Iwarakha yoopacera yantikheliyaaya akorintu
10 Mayamunna, kimpheela ncuwele wiira asinhiyataateehu yaholapuwa ipahari yakaviheriyaka ninihutte, 2 ni otheene yahopattisiya ni mahutte ni niipahari nlattu wontthara Moceesi, 3 otheene yaaholya iyoolya imocaaru yaavahiyaaya ni Nluku, 4 ni yahowurya iviinyu imocaaru yaavahiyaaya ni Nluku. Kontha, yaawurya maaci yaavahiyaaya ni Nluku yaakhuma wamwalani, ni uyo mwalooyo waathoonyera ukhala Kristu. 5 Uhookhalaru commo, Nluku khayaacivenle itthu yaawiirannyenle encyaayo, kontha yahokhwa muuthakoni.
6 Ayo akhanle ntakihero nomaana ninniitthuciha itthu, wiira cihinicivele citthu caahala uniwaanela masakha, khampa ayo caacivenlyaaya. 7 Toko asarayeli akhwaawe waapankilyaaya; yaaciyaka ayo, uhantikhiya co: “Apoovu yahonkoma wiira alye ni awurye. Ni yahonwa wiira yiine ni yiilawe.” 8 Ni niheette uluva toko asarayeli akhwaawe yeettilyaaya, ni ninyeme urupihana woohiloka, wiira nihikhale toko asarayeli yaapankile iyo itthwiiyo, yakhwaaka nihuku nimoca paasi atthu 23.000. 9 Ni nihinttehattehe Yehova toko asarayeli yanttehattehilyaaya ni yiivakaciyaka ni inwaa. 10 Nihikhale atthu ooroka toko asarayeli akhwaawe caaryaaya, ni nlattu wo iyo itthwiiyo yiiviyaka ninlayikha. 11 Nnya citthunnya ciiranyaale wiira cinivahe ntakihero ni cantikhiye wiira ciniitthucihe hiiva, wiira hiiva ninkhala ala mahuku ookhiceraala nihikhale toko ayo atthwaayo.
12 Phimaana, ule noopuwela wiira ri oolipa nhina mminepani, ratta wiira himore. 13 Inanna cinttehattehiyeenyu nyuuva ciicammo, atthu akhwaawe phinttehattehiyaaya. Masi ukhala wiira Nluku khanle ookhuluvelyaa, uyo khanhala wuuhiyererani nttehattehiyaka mpaka nhinhaleenyu ukhitiri uvilela, nkupali wiira mwattehattehiyaka vale, uyo naahala waavererya mananna wiira nkhitiri uvilela.
14 Phimaana, mayamunnaaka oofentiya, nnyeme waaswalela anluku oohikhweeli. 15 Kinoohimyeerani nnya citthunnya kontha nyuuva mwaatthu nhaana ankhili. Phimaana, nlakeleke mwaaneeneenyu wakhala wiira kinooluma ikhweeli awula mena. 16 Niireke ikoopu yo iviinyu inonsukhurukwiihu Nluku khinakhala iphome ya Kristu? Vano niireke iphaawu ninkawanakeehu khinakhala irutthu ya Kristu? 17 Ukhala wiira iri iphaawu imoca nihookhalaru atthu enci, hiiva nikhanle irutthu imoca, kontha otheene cihu ninkhuura iphaawu imocaaru.
18 Nwuupuwele asarayeli: Ukati unlyaaya citthu cinvahereriya wakhilompeni, keera unlikana ulya ni Nluku? 19 Vano isiyani impheelaaka uhimya ni ala moolumwaala? Niireke itthuvo invahereriyaawe Nluku oohikhweeli ihaana ifayita? Awula nluku oohikhweelyuuyo haana ifayita? 20 Mena; masi kinoohimyeerani wiira atthu ontuninyani, citthu cinvahereraaya anvaherera maciini, kahi Nluku. Ni miiva akimpheela wiira nkavihere hataa vakaani citthu cimpankaaya maciini. 21 Nyuuva khannolamuliya uwurya itthu iri nkoopuni ya Yehova ni ciicammo uwurya itthu iri nkoopuni yo maciini; khannolamuliya ulya wameecani a Yehova ni ciicammo wameecani o maciini. 22 Awula nimpheela umwiiriha Yehova wunla ihace? Niireke hiiva nihaana ikuru umpwaha uyova?
23 Citthu cotheene cinaatthunihiya* upanka, masi kahi wiira cotheene cihaana ifayita. Citthu cotheene cinaatthunihiya upanka, masi kahi wiira cotheene cinaalipiha. 24 Khula ntthu haana waavya upanka itthu inomphwanyiha ifayita nkhunanawe, kahi inomphwanyiha ifayita uyova.
25 Nkhuure woohikohakoha inama cotheene cintumihiya upacari, wiira nlye nhuupuwelaka wiira nhottheka, 26 kontha Yehova phimwaneene ilapo ni phimwaneene citthu cotheene cimphwanyannya nlaponimmo. 27 Wakhala wiira ntthu hinonkupali Kristu nawuulattulani uwannyawe wiira mwalye, ni nyuuva nrwaaka, mwalye citthu cotheene citthenkaciye woohikohakoha, wiira nlye nhuupuwelaka wiira nhottheka. 28 Masi, wakhalaka wiira ntthu naawiirelani co: “Ila inameela hovahereriya nluku oohikhweeli,” nhikhuure iyo inameeyo wiira nhinkakathule ntthu oohimyenrennyuuyo ni ciicammo nlattu wo moopuwelelo, 29 akinaacaka moopuwelelweenyu, masi kinaaca wuupuwela wawe ntthuuyo wiira nyuuva nhottheka. Kontha kimpheela wiira utaphuwa waka uhihukhumwiye nintthu nkhwaawe. 30 Wakhala wiira kinanlompa Nluku kinsukhuruku itthu kinlyaaka, nlattuni waahalaaka uhukhumwiya nlattu woosukhuru itthu kinlyaaka?
31 Phimaana, mwalyaaka, mwawuryaka ni hataa woopanka khula itthu, mpake citthu cotheene nimananna anonttitthimiha Nluku. 32 Nhaakakathule ayuuta, akereeku ni hataa atthu owanlokoni na Nluku, 33 toko miiva kineekurumicaaka waatteeliha nrima atthu enci nhina citthu cotheene, kihaavyaka upanka citthu cinkiphwanyiha ifayita miiva, masi citthu cinaaphwanyiha ifayita atthu enci wiira yoopwee.