Yonayeeli ya Akorintu

7 Phimaana mayamunna, ukhala wiira Nluku honikhuluveliha nnya citthunnya, niirapihe wiira nikumihe citthu cotheene cinnanariha irutthwiihu ni nrimeehu, wiira nitepe woonihera umoova wihu unriipiha nrima Nluku.

2 Nthoonyere unifenta mayamunna. Hiiva khaavo nintthekenleehu, khaavo ninwiihenreehu masakha ni khaavo ninlyelyacenreehu. 3 Kinoolumaca nnya citthunnya kahi wiira koohokumuni. Kontha miiva kihoohimyeerani wiira hiiva ninawuufentani, wiira nkhwe ni hiiva ni wiira nkhale akumi wamoca ni hiiva. 4 Mi akinookhuwakhuwani hataa itthu ukati woowulumanani. Mi kinawiittottopa venci nlattu wo nyuuva. Mi kiri oolipa cinene; ni mi kinkhala ootteeliya nhina marikariko otheene anaananeehu.

5 Khweeliini, waaphileehu o Masetoniya, hi khanamumunle ukhala wiira yahoniphwanya-tho mahuviho nimananna otheene; ahaavo atthu yaanivanyiha ni naahokhala niiwasi-waasi nlattu wo mayamunna. 6 Masi Nluku naamaaliha atthu ooriipiya nrima, ahonimaaliha uwa wawe munneehu Titu; 7 Ni kahi wiira nimaalihiye nlattu woowa uyova paasi, masi ciicammo nlattu wo uyova woomaalihiya ni nyuuva mayamunna, kontha uyo honihimyeera wiira nyuuva mwaatthi nhonukheliya ni miiva, nri oocukulaca* ni nri niiwasi-waasi nlattu wo miiva; ni iyo itthwiiyo inawuncerera utteeliya waka.

8 Kontha hataa ukhalaka wiira kahoriipiya nrima nlattu wo iwarakha yaawantikhenlyaakani, mi akittharuwile hataa vakaani nlattu wo citthu koolumilyaaka. Uhookhalaru wiira wiipaceroni kahottharuwa (kontha kihoona wiira iyo iwarakheeyo yahooripihani nrima, wahokhlaru ukati vakaani,) 9 vano, mi kiri ootteeliya nrima, kahi wiira nlattu nyuuvano wooriipiya nrima, masi nlattu woocuwela wiira uriipiya winyu nrima uhowiirihani urukunusa makhalelweenyu. Kontha nyuuva mwaariipiye nrima nuutthuna wa Nluku, ni iyo inanneeyo hi nihoona wiira citthu coohimyeenreehuni khacoowaanenleni masakha. 10 Kontha uriipiya nrima nuutthuna wa Nluku, unaamwiiriha ntthu urukunusa makhalelwaawe ni woopwa; masi, uriipiya nrima wo ila ituniyeela, unaawiiriha ntthu ukhwa. 11 Unawoonannya wiira mwaariipiye nrima toko Nluku nopheelaawe, kontha nlattu wooriipiya nrima, nyuuva mwaatthu mwaheekurumica upanka citthu comaana, toko: Mwahoreeriha macineenyu, yahoorusani itthu yoohinamaana yaapankiye, mwahothoonyera umoova Nluku, mwahopheela urukunusa makhalelweenyu, mwahonswalela Nluku ninrimeenyu wootheene, ni mwahommalihaca nanrokottole aakhumelenle. Mwahopanka citthu cotheene sana wiira mmalihace mwaha waakhumelenle. 12 Uhookhalaru wiira iyo iwarakheeyo kaawantikhenleni nyuuva, mi akaawantikhenleni nlattu wo ule avanre matampi, ni hataa akaawantikhenleni nlattu wo ule aatthekeliye. Masi kaawantikhenleni wiira Nluku oone mananna nyuuva nneeweleleenyu malakihero anoovahehuni. 13 Phimaana hiivano naakhanleehu olipihiya.

Masi, uhiya paasi hiivano ulipihiya, ciicammo nihokhala ootteeliya cinene nlattu wootteeliya Titu, kontha otheene wihu mwahonlipiha. 14 Kontha, wakhala wiira mi kaheettottopa uhoolo wa Titu nlattu waawinyu, miiva akoonile ihaaya; kontha citthu cotheene coolumileehu niwaacakani nyuuva, cikhanle cokhweeli, khampa citthu cotheene coohimyeenreehuni cikhanlyaaya cokhweeli. 15 Uhiya commo, wuufentani wawe unaatepa winciva upuwelaka mananna cineeweleleenyu malakihero nnaakheleenyu, ni mananna caamwakhelenleenyu ninttitthimiho. 16 Mi kinaakhala ootteeliya nrima venci cinene kontha kinawuukhuluvelani nhina citthu cotheene.