Yoopacera ya Peturu

5 Phimaana miiva ciicammo kikhanle humu, kihoona uhuva wa Kristu ni kinaaweherera uttitthimihiya ukati unhalaaka wunwelelihiya wamoca naale athanliye. Kinwiirela* mahumu ari iriyariinyu co: 2 nwacere ikhontwaa ca Nluku civahaceriyeenyu, mwahoolelaka* nlattu woopheela wanrimani winyu uhoolo wa Nluku kahi nlattu wookhanyererihiya; kahi wiira mwiiphwanyihe ifayita* masi ntteeliyaka nrima; 3 woohaahuviha ale akhanle a Nluku, masi nkhalaka atthu ooreera utakihiya. 4 Ni, ukati makampuci muulupale nohalaawe wooniheriya, nyuuva nnaahala waakhela itthuvo yoottitthimihiya ihimmala-mala.

5 Inanna imocaaru, nyuuva amirawo nwiiwelele atthu oolupale.* Ni otheene winyu mwiiyevihe* uhoolo wakhunaninyu, kontha Nluku unrusa atthu owiithenca masi nawaathoonyera unamaana woonironya atthu owiiyeviha.

6 Mwiiyevihe muntatani nokuru na Nluku, wiira nuuwakatyaaya uyo awunnuwiheni. 7 Munvonyeraka Nluku citthu cotheene cinoohelani isukhuli,* kontha uyo nawuuwacerani. 8 Nkhale atthu aakhili ni nhiitthaale! Nwananiinyu Sotwani noweettani uttuli, khampa kharamu neepa nrunkulu antothaka ntthu onkhuura. 9 Masi munkhottele uyova, nlipihacaka waamini winyu, ni ncuwelaka wiira masakha anookhumelelani nyuuva, mayamunneenyu ntuniyani motheene anawaakhumelela. 10 Masi, nnahuvileene ukati vakaani, mwaneene Nluku noonihera unamaana, wiihanenleni uttitthima wawe woohimala urinaawe nkhayi ni Kristu, naahala umalihera wiitthucihiya winyu. Uyo naahala wuulipihani, naahala wuuvahani ikuru ni naahala uweesani nipuro noolipa. 11 Ikuru cikhanle caawawe mahuku otheene. Amem.

12 Mi kihowantikhelani moolumo vakaani nhina ila iwarakheela kikaviheriyaka ni Silvanu,* wiira kuulipiheni ni kiwuupusereni unamaana woonironya weekhweeli wa Nluku. Nvaresese uyo unamaanooyo. 13 Nthiyana nokhala u Babilooniya thanliye toko nyuuva, nawuuveleeliherani isalamu, ni ciicammo Markus mwaamwanaka. 14 Nsalaamihane nvahanaka ipeecu yonifento.*

Nnema nikhale ni nyuuva nnaataana ni Kristu.