Yoopacera ya Tiyaku
1 Miiva Tiyaku, ipottha ya Nluku ni ya Apwiiyeehu Yesu Kristu, maloko 12 otheene amwaryenle:
Isalamu!
2 Mayamunna, mwattehattehiyaka, wuutteeleni nrima, 3 ukhala wiira nnaacuwela wiira waamini winyu wattehattehiyaka unaawiirihani uvilela. 4 Masi nhiyeke wiira uvilela winyu umalihere ntekwaaya, wiira nyuuva nkhale oolikana ni woohitafaawuti nhina citthu cotheene ni woohuuhaleelani itthu.
5 Phimaana, wakhala wiira iriyariinyu haavo ntthu hirina ucuwelaca, hihiyerere unlepela Nluku, kontha Nluku nawaavaha atthu otheene woohittekutta ni uyo ciicammo naahala uvahiya. 6 Masi uyo ntthuuyo hihiyerere ulepela aaminiki woohaanyihacera itthu, kontha ntthu hinaamini nolikanaca ni niwimpi no mpahari nincisiya khula mphantte iphyoo impheelaaya urwaa. 7 Khweeliini, uyo ntthuuyo khanlamuliya uweherera waakhela itthu ya Yehova; 8 khancuwela itthu yoolakela, khantthara itthu imoca nhina citthu cimpankaawe.
9 Munna oothwennya atteeliye* nlattu wowuunuwihiya wawe, 10 ni thaciri atteeliye kontha uthaciri wawe unaahala umalamala, ukhala wiira thaciri nohala ukhala toko ifoloori yontakhwani ihimpica wuuma. 11 Kontha ncuwa nakhumaka ni navihaka venci, ninawuumiha mwiri ni ifolooryaaya inaamora ni ureera waya unaamalamala. Iyo itthwiiyo phinhala umwiirannyeela thaciri, uyo naahala umalamalihiya nkhayi ni maalyaawe.
12 Otteeliya phuule hinhiyerera uvilela attehattehiyaka, kontha ukati unttehattehiyaawe uyo naahala utthuveliya ukumi Yehova naakhuluvelihaawe ale ahinhiyerera unfenta. 13 Mwattehattehiyaka nhiire: “Kinaattehattehiya ni Nluku.” Kontha Nluku khanlamuliya uttehattehiya ni citthu coohinamaana, ni uyo ciicammo khanontteha-tteha ntthu. 14 Masi, khula ntthu nottehattehiya ni itthu inoncivela ni itthu impheelaawe. 15 Vano, upheela wawe wantepelaka* unaamwiiriha uvara itampi, ni avaraka itampi inanwaanela ukhwa.
16 Mayamunna, nhiithepye. 17 Itthuvo cotheene comaana cinkhuma wa Nluku wa Apaapa yumpile iluusu co wiirimu, ayo khanrukunuwa toko ntthuuci uhineemela nipuro nimoca. 18 Uyo numpile nuutthuna wawe ni nuulumo nawe neekhweeli, wiira nikhale mihokorokho coopacera nhina citthu cumpilyaawe.
19 Mayamunna, nhiliyale ila itthwiila: Otheene cinyu nhaana mwaakuvaka wiiwa, masi uhaakuva wuuluma ni uviruwa, 20 kontha uviruwa waapinaatamu khunwaana isariya ya Nluku. 21 Phimaana, nhiye upanka citthu co watuniyani ni citthu caya coohiloka cotheene,* ni nkupali nuunamaana nuulumo ninkhitiri uwoopolani.*
22 Vano, nkhale atthu oweettela nuulumo kahi paahi atthu owiiweelela nuulumo, mwiithepyaka ni moopuwelelo oohinamaana. 23 Kontha ule niiwelela nuulumo heettelaka, nolikana ni nlopwana noweha ikhovyaawe muspeliyuni. 24 Kontha uyo nlopwanooyo nawiicoona ni naarwaa, ni woohipica naaliyala mananna ciryaaya ikhovyaawe. 25 Masi, ule nosomasoma nlamulo noohipahuwa nintaphula ni hinhiyerera, nokhala ntthu kahi neewelela ni woohipica noliyala, masi ntthu neettela nlamulo, ni uyo naahala ukhala otteeliya nhina citthu cotheene nohalaawe upanka.
26 Wakhala wiira ntthu noopuwela wiira nanswalela Nluku,* masi hivaracaka nlimi nawe, uyo nawiithepya ni uswali wawe ukhanle womahala. 27 Inanna yooswali* yooloka ni yomaana wamiithoni wa Nlukwiihu ni Apaapeehu phiila: Waatafiti akhwaacuni ni waatafiti anankhweli mmasakhani waya ni unyema unanarihiya niila ituniyeela.