Iwarakha yoopacera yantikheliyaaya akorintu
15 Vano mayamunna, kimpheela uwuupuserani ihapari comaana cuulalyenryaakani, citthunileenyu ni cilakenleenyu weetteela. 2 Nlattu wo nnyo ihapari comaanannyo, nyuuva nnawoopoliya, wakhalaru wiira khannohala uhiya uvaresesa; masi mwaahipankeke iyo itthwiiyo, nyuuva mwaatthi mwaamini mahala.
3 Kontha nhina citthu coopacera cuuhimyenryaakani, ihaavo ciicammo kaahimeriyaaka: wiira Kristu khwile nlattu wo matampiihu, toko cinhimyaaya Cowantikhiya Cowaarya; 4 wiira ahovithiya ni ahonwelelihiya nihuku noneeraru, toko cinhimyaaya Cowantikhiya Cowaarya; 5 ni wiira ahonkhumelela Sefas, ni wahoolo ahaakhumelela eetthucyaawe 12. 6 Nuuwakatyaaya, ahaakhumelela mayamunna ookhalaka 500, wonkwaha mmoca. Encyaayo ari nkhayi ni hiiva, uhookhalaru wiira akhwaawyaayo ahokhwa. 7 Vano, ahonkhumelela Tiyaku ni maapoostolu akhwaawyaayo. 8 Masi wiimaleloni, ahokikhumelela ciicammo miiva, toko mwaana ooyariya uhinaphiya ukati.
9 Kontha miiva, kikhanle apostolu ooverihela* uhikhalana ifayita nhina maapoostolu otheene, ni khunkiphwanela wiihaniya apostolu, kontha kihaalupattha atthu yanswalela Nluku. 10 Masi nlattu woonamaana woonironya wa Nluku, nna co miiva kaapoostolu. Ni uyo unamaanaawe woonironyooyo khakoonihenre mahala. Mi kihovara nteko mwinci waavikana maapoostolu otheene. Masi kahi wiira uyo ntekooyo kinkhitiri uvara nlattu wo ikuru caka, mi kinkhitiri uvara nlattu wo unamaana wa Nluku. 11 Phimaana, miiva awula maapoostolu akhwaawyaayo, ninlalyeera ihapari cimocaaru, ni nyuuva nhaamini nnyo ihaparinnyo.
12 Vano, wakhala wiira hiiva ninlalyaa wiira Kristu honwelelihiya, vano kontha isiyani atthu akhwaawe ari iriyariinyu aneeraaya wiira khunhala ukhala wunwelelihiya waatthu ookhwa? 13 Wakhala wiira khunhala ukhala wunwelelihiya waatthu ookhwa, paasi Kristu khonwelelihiye. 14 Vano, wakhala wiira Kristu khonwelelihiye, ulalyeera wihu khunafayita ni waamini winyu ciicammo khunafayita. 15 Wakhala wiira atthu ookhwa khanhala wunwelelihiya, ninkhala masaahiti owootha a Nluku, kontha ninvaha usaahiti wiira Nluku homunweleliha Kristu, masi himunwelelihile. 16 Kontha wakhala wiira atthu khanhala wunwelelihiya, paasi ciicammo Kristu khonwelelihiye. 17 Ni wakhala wiira Kristu khonwelelihiye, waamini winyu khurina ifayita ni matampiinyu khaaleveleliye. 18 Ni wakhala commo, ale akhwile* khanhala wunwelelihiya-tho. 19 Wakhala wiira unweherera wihu Kristu uri wo yoola ukumi urineehuuloola, paasi hiiva ninaapheela wooneliya uthunku cinene waavikana atthu otheene.
20 Masi ikhweeli phiila, Kristu honwelelihiya muukhwani, ni iriyari yaatthu otheene akhwile, uyo phipacenre wunwelelihiya wiira akhale wiirimu. 21 Kontha, ukhala wiira ukhwa uwile nlattu wanlopwana mmoca, wunwelelihiya waatthu ookhwa, ciicammo uwile nlattu wanlopwana mmoca. 22 Kontha toko atthu otheene ankhwaaya nlattu wa Atamu, ciicammo atthu otheene anaahala waakhela ukumi nlattu wa Kristu. 23 Khula ntthu ukatyaaweru: upacera Kristu, wahoolo, ale anontthara Kristu, ukati unhalaawe uwa. 24 Wuumaleloni, naahala waaturusela athumwaane Umwennyooyo, namalamalihile ikuvernu cotheene, uttitthima wotheene ni ikuru cotheene. 25 Kontha uyo haana alamulelaka, mpaka ukati Nluku nohalaawe uweesa awanannyaawe otheene vathi inyaa cawe. 26 Nwanani nohala umalela umalamalihiya, ukhanle ukhwa. 27 Kontha Nluku “honvahacera citthu cotheene ciri vathi inyaa cawe.” Masi, ukati wenryaawe wiira ‘hovahaceriya citthu cotheene,’ khanhela nhina Ule* nvahacenre citthu cotheene. 28 Vano avahaceriyaka citthu cotheene, uyo ciicammo naahala umwiiwelela Nluku nvahacenre citthu cotheene, wiira Nluku ahoolele citthu cotheene.
