Yonayeeli ya Akorintu
5 Kontha, ninaacuwela wiira inupeehu yo va watuniyaniva, ula heemoola, ahalaka akwanyulaciyaka, ninaahala uvahiya mapuro ni Nluku, inupa ihinhala ukwanyulaciya-tho ni yoohitekiya naapinaatamu. 2 Khweeliini ninawiipulela nhina ila inupeela, niwehererakoono venci waakhela inupeehu yo wiirimu. Inupa inhala unikhuneela khampa caahalaaya unikhuneela ikuwo, 3 wiira waphiyaka ukati unhaleehu uwara iyo inupeeyo, nihiphwanyiye woohiwara itthu. 4 Khweeliini, hiiva niri nhina ula heemoola, ninawiipulela ni ninaasanka, kontha khanimpheela unrula ula heemoola, masi nimpheela unwara onaanaano, wiira ila irutthu inkhweela yaakakhanihiye nuukumi woohimala. 5 Nluku phinitthenkacenre ila itthwiila, ule nivahile nnepaawe wowaarya wiira ukhale isinaali yo itthu inhala wiirannya.
6 Coo, ukati wotheene ninaakhuluvela ni ninaacuwela wiira ukati unkhaleehu niirutthu yeepinaatamu, ninkhala uttayi ni Apwiiya, 7 kontha hiiva nineetta ninkhuluvelaka Nluku, kahi citthu cinooneehu. 8 Masi hiiva ninaakhuluvela venci ni ninawaamini ukhala uttayi niirutthwiihu, masi ukhala wamoca ni Apwiiya. 9 Phimaana, hataa ukhalaka wiira ninaakhwa wamoca nuuyova, awula nikhalaka uttayi nuuyova, itthu impheeleehu, ukhanle upanka itthu yomaana wiira nincivelihe. 10 Kontha otheene cihu ninaahala weemela uhoolo wa Kristu, wiira khula ntthu alivyaaniheriye citthu caapankaawe ukati waarinaawe irutthu yeepinaatamu, hataa cikhalaka citthu comaana awula cohinaamaana.
11 Ukhala wiira ninaacuwela uwoova Apwiiya maanaaya isiyani, khaninhiyerera uwiiriha atthu unaamini, masi hiiva ninaacuweliya saana-sana ni Nluku. Ni miiva ciicammo kinweherera wiira nnicuwele saana-sana wanrimani winyu. 12 Hiiva khanimpheela uturuwela-tho wiittottopa, masi ninawaaca wuukurumicani wiira mwiittottope nlattu wawihu. Wiira nkhalane itthu yoowaakhula ale aneettottopa nlattu wo makhalelwaaya anoonnya, uhiya wiittottopa nlattu wo makhalelwaaya o wanrimani. 13 Wakhala wiira nahovahuwa, naavahuwile nlattu wonfenta Nluku. 14 Kontha ufenta wa Kristu unaaniiriha umwiiwelela, kontha ninaacuwela wiira nlopwana mmoca paasi: hokhwa nlattu wo atthu otheene, khweeliini, atthu otheene yahokhwa. 15 Ni uyo hokhwa nlattu wo atthu otheene, wiira ale ari akumi, ahipanke citthu cinaacivela ayova, masi citthu cinoncivela ule khwile wiira awoopole ni onwelelihiye.
16 Ukhuma nenna co mpaka ninrweehu, khaninwoona atthu nittharaka makhalelo anoonnya. Hataa ukhalaka wiira iriyariihu ahaavo yancuwenle Kristu yattharaka makhalelo anoonnya, kontha nna co khaninkhitiri upanka iyo itthwiiyo. 17 Phimaana, wakhala wiira ntthu nawaataana ni Kristu, uyo hopattisiya-tho ni Nluku. Citthu cokhalayi cihovira. Masi moone! Cihokhumelela citthu conaanaano. 18 Masi citthu cotheene nnyo cinkhumelela wa Nluku, ule niirihile uturuwela umwaataanana anvarelaka nteko Kristu, nivahile nteko wowaakavihera atthu umwaataanana. 19 Iyo maanaaya wiira, Nluku, anvarelaka nteko Kristu, howiiriha atthu uturuwela umwaataanana, hiwaceraka matampyaaya. Ni uyo honivaha nteko wowaahimyeera atthu wiira wanaakhitirya ayova uturuwela umwaataanana.
20 Phimaana, hiivano nihoorumiya* ni Nluku, wiira nivare nteko waahalaawe uvara Kristu, ukhalaka toko wiira Nluku nonivarela nteko hiiva wiira aalattule atthu. Khampa caahalaawe upanka Kristu, hiiva ninawaalepelaka atthu neeraka: “Nturuwele umwaataanana Nluku.” 21 Kristu khanatoko uvara matampi, ni Nluku honvaherera uyova khampa itthuvo nlattu wo matampiihu, wiira nlattu wa Kristu, Nluku anoone ukhala atthu aneettela isariya.