Miteko co Mapostolu
11 Vano, maapostolu ni mayamunna yaari u Yuteya yaheewa wiiriyaka wiira yahaavo atthu yahaari ayuuta, ciicammo yaaminni nuulumo na Nluku. 2 Vano, Peturu urwaa wawe u Yerusalemu, atthu yaavaresesa wuulihana yahopacera unnyakulihanana, 3 yiiraka: “Uhokela inupa yaatthu oohuulihiya ni uhaalyaana.” 4 Vano, Peturu ahopacera waahimeerya citthu ceerannyeele:
5 “Miiva kaari isittatti yo Yope kilompaka, kahokhalana iwooni, kahoona itthu yoolattanaca toko ilensoli yoovevyaala ikhuruwaka wiirimu, inavareleliye malootho oomacese ni iyo yahowa mpaka nipuro kaaryaaka. 6 Kahoweheeha sana-saana nhina waya, ni kahoona inama cometto micese, inama contakhwani, inwaa ni inuni cowiirimu. 7 Ciicammo kahiiwa ncu nikiirelaka: ‘Peturu, wunwe wiive ni ukhuure!’ 8 Masi mi kaheera, akintthuna Pwiiya, kontha mi akinapaca ulya citthu coothanyiya ni coohiirya. 9 Vano, kaheewa ncu ikwaha yonayeeli nikhumaka wiirimu, neeraka: ‘Uhiye wiihana coohiirya citthu Nluku cireerihilyaawe.’ 10 Iyo yaheerannya ikwaha yoneeraru, ni citthu cotheene cahoturuseliya wiirimu. 11 Uhiya commo, yoole ukatyuule, alopwana araru o Sesareya yaarumiye wiira yakaavye, yahophiya inupa naariihu. 12 Vano, nnepa wowaarya wahokiirela kirwee woohilipalipa. Ni ala mayamunna 6 ala, yahorwaa nkhayi ni miiva, ni nahophiya watthokoni wawe uyo nlopwanooyo.
13 Uyo ahonihimeerya wiira nahonkhumelela nlayikha uwannyawe ni nahomwiirela: ‘Waavelelihe alopwana u Yope ni umwiihanihe Simau, nocuweliya ukhala Peturu, 14 ni uyo, naahala wuuhimeerya itthu inlamuliya upanka weeva ni atthu otheene owapuwani waa wiira moopwee.’ 15 Wancenryaaka wuulumaca, nnepa wowaarya wahaakhuruwela otheene caya, khampa hiiva waanikhuruwenlyaaya wiipaceroni. 16 Vano, kahoopuwela itthu yoolumacilyaaya Apwiiya yeeraka: ‘Joau aapattisa ni maaci, masi nyuuva nnohala upattisiya ni nnepa wowaarya.’ 17 Vano, wakhala wiira Nluku haavaha iparakha imocaaru yaanivahilyaawe wiira ninkupali Pwiiyeehu Yesu Kristu, mi kihookhala pani wiira kinkhottihe Nluku itthu impheelaawe?”
18 Ukati weewilyaaya nnyo citthunnyo yahonttitthimiha Nluku, yeeraka: “Vano, Nluku haavaha ciicammo iparakha atthu omaloko makhwaawe, uttharuwa wiira aphwanye ukumi woohimala.
19 Ale yaamwaryaacile nlattu wowiiviya Estevau, yohorwaa u Fenisiya, u Siipere ni u Antiyokiya. Masi ayo yaalalyeera moolumo a Nluku ayuuta paasi. 20 Vano, alopwana yaari nkhayi naayo, yaari o Siipere ni o Sireeni yahorwaa wa Antiyokiya ni yahancera uwuulumana atthwaayo niiluuka ikereku, yaalalyeeraka ihapari comaana ca Apwiiya Yesu. 21 Ni ayo yankaviheriya ni Yehova, ni enci yahotthuna ni yahancera uwaamini Apwiiya.
22 Ihapari caya ayo atthwaayo, cahophiya nloko no Yerusalemu, ni Pernape ahorumiya urwaa u Antiyokiya. 23 Ukati waaphilyaawe nwo ni oonaka unamaana wa Nluku, ahotteeliya ni ahancera waalipiha atthu otheene wiira ahihiyerere ukhala ookhuluvelya ninrimaaya wotheene. 24 Kontha aari nlopwana omaana, wancanre nnepa wowaarya ni aarina waamini, ni atthu enci yahopacera uwaamini Apwiiya. 25 Vano, uyo ahorwaa u Tarsu wiira amwaavye sana-saana Saulu. 26 Umphwanya wawe nwo, ahoncisa u Antiyokiya. Vano, yahoviriha mwaakha mmoca, athukumanaka nkhayi ninloko no Antiyokiya, awiitthucihaka atthu enci. Ni u Antiyokiya wonwo, atthari nlattu wootthuniheriya ni Nluku, phaapacenryaaya wiihaniya makristau.
27 Ale mahukwaale, maporofeeta yahokhuma u Yerusalemu arwaaka u Antiyokiya. 28 Nlopwana mmoca eehaniya Aakapu aahunwa, ni akaviheriyaka ni nnepa wowaarya, aheera wiira yanhala uvola itala ule ncokoole. Khweeliini iyo itthwiiyo, yaheerannya ukati wa Klautiyu. 29 Vano, atthari yaholakela waakavihera mayamunna yaakhala u Yuteya ni citthu caarinaaya. 30 Yahopanka iyo itthwiiyo, yaavahereraka Pernape ni Saulu wiira yaavahe mahumu.