Yoopacera ya Tiyaku
3 Mayamuuna, khanlamuliya ukhala atthu enci owiitthuciha iriyariinyu, kontha ninaacuwela wiira ninaahala urwaa waakhela ihukhumu yootepa uwerya. 2 Kontha atthu otheene ninaattheka* imaara cinci. Akhala ntthu hinttheka nimoolumacerwaawe uyo ntthuuyo khapahuwile, ni naakhitiri uwehaweha irutthwaawe yotheene. 3 Nahelaka nkhoyi mwaano waya ikhavalu wiira iniiweleleke, ninaakhitiri weettiha iyo ikhavalwiiyo. 4 Nwuupuwele apaketi: Hataa akhalaka oolupale ni apuruliyaka ni iphyoo cuulupale, ayo aneettihiya ni ileemi yankaani, arwaaniyaka khula mphantte umpheelaawe ule nomweettiha.
5 Inanna imocaaru, nlimi nikhanle mphantte mwankaani wo irutthwiihu, masi nno ninawiittottopa citthu cinci. Mooro vakaani pooti uparihela itakhwa yuulupale! 6 Nlimi ninlikana ni mooro. Nhina wo miphantte cotheene co irutthwiihu nlimi nihocarana citthu coohisariya, kontha nno ninaananariha irutthu yotheene ni mpaka upaha ukumi wotheene.* Ni moorwaaya unkhuma Uceheena.* 7 Kontha inama cotheene contakhwani apinaatamu anaakhitiri ulaka ni ukhalana inama coovava, inama cowiipurula, ni inama commaacini pooti ulakiya ni cineera cikhalaniyaka ni cilakiyaka. 8 Masi khaavo pinaatamu nokhitiri ulaka nlimi nawe. Nlimi khaninlakiya ni ninaawaana masakha ni ninoocarana iveneenu. 9 Ninlimi nihu ninawaattottopela Apaapeehu Yehova, ni ciicammo ninawaalaphakaca aatthu yumpiye “alattanihika ni Nluku.” 10 Mwaano wihu anaakhuma moolumo ooreera ni oolaphakaca.
Mayamuuna, khinakhala itthu yomaana ukhala ayo manannaayo. 11 Niireke iluusi imocaaru inaakumiha maaci oociva ni maaci oohiciva? 12 Mayamuuna niireke mwiri wofiiku pooti wiima mihokorokho co oliveera, awula mwiri wo uva pooti wiima ifiiku? Ciicammo iluusi yo maaci oowaawa maakha khinkumiha maaci oociva.
13 Tipani rina ucuwelaca ni ankhili iriyariinyu? Wakhala wiira ahaavo, athoonyere ni meettelwaawe ni citthu cimpankaawe nuunamaana, unoonihera ukhala namacuwelaca. 14 Wakhala wiira wanrimani winyu nhaana ihace ni uhiiwanana,* nhiittottope ni nhoothe nveehaka itthu ikhanle yeekhweeli. 15 Nwo ucuwelacanwo khunkhuma wiirimu; ukhanle wo watuninyani, wo inama ni wo maciini. 16 Kontha nipuro niryaaya ihace, uhiiwanana, nno nipuronno ciicammo khiivo inloka ni citthu cotheene cootakhala cinaakhala nno nipuronno.
17 Masi ucuwelaca wo wiirimu, yoopacera ukhanle womaana, wonnema, woohirikarika, woohipica wiiwelela, woocarana uthunku, woocarana mihokorokho comaana, woohaathanla atthu ni woohootha. 18 Uhiya commo, nhokorokho wosariya unaaliya nipuro uri nnema ni anaaleliya ale unaacivela ukhala ninnema naakhunanaya.