Ya Arooma
3 Ifayitani irinaawe nyuuta awula ifayitani irivo nlattu wowuulihiya? 2 Ihaavo ifayita yuulupale. Yoopacera, ayuuta ahovahaceriya moolumo owaarya a Nluku. 3 Vano iniirannya isiyani? Ukhala wiira akiina khayaaminni, niireke uhaamini waya unaahala uhiiha ukhuluvelyaa wa Nluku? 4 Mena! Nluku naahimya ikhweeli, hataa ukhalaka wiira apinaatamu otheene anawootha, toko cantikhiyaaya: “Wiira mooniye ukhala nasariya moolumacaka ni nttheme mwahukhumwiyaka.” 5 Vano ninhala upankani, wakhalaka wiira uhinasariya wihu unaatepa woonihera wiira Nluku khanle nasariya? Niireke Nluku khanle oohisariya, aniviruwelaka nlattu woopanka itthu yootakhala? (Iyo itthwiiyo phinoopuwelaaya atthu akiina.) 6 Mena! Unari commo, Nluku ahaala ukwanyulaca cani ila ituniyeela?
7 Masi, wakhala wiira nlattu wowootha waka, ikhweeli ca Nluku cineera cicuweliyaka ni cittitthimihiyaka, vano nlattuni miiva kinhukhumwiyaaka khampa namatampi? 8 Nlattuni uhineereehu, toko ale annootherya wiira nineera: “Nipanke citthu cootakhala wiira ciwe citthu cooreera?” Uhukhumwiya waya ayo atthwaayo ukhanle wosariya.
9 Vano ninhala uhimyani-tho? Hiiva niri saana? Mena! Kontha nihoona wiira ayuuta ni hataa akereeku, otheene caya ahaana matampi. 10 Toko cantikhiyaaya: “Khaavo nasariya hataa mmoca, 11 khaavo rina ucuwelaca; khaavo nomwaavya Nluku. 12 Otheene aheehapusa, otheene ahokhala atthu oohifayita ni khaavo hataa ntthu mmoca nothoonyera unamaana.” 13 “Mmilwaaya ukhanle khampa mahiye oohivuheliya; ayo anawootha ninlimi naya.” “Moolumwaaya anlikana niiveneenu yo inwaa yoohapala.” 14 “Mmwano waya ahoocara moolumo oolaphakaca ni oohiloka.” 15 “Inyaa caya cinaakuvela urwaa wiiva.” 16 “Ayo anawaawaanela masakha akhunanaya ni anawaahuviha, 17 ni khancuwela iphiro yo nnema.” 18 “Ayo khammoova Nluku.”
19 Ninaacuwela wiira, citthu cotheene cinhimyaaya nlamulo anrwaaneliya ale aneettela nlamulo, wiira atthu otheene amaale ni ituniya yotheene yiiwelele ihukhumu ca Nluku. 20 Khaavo nohala wooniya ukhala nasariya wamiithoni wa Nluku nlattu woweettela nlamulo, kontha nlamulo ninhimya citthu cincuweliya sana-saana wiira cikhanle itampi.
21 Masi nna vaa, nihothoonyiheriya isariya ca Nluku, Nlamulo ni Maporofeeta anvahaaya usaahiti, 22 iyee, isariya ya Nluku, Yesu yaahimenryaawe atthu otheene arina waamini. Kontha Nluku khanonthanla ntthu. 23 Atthu otheene ahaana matampi ni khamphiyeera uttitthima wa Nluku, 24 ni ankhala khampa itthuvo, phimaana uhimiyaaya ukhala anasariya nlattu woonamaanaawe woonironya, nlattu wowoopoliya wihu livilyaawe Yesu Kristu. 25 Nluku honvaha Kristu khampa itthuvo wiira nituruwele waataana nuuyova nlattu wowaamini iphomyaawe. Nluku pankile iyo itthwiiyo wiira athoonyere isariyaawe, kontha ukati waahiyereraawe ciirannyaaka nnyo citthunnyo, uyo aalevelela itampi caavariye khalayi. 26 Nluku pankile iyo wiira athoonyere isariyaawe ula ukatyuula, wiira oonihere ukhala nasariya hataa ukati unonhimyaawe ntthu ukhala nasariya nlattu woomwaamini Yesu.
27 Vano niireke nihaana isariya yowiittottopa? Iyo isariyeeyo ihomalamalihiya. Ninlamuloni? Nlattu wo miteko cinhimyaaya nlamulo? Mena! Nlattu woweettela nlamulo no waamini. 28 Hi nincuweleehu wiira, ntthu nohimiya ukhala nasariya akhalanaka waamini kahi nlattu woopanka citthu cinhimyaaya nlamulo. 29 Niireke wiira Nluku khanle ayuuta paahi? Khanakhala ciicammo Nluku aatthu akhwaawe? Iyee, uyo khanle ciicammo Nluku aatthu akhwaawe. 30 Ukhala wiira Nluku ri mmoca paahi, uyo naahala waahimya ukhala anasariya atthu owuulihiya nlattu wowaamini ni atthu oohuulihiya nlattu wowaamini waya. 31 Iyo maanaaya wiira nihohiya weettela nlamulo nlattu woowaamini wihu? Mena! Uhiya commo, ninawiira utepa wiiwelela.