Iwarakha yoopacera yantikheliyaaya akorintu
3 Phimaana mayamunna, mi akiwuulumanneni khampa atthu aneettiheriya ni nnepa wowaarya wa Nluku, masi khampa atthu cinaacivela citthu co ila ituniyeela, ni khampa atthu ahineeweeha sana-saana myaha ca Kristu. 2 Mi koolihileni ileeti, kahi iyoolya yoolipalipa, kontha nyuuva mwaari nhinalipa sana-saana nhina mminepani, ni khweeliini khannaaya ukhala oolipa, 3 ukhala wiira nanlelo cinawuucivelani citthu co ila ituniyeela. Ni ukhala wiira nyuuva mwaatthi va nnawoonelana nttima ni nnanyakulihana, niireke wiira khannaavya citthu co ila ituniyeela? Ni khanrina makhalelo aatthu o ila ituniyeela? 4 Kontha ntthu eeraka co: “Mi kiri mphantte wa Paulu,” masi nkhwaawe eeraka: “Mi kiri mphantte wa Apolu,” niireke wiira nyuuva khannotthonyera ukhalana meettelo aatthu o ila ituniyeela?
5 Apolu tipani? Paulu tipani? Ayo akhanle paasi anamalalyeera, yuukaviheenreni ukhala atthari a Yesu, khampa caarumiyaaya na Apyiiwa. 6 Mi kihaala, Apolu homicera, masi Nluku hoonuwiha. 7 Phimaana, ule naala ni ule nomicera, khaarina ifayita unvikana Nluku ule noonuwiha. 8 Phimaana, ule naala ni ule nomicera anvaraca nteko mmocaaru, masi khula ntthu nohala waakhela itthuvwaawe, uweheriya khula ntthu nteko novaraawe. 9 Hi ninvara nteko ni Nluku. Nyuuva nkhale imatta cinlimiya ca Nluku, nkhanle inupaawe.
10 Nlattu wo unamaana woonironya wa Nluku kivahiyaaka, mi kihaateka aliseerise khampa namatekateka ooratta, masi ntthu nkhwaawe phinteka waculu ayo aliseerisyaayo. Phimaana, khula ntthu awehacere mananna cintekaawe waculu ayo aliseerisyaayo. 11 Khaavo nolamuliya waateka aliseerise akhwaawe, ahikhanle ale atekiye, khanle Yesu Kristu. 12 Wakhalaka wiira ntthu naateka waculu aliseereseva niiwooru, niiparaata, nimaluku owooru awula niithaapwa, nimalasi ni, nimakutthi, 13 naphiyaka nihuku naya iyo inupeeyo, inaahala wooniya wakhala wiira ntthuuyo aatekile yoolipa awula mena; kontha mooro unaahala woonihera wakhala wiira iyo inupa yaatekilyaaweeyo, yaari yoolipa awula mena. 14 Vano, wakhalaka wiira inupa ntthuuyo itekilyaawe waaliseereseni va khinhala uvyaa, uyo naahala waakhela itthuvo; 15 wakhalaka wiira inupa itekilyaawe ntthuuyo inaavya, uyo naahala uhaleela citthu cawe, masi mwaneennyooyo naahala woopwa, hataa oopwaaka, unhala ukhala khampa uyo oopweele wamooroni.
16 Nyuuva khannocuwela wiira nkhale itempulu ya Nluku ni nnepa wowaarya wa Nluku uri wamoca ni nyuuva? 17 Ntthu akwanyulacaka itempulu ya Nluku, Nluku ciicammo naahala unkwanyulaca uyo ntthuuyo; kontha itempulu ya Nluku ikhanle yowaarya ni nyuuva mwaatthi nkhale itempulu ya Nluku.
18 Hikhale ntthu neethepya: wakhalaka wiira haavo neecoona ukhala oocuwelaca mu ntuniyani woohinamaana mu, uyo ntthuuyo akhale nlolo, wiira akhalane ucuwelaca weekhweeli. 19 Kontha ucuwelaca wo ila ituniyeela, Nluku noona ukhala ulolo, kontha uhantikhiya co: “Uyo nawaavarihaca atthu oocuwelaca muulavilavini waya.” 20 Ni ciicammo: “Yehova naacuwela wiira moopuwelelo aatthu oocuwelaca khamphureliya itthu.”* 21 Phimaana, nhiittottope nlattu wo citthu cimpankaaya apinaatamu; kontha citthu cotheene cikhanle cawinyu; 22 hataa akhalaka Paulu, hataa akhalaka Apolu, hataa akhalaka Sefas, hataa ikhalaka ituniya, hataa ukhalaka ukumi, hataa ukhalaka ukhwa, hataa cikhalaka citthu co mahukwaala ni hataa citthu cinhala uwa, cotheene cikhanle cawinyu. 23 Ni nyuuva mwaatthi nkhale atthu a Kristu; ni Kristu khanle a Nluku.