29 Vano, wakhala wiira citthunnyo kahi phinhalaaya wiirannya commo, isiyani inhalaaya upanka ale ampattisiya wiira akhwe? Wakhala wiira atthu ookhwa khanhala wunwelelihiya, kontha isiyani ayo atthwaayo ampattisiyaaya wiira akhwe? 30 Nlattuni hiiva ciicammo cinnikhumelelaaya citthu cowoopiha khula ukati? 31 Miiva kinawaanana ukhwa khula mahuku. Iyo itthwiiyo ikhanle ikhweeli, khampa kineettottopaaka nlattu waawinyu mayamunna, nkhanle atthari a Kristu Yesu, Pwiiyeehu. 32 Ifayitani inhalaaka uphwanyera, waanana waka u Efesu inama cowoopiha, toko yaanannyaaya atthu akhwaawe? Wakhala wiira atthu ookhwa khanhala wunwelelihiya, “paasi nttwee nilye ni niwurye, kontha meelo ninaahala ukhwa.” 33 Nhithepiye: Apatthani oohinamaana, anaahonona makhalelo omaana. 34 Nlokihere makhalelweenyu mweettelaka isariya ni nhivaraka matampi, kontha atthu akhwaawe khaanoncuwela Nluku. Kinoolumaca commo wiira kiwoonihaceni ihaaya.
35 Masi haavo nohala ukoha co: “Atthu ookhwa anhala wunwelelihiya manannani? Anhala wunwelelihiya niirutthuni?” 36 Nlolo! Keera waalaka itthu, impacera ukhwa vano wahoolo phinkhalaaya ikumi? 37 Ni itthu inaaleeyo, khinakhala phi mwiri unhala wunnuwooyo, masi inkhala itthaka yankaani, hataa ikhalaka yotiriku ni hataa ikhalaka itthaka ikhwaawe; 38 masi Nluku nawiiriha wuunuwa iyo itthakeeyo khampa cimpheelaawe, ni khula itthaka inawunnuwa khampa cimphwanelanaaya. 39 Kahi wiira inama cotheene cinaalikana, ihaavo inama yantthu, inama yomope, inama yonuni ni inama yohopa. 40 Cihaavo irutthu co wiirimu ni irutthu co va watuniyani va, masi ureera waya irutthu co wiirimu, unaavirikana nuureera wo irutthu co va watuniyani va. 41 Ureera woncuwa, unaavirikana nuureera wo mweeri, ni ureera wotthonttwa unaavirikana, khula itthonttwa irenre manannaayaru.
42 Iyo phiitthu ineerannya naatthu ookhwa anonwelelihiya. Irutthu inkhweeyo inawuntta ni irutthu inonwelelihiyeeyo khinontta. 43 Irutthu insikhiya khinttitthimihiya, masi yonwelelihiyaka vale inaattitthimihiya. Ni irutthu insikhiya* khinkhalana ikuru masi yonwelelihiyaka inaakhala ikuru. 44 Irutthu insikhiya inaakhalana ithayi ni iphome, masi yonwelelihiyaka inkhala yonnepa. Wakhala wiira ihaavo irutthu yothayi ni yophome, ciicammo ihaavo irutthu yonnepa. 45 Uhantikhiya co: “Nlopwana oopacera Atamu aahovahiya ukumi.” Masi Atamu oomalela hokhala nnepa unvaha ukumi. 46 Masi kahi irutthu yonnepa phimpacera, impacera irutthu yonama ni yophome, nuuwakatyaaya phinwaaya irutthu yonnepa. 47 Nlopwana oopacerooyo phattuwacile watuniyani vaava ni ompiye nintthupi notthaya; masi nlopwana onayeelyuuyo nokhuma wiirimu. 48 Khampa caaryaawe nlopwana ompiye nintthupi notthaya, commo phiryaaya atthu ankhala va watuniyani va; ni khampa ciryaawe ule aawile akhumaka wiirimu, commo phiryaaya ale ankhala wiirimu. 49 Ni toko cinlattileehu ule ompiye nintthupi notthaya, hi ciicammo ninaahala unlatta ule ompiye niirutthu yo wiirimu.
50 Masi kinwiirelani co mayamunna: ithayi ni iphome khancinkela Muumweneni wa Nluku, ni hataa itthu inontta khinweherera uhuntta. 51 Nkiviriyane, kimpheela wuuhimyerani isiri ya Nluku: Kahi wiira atthu otheene ninaahala ukhwa, masi otheene cihu ninaahala utatusiya, 52 woohipica-pica, toko uphila nuuweha, wanhalaaya woopiya nipalapatta ikwaha yoomalela. Kontha nipalapatta ninaahala uruma cinene ni atthu ookhwa anaahala wunwelelihiya niirutthu ihinhala ukhwa, ni hiiva ninaahala utatusiya. 53 Kontha ila irutthu inontteela, inlamuliya ukhala irutthu ihinontta, ni ila irutthu inkhweela inlamuliya ukhala irutthu ihinkhwa. 54 Vano, ukati irutthu inontta unhalaaya ukhala irutthu ihinontta, ni ukati irutthu inkhwa inhalaaya ukhala irutthu ihinkhwa, anaahala wiirannya ala moolumwaala: “Ukhwa uhomalamalihiya.” 55 Weeva ukhwa, ciri vayi ikuru cannyo? Iri vayini iyuuma weevelaa? 56 Iyuuma ineeva akhanle matampi, ni ikuru yo matampi nikhanle nlamulo. 57 Asukhurweeliye Nluku, kontha uyo naaniiriha utthema anvarelaka nteko Pwiiyeehu Yesu Kristu!
58 Phimaana mayamunnaaka, nkhale oolipa, oohittikhinyaa, ni mwiikurumice cinene waavarela nteko Apwiiya, ncuwelaka wiira nteko unaavareleenyu Apwiiya khunakhala womahala.