Yonayeeli ya Akorintu
1 Miiva Paulu, kikhanle apostolu a Kristu Yesu nuutthuna wa Nluku, wamoca ni munneehu Timotiyu, ninwantikhela ila iwarakheela mayamunna o nloko na Nluku nimphwanyannya u Korintu, waahela nhina atthu ookhuluvelyaa otheene amphwanyannya ilapo yo Akaya:
2 Nkhalane unamaana woonironya ni nnema ninvahaawe Nluku, akhanle Apaapeehu, ni ninvahaaya Apwiiyeehu Yesu Kristu.
3 Attottopeliye Nluku ni athumwanaya Apwiiyeehu Yesu Kristu, Apaapeehu owoonela uthunku cinene ni akhanle Nluku oomaaliha, 4 annimaaliha khula ikwaha ninaananeehu marikariko,* wiira nimananna annimaalihaaya,* ni hi nikhitiri waamaaliha akhunanihu nhina marikariko otheene* anaananaaya. 5 Kontha, khampa cinhuvahuveehu cinene nlattu wa Kristu, hiiva ciicammo ninaamaalihiya cinene nlattu wa Kristu yooyo. 6 Hiiva naananaka marikariko, ninaanana wiira nyuuva mmaalihiye ni moopoliye. Ni hiiva namaalihiyaka, ni nyuuva ciicammo nnaamaalihiya, ni nwo umaalihiyaanwo unaahala wuukaviherani uvilela mwaananaka marikariko toko hiiva ninaananeehu. 7 Ni hiiva ninaakhuluvela wiira khampa cinhuvahuveenyu toko hiiva, ciicammo nnaahala umaalihiya khampa hiiva cimmaalihiyeehu.
8 Mayamunna, hi nimpheela wiira ncuwele marikariko otheene yaananneehu iprovinsiya yo Asiya. Hiiva nahohuva venci, mpaka nahaakhitiriihu waanana niikuru cihu ni khanaamini wiira nanhala ukhala akumi mpaka ilelo. 9 Khweeliini, hi noopuwela wiira nanhala ukhwa. Iyo itthwiiyo yeerannyeele wiira nihiikhuluvele mwaaneeneehu, masi wiira ninkhuluvele Nluku, ule nowunweleliha atthu. 10 Naahanleehu vakaani ukhwa uyo ahonoopola ni naahala unoopola, ni ninaakhuluvela wiira uyo khanhala uhiyerera unoopola. 11 Nyuuva mwaatthi pooti wannikavihereenyu mwanilompelaka; mwapankaka commo, atthu enci anaahala unsukhurweela Nluku nlattu uyo wowaakhula mavekelo nyuuva nnonipankeleenyu.
12 Hiiva ninawiittottopa nlattu wo ila itthwiila: Nrimeehu uri wootaphuwa, kontha hataa nakhalaka iriyari yaatthu ontuniyani, venci-venci iriyariinyu, hiiva ninawoonihera ukhalana makhalelo omaana ni unamaana wa Nluku, ni ninaweettela ikhweeli ya Nluku. Uhiya commo, hi khaninkhala nittharaka ucuwelaca wo ila ituniyeela, masi nintthara unamaana woonironya wa Nluku. 13 Khweeliini, hiiva ninwantikhelani nnya citthunnya nimananna ankhitiriinyu usoma ni wiiweeha sana-saana, ni mi kimpheela wiira nhihiyerere wiiweha sana-saana citthu cinwantikheleehuni. 14 Khampa nyuuva mwaatthiva ciiweehileenyu wiira pooti waneettottopeenyu nlattu wo hiiva, toko hiiva ninhaleehu wiittottopa nlattu wo nyuuva nihuku Naapwiiyeehu Yesu.
15 Coo, ni nwo ukhuluvela urinaakanwo, mi kihoopuwela uwa upacera toko wuuthotolani, wiira ntteeliye-tho cinene ikwaha yonayeeli; 16 kontha kampheela wuuthotolani woorwaa ni wooturuwa u Masetoniya, wiira ukati unhalaaka urwaa u Yuteya nkiveleele vakaani. 17 Ukati woopuwelacilyaaka iyo itthwiiyo, akaacile wuupuwelaca paasi. Ni ciicammo akoopuwelacile upanka nuutthuna waka, atthuna nuuwakatyaaya waahalaaka wiira “iyee” masi ukati nkhwaawe wiira “mena.” 18 Masi, khampa Nlukweehu khanlyaawe ookhuluvelyaa, moolumweehu hiiva ciicammo akhanle ookhuluvelyaa. Hi khanaahala uwiirelani “iyee” masi ukati nkhwaawe uwiirelani “mena.” 19 Uhiya commo, Yesu Kristu khanle mwaana a Nluku, nuulalyenreehuni miiva, Silvanu* ni Timotiyu, khaneera “iyee” ni ukati nkhwaawe phiiraka “mena,” itthu ineeraawe “iyee,” khanhiyerera wiira “iyee.” 20 Kontha, inatiri cotheene ca Nluku, cinaakhala “iyee” nlattu wa Yesu Kristu. Phimaana, ciicammo ninawiira “amem” nanlompaka Nluku, ni commo, ninanttitthimiha uyova. 21 Masi Nluku, phinkhuluveliha wiira hiiva nikhanle atthari a Kristu, ni uyo phinithanlile. 22 Uyo ciicammo hokhuluveliha wiira naahala univaha nnepa wowaarya wanrimani wihu, ni honikhuluveliha univaha citthu cinhala uwa.
23 Nluku phi saahityaaka, ukhala wiira naacuwela wiira akiwile nwo u Korintunwo wiira kihitepe wuuriipihani nrima. 24 Hiiva khaninakhala asineene waamini winyu, masi ninvara nteko nkhayi ni nyuuva wiira mphwanye utteeliya, kontha waamini winyu phinwiirihani ukhala oolipa.