Ya Arooma
5 Phimaana, wooniya wihu ukhala anasariya nlattu wowaamini, nilawe nnema nirineehu ni Nluku, nlattu wa Apwiiyeehu Yesu Kristu, 2 umwaamini wihu Yesu unaaniiriha umwaattamela Nluku ni uphwanya unamaanaawe woonironya nirineehu nenna co. Hiiva pooti utteeliya nrima nlattu wooweherera uttitthimihiya ni Nluku . 3 Kahi iyo paahi, nitteeliye nrima yanikhumelelaka masakha, kontha ninaacuwela wiira uhuva unaawaana uvilela. 4 Ni uvilela, unaamwiiriha ntthu waaminiya ni Nluku, ni waaminiya unaamwiiriha ntthu ukhalana niweherero. 5 Ni nno niwehereronno ninaahala wiirannya; kontha nifento na Nluku niheesiya wanrimani wihu nlattu wonnepa wowaarya univahilyaawe.
6 Khweeliini, ukati waariihu anamatampi, Yesu hokhwa wiira awoopole atthu ootakhala nrima uphiya waya ukati waathanliye. 7 Ikhanle itthu yoorika ntthu unkhwela nasariya, masi ntthu pooti unkhwela ntthu ooreera nrima. 8 Nluku hoonihera ufenta wawe nlattu wookhwa Yesu wiira anoopole mmatampini. 9 Vano, ukhala wiira nihooniya ukhala anasariya nlattu wophomyaawe, khweeliini pooti wankupaliihu wiira ninaahala woopwa nlattu wawawe ukati Nluku unhalaawe uviruwa . 10 Kontha ukhala wiira naari awanani a Nluku, masi nna co nihoturuwela ukhala apatthannyaawe nlattu wookhwa mwanawe, vano pooti wankupaliihu wiira ninaahala woopwa nlattu wookumyaawe, ukhala wiira nihoturuwela ukhalana upatthani ni Nluku. 11 Uhiya iyo paahi, ciicammo ninaatteeliya ni Nluku nlattu wa Apwiiyeehu Yesu Kristu, niirihile uturuwela ukhala apatthannyaawe Nluku.
12 Phimaana, nlattu wanlopwana mmoca paahi, itampi ihomwareela ntuniyani motheene, ni nlattu womatampi uhaavo ukhwa. Commo, atthu otheene anaakhwa watuniyani kontha ahaana matampi. 13 Kontha nihinaaya ukhala nlamulo yaahaavo itampi ntuniyani motheene, masi naahikhaleke nlamulo, khaavo nootherihiya uvara matampi. 14 Uhookhalaru commo, wankhwiya ikhumelo ukati wa Atamu mpaka ukati wa Moceesi, hataa ciicammo ale yahaavanre itampi inlikanaca niitampi yaavanryaawe Atamu, ule nolikanaca ni ule aahala uwa.
15 Masi itthu nivahilyaawe Nluku khinlikana ni itampi ya Atamu, atthu enci ahokhwa nlattu wo matampi anlopwana mmoca paahi, masi nlattu wa nlopwana mmoca paahi Yesu Kristu, unamaana woonironya uhaaphwanya atthu enci. 16 Ciicammo itthuvo inivahilyaawe Nluku khinlikanaca niitampi ivanryaawe ntthu mmoca, kontha nlattu wa nlopwana mmoca paahi hiiva ninaahukhumwiya, masi nlattu wo itthuvo Nluku innivahaawe hiiva ninawooniya ukhala anasariya. 17 Wakhala wiira ukhwa uwile nlattu wa nlopwana mmoca paahi, ciicammo unamaana woonironya wa Nluku ni wooniya wihu ukhala anasariya, uwile nlattu wa nlopwana mmoca paahi vahile ukumyaawe, Yesu Kristu!
18 Phimaana, wakhala wiira nlattu wa nlopwana mmoca paahi atthu enci ahohukhumwiya, ciicammo nlattu wa nlopwana mmoca paahi nasariya, atthu enci ahooniya ukhala anasariya, ni anaaweherera ukhalana ukumi. 19 Kontha, nlattu woohiiwelela nlopwana mmoca paahi atthu enci ahokhala anamatampi, ciicammo nlattu wowiiwelela nlopwana mmoca paahi, atthu enci anaahala ukhalihiya anasariya. 20 Nlamulo niwile wiira itampi cuncereriye. Masi mapuro ari matampi menci, unamaana woonironya wa Nluku unaatepa winciva. 21 Kontha isiyani? Kontha, khampa itampi iwannyaaya ukhwa, ciicammo unamaana woonironya wa Nluku uhowaana isariya inaavaha atthu ukumi woohimala nlattu wa Apwiiyeehu Yesu Kristu.