Yantikheliyaaya a Efesu
6 Asaana, nwiiwelele asipaapeenyu, wamoca ni Aapwiiya, kontha iyo ikhanle itthu inoncivela Nluku. 2 “Waattitthimihe athumwana ni anumwana” nno phiri nlamulo noopacera nirina inatiri ineera: 3 “Wiira citthu cotheene ciweettele saana, ni wiira ukhale va watuniyani va mahuku menci.” 4 Ni ayari, nhaanyoonyihe asaaniinyu, masi nhihiyerere uwuunuwiha mwaalakaka ni mwawiitthucihaka* malakihero a Yehova.
5 Nyuuva anantekovaa, nwiiwelele mapatarawiinyu nwoovaka ni mwaattitthimihaka ninrimeenyu wootheene, khampa cimmwiiweleleenyu Kristu, 6 kahi paasi wakhalaka wiira nnawooniya, mwapheelaka wiira mwaatteelihe nrima apinaatamu, masi ukhala wiira nyuuva nkhanle iphottha ca Kristu, mpanke ile inoncivela Nluku niiroohweenyu yotheene. 7 Munvarele nteko patarawiinyu ninrimeenyu wootheene khampa wiira nnonvarela nteko Yehova, kahi khampa pinaatamu. 8 Kontha nyuuva mwaatthi nnaacuwela wiira Yehova naahala unlivyaanihera khula ntthu itthu yomaana impankaawe, ntthuuyo pooti ukhala ipottha awula mena. 9 Ni nyuuva ciicammo nnovareliya nteko va, mwaatafitiki inanna imocaaru ale anoovarelani nteko, nhiwoopopihaka, kontha nnaacuwela wiira nrina Pwiiya mmocaaru ni uyo nokhala wiirimu ni khanonthanla ntthu.
10 Woomalihera, nhihiyerere ulipihiya ni Apwiiya niikuru caya cinci. 11 nwarele ikaruma co ikhotto ca Nluku, wiira nkhitiri ukhala oolipa uhoolo wo itapha* ca Tiyapu; 12 Kontha nyuuva nnaacuwela wiira hiivano niri niikhotto kahi niiphome ni hataa niithayi, masi ni maciini ari wiirimu ni akhanle ikuvernu ni ciicammo akhulupale o ila ituniya yooripeleliyeela. 13 Phimaana mayamunna, nwarele ikaruma co ikhotto ca Nluku cotheene, wiira nkhale oolipa mwattehiyaka vale ni nnapankileene citthu cotheene, nhihiyerere ukhala oolipa.
14 Phimaana, mwiilipihace nwarelaka isintu yokhweeli, ni nwaraka iyuuma inkhikicera ikhakaaca, ikhanle isariya. 15 Ni nware isantaaliya cinyu nkhalaka owiitthenkaceene wiira nlalyeere ihapari comaana cinooluma nnema. 16 Uhiya nnya citthunnya, ciicammo nvarele nteko nikhikicero nuulupale, nikhanle waamini, nnohaleenyu ukhitiri uttipihera masonka otheene oopharela a Ntakhali. 17 Ni ciicammo nware ikapaseeti, ikhanle woopwaa, ni nicise ikatana* yonnepa wowaarya, iyo maanaaya, nuulumo na Nluku, 18 khula ukati nhihiyerere ulompa ni ulepela isontte mweettiheriyaka ninnepa wowaarya. Masi wiira nkhitiri upanka iyo, nhiitthaale, nnolamuliya waalompela otheene ale akhanle ookhuluvelya. 19 Ciicammo nkilompele miiva, wiira kivahiye moolumo ukati unhalaaka uphela wuuluma, ni wiira kikhitiri wuuluma kilipakoono nrima ukati unhalaaka uphela uhimyaca isiri cowaarya co ihapari comaana, 20 cikirumilyaawe Nluku ulalyeera ni cikiirihile utthukiya nuunyolo. Ni munlepele wiira akikavihere wuuluma ihapari comaana woohoova itthu, khampa cinlamuliyaaka upanka.
21 Wiira ncuwele citthu cinkiirannyeela uno ni mananna ciryaaka, Tiikiku, khanle munneehu ni nanteko Aapwiiya naahala uwa wuuhimyeerani citthu cotheene. 22 Phimaana, kinanruma uwa nwo wiira awuuhimyeereni mananna ciryeehu ni wiira awuumaaliheni.
23 Nkhalane nnema ni nifento mayamunna, ciicammo mmwaamini Nluku, khanle Apaapeehu ni nwaamini Apwiiyeehu Yesu Kristu. 24 Otheene ale anaafenta Apwiiyeehu Yesu Kristu ni nifento nihimmala, akhalane unamaana woonironya wa Nluku.