Yonayeeli ya Akorintu

13 Ila ikwaha yoneeraru inhalaaka uwa wuuthotolani. Khula mwaha unlamuliya wuulumaceriya wakhalaka wiira ahokhumelela masaahiti eeli awula araru oohimya itthu imocaaru. 2 Uhookhalaru wiira nna co akiri wonwonwo, ukhala toko nanlelo kiri wonwonwo ikwaha yonayeeli, ni kinuuhimeryaani wiira kawaaka nwo, ale avanre matampi khalayi ni akhwaawe ampanka citthu coohiloka, akinhala uwoonela ikiriri, 3 Ukhala wiira nnopheela nthoonyero ninoonihera wiira Kristu nowuulumanani akivarelaka nteko miiva, Kristu khanwuulumanani alolovacaka, masi nowuulumanani athoonyeraka wiira haana ikuru. 4 Kontha khweeliini, uyo hiiviya wanipottoni nlattu woololovaca wawe, masi nna co ri nkumi nlattu wo ikuru ca Nluku. Khweeliini, hiiva ciicammo nikhanle oololovaca wamoca nuuyo, masi ninaahala ukhala wamoca nuuyo nlattu wo ikuru ca Nluku, nyuuva nrineenyu nna co.

5 Nhihiyerere wiiwehacera waakhala wiira nanlelo nhaanana waamini; nhihiyerere waavya wiicuwela mwaaneeneenyu. Awula niireke wiira khannokupali wiira Kristu ri wamoca ni nyuuva? Uhikhanle wiira nhookhottiya, nyuuva mwahaana nkupaliki. 6 Kinweherera wiira nyuuva mwaatthi nkupali wiira hiiva khanikhottiye.

7 Hiiva ninanlepelaka Nluku wiira nyuuvano nhipanke itthu yootakhala, kahi nimpanka iyo wiira hiivano nikupaliye, masi nimpanka nipheelaka wiira nyuuvano mpanke citthu comaana, hataa ukhalaka wiira hiivano unkhala toko nihookhottiya. 8 Kontha hi khaninlamuliya upanka itthu invirikaniha ikhweeli, masi ninlamuliya upanka itthu invaranaca niikhweeli. 9 Ni hi khweeliini ninaakhala ootteeliya nrima, nalolovacaka masi nyuuva nkhalanaka ikuru. Ni itthu ilepeleseehu nalompaka ukhanle nyuuva urukunusa makhalelweenyu. 10 Phimaana, kinwantikhelaakani nnya citthunnya kinari uttayi ni nyuuva, kimpheela kawaaka nwo, kihitepe uvarela nteko ukhulupale akivahilyaaya Apwiiya wiira kaalipihe atthu, kahi waamalamaliha.

11 Vano mayamunna, nhihiyerere ukhala ootteeliya, urukunusa makhalelweenyu, umaalihiya, ukhalana moopuwelelo mamocaaru, ukhalakhala ni nnema; mwapanka commo Nluku nanifento ni nannema, nohala ukhala wamoca ni nyuuva. 12 Nsalamihane nvahanaka ipeecu. 13 Mayamunna otheene ookhuluvelyaa anawuuveleeliherani isalamu.

14 Unamaana woonironya wa Apwiiya Yesu Kristu, nifento na Nluku ni nnepa wowaarya ukhale wamoca ni nyuuva.