Yantikheliyaaya a Efesu
5 Phimaana, muntakihe Nluku, khampa asaana oofentiya, 2 ni nhihiyerere ufenta, toko ciicammo Kristu nifentilyaawe* ni vaherenryaawe ukumyaawe nlattu wo hiiva,* khampa itthuvo ni nkuttho woonukhela uhoolo wa Nluku.
3 Ukhala wiira nyuuva mwaatthu owaarya, cihiphwanyannye iriyarinyu citthu toko: urupihana woohiloka,* citthu cotheene coohiirya ni hataa iriyarinyu nhiromolace wiipheelela citthu. 4 Ciicammo nnyeme makhalelo owoonihaca ihaaya, oothoonyera uhicuwelaca,* mathukelo oosece, iyo maanaaya citthu coohiloka; masi munsukhurweele Nluku. 5 Kontha nyuuva mwaatthi nnaacuwela ni nnaakupali wiira atthu anrupihana woohiloka, ampanka citthu coohiirya, aniipheelela citthu, anaaswalela a nluku oohikhweeli, khanhala waakhela itthuvo co Muumweneni wa Kristu ni wa Nluku.
6 Hikhale ntthu noothepyani ni moolumo owoothiya, kontha nlattu wo nnya citthunnya, Nluku nawaaviruwela atthu ahimmwiiwelela. 7 Phimaana, nhipanke nnyo citthunyo; 8 kontha nyuuva mwaatthi mwaari ipiphi, masi nlattu woowaataanana Apwiiya, nna co nkhanle iluusu, nhihiyerere woonihera ni makhalelweenyu wiira nkhale atthu nneetta waluusuni, 9 kontha waluusuni phinkhumelelaaya citthu cotheene comaana, cosariya ni ceekhweeli. 10 Ukati wotheene mwiikurumice upanka itthu inaatteeliha nrima Apwiiya. 11 Nhiye wiikelakeliha miteko cinvariya wapiphini, nnye cihimphwanyiha ifayita, masi moonihere wiira nnyo cikhanle coohiloka. 12 Kontha citthu ayo cimpankaaya wapiphini cowuulihaca muru, mpaka cihinreera woopeliya mwaha. 13 Masi citthu cotheene cimmwaleeliya niiluusu cinawoonannya ni citthu cotheene cimwaleeliya cikhanle iluusu. 14 Phimaana, uniiriyaaya co: “Munwe nyuuva nnorupavaa ni munwelele nyuuva nkhwilevaa ni Kristu naahala wuumwaleelani.”
15 Vano mwiiwehawehe wiira nheette toko alolo, masi mweette toko atthu oocuwelaca, 16 mwavarelaka nteko saana ukatiinyu,* kontha ala mahukwaala akhanle oohiloka. 17 Phimaana, nhiye ukhala atthu ahinvarela nteko ratta moopuwelelwaaya masi ncuwele ile inoncivela Yehova. 18 Ciicammo, nhihapaliye,* ukhala wiira uhapaliya unaamwiiriha ntthu upanka citthu coohiloka, masi ncarane nnepa wowaarya. 19 Nlipihane mweepaka isaalimu, munttottopelaka Nluku ni mmwiipelaka macipo o wuuswalini, mmwiipele Yehova khampa wiira wanrimani winyu nnorumiha icipo, 20 munsukhurweelaka citthu cotheene Nluku ni Paapeehu, mwancina na Pwiiyeehu Yesu Kristu.
21 Mwiiwelelane atthu otheene mmoovaka Kristu. 22 Athiyana ootheliya, mwiiwelele awannyinyu, khampa nnowiiweleleenyu Apwiiya, 23 kontha nlopwana khanle nhooleli aamwaarawe, khampa Kristu khanlyaawe nhooleli onloko ni moopoli o iyo irutthwiiyo.* 24 Khweeliini, khampa nloko nimwiiwelelaaya Kristu, nthiyana ciicammo haana uwiiwelela awannyawe nhina citthu cotheene. 25 Nlopwana oothela hihiye waafenta amwaarawe, khampa Kristu cifentalyaawe nloko, avahereraka ukumyaawe nlattu wo nno nlokonno. 26 Uyo pankile iyo itthwiiyo wiira areerihe nlokonno, arapihaka ni nuulumo na Nluku, khampa aahalaawe urapiha ni maaci. 27 Pankile iyo itthwiiyo wiira nloko nikhale nooreera wamiithoni wawe, nihikhalane mahirihiri, mahunyanttha,* ni hataa citthu coolattanaca niinnyo, masi nikhale nowaarya ni noohipahuwa.
28 Inanna imocaaru, nlopwana haana waafenta amwaarawe toko nofentaawe irutthwaawe. Nlopwana naafenta amwaarawe, neefenta mwaaneennyaawe, 29 kontha khaavo nlopwana nothanya irutthwaawe, masi naalihera ni naawacera toko Kristu nopankaawe nloko. 30 Kontha hiiva nikhanle miphantte corutthwaawe. 31 “Phimaana, nlopwana naarwaa waahiya athumwaane ni anumwaane ni urwaa waavaresesa amwaarawe, ni ayoca anhala ukhala irutthu imoca.” 32 Ila isiiri yowaarya yuulupale kinoolumaakeelava, kimmwaaca Kristu ni nloko. 33 Masi khula nlopwana haana waafenta amwaarawe toko ciniifentaawe ni ciicammo athiyanaayo ahaana waahisimu cinene awannyaya.