimaaka wotheene, Nluku hokivahacera wiira kivare uyo ntekooyo. 18 Vano, kinhala waakhelani? Kontha kalalyeeraka ihapari comaana, akinlamuliya uweherera uliviya itthu, wiira kihivarele nteko pusya ukhulupale urinaaka woolalyeera ihapari comaana.
19 Kontha hataa ukhalaka wiira kiri ootaphuwa iriyari yaatthu otheene, kiheekhaliha ipottha yaatthu otheene, wiira kikhitiri waakavihera atthu enci ukhala atthari a Kristu. 20 Kaaryaaka na ayuuta mi kaheekhaliha nyuuta, wiira kaakavihere ukhala atthari a Kristu; kaaryaaka naatthu aneettela nlamulo mi kaheekhaliha khampa ntthu neettela nlamulo, masi kipheelaka paasi wiira kaakavihere ayo ukhala atthari a Kristu. 21 Kaaryaaka naatthu ahineettela nlamulo, mi kaheekhaliha khampa ntthu hineettela nlamulo, hataa ukhalaka wiira kihaana nlamulo na Nluku ni kineettela nlamulo na Kristu, kaapanka commo wiira kaakavihere ayo atthwaayo ukhala atthari a Kristu. 22 Kaaryaaka naatthu oololova, kaheekhaliha ntthu oololova. Wiira kikhitiri waakavihera ukhala atthari a Kristu, kaheekhaliha citthu cottheene uhoolo waatthu omakhalelo otheene, wiira wakhitiryaavale yoopwee atthu akhwaawyaayo. 23 Kineekurumica upanka citthu cotheene nnya, wiira kikhitiri waalalyeera ihapari comaana atthu otheene.
24 Khannocuwela wiira atthu ampanka masinttaano ootthawiya, mmoca paasi phintthema ni phinaakhela itthuvo? Ntthawe nimananna wanhaleenyu ukhitiri utthema. 25 Otheene ale ampanka masinttaano ootthawiya, anawiivaraca nhina wo citthu cotheene. Ampanka iyo itthwiiyo wiira yaakhele itthuvo inhala umalamala, masi hiiva nimpanka iyo itthwiiyo wiira naakhele itthuvo ihinhala umalamala. 26 Phimaana, akintthawa kihicuwelaka unrwaaka, ni akinaattakana khampa wiira kinaatta iphyoo; 27 kinaattarusa irutthwaaka ni kinaweettiha khampa ipottha, kontha kaahipankeke commo, hataa ukhalaka wiira kinaalalyeera ihapari comaana, Nluku pooti ukinyanyala.