Ya Arooma
13 Atthu otheene ahaana uwiiwelela ahooleli ontuninyani, kontha khaavo ahooleli ahitthuniheriye ni Nluku. Ahooleli ariwo yeesiye ni Nluku. 2 Phimaana, ale ahinwiiwelela ayo ahoolelyaayo khaaneewelela nlamulo na Nluku; phimaana anaahala wiiwaanela ihukhumu. 3 Kontha ahooleli khaanooviya ni atthu ampanka citthu comaana, masi anooviya naatthu ampanka citthu coohinamaana. Nyuuva nnaapheela ukhala woohiwoova ahooleli? Paahi mpanke itthu yomaana, nnaahala uttottopeliya; 4 kontha ayo anonvarela nteko Nluku, wiira yuuphwanyiheni ifayita. Masi mwapankaka citthu coohinamaana nwooveke, kontha ayo khaanonttarusa ntthu mahala. Ayo anvara nteko wa Nluku wiira yaattaruse ale ampanka citthu cootakhala.
5 Phimaana, nwiiwelele ale arina ukhulupale, kahi nlattu ayo wowaahukhumu atthu ampanka citthu coohinamaana, masi nlattu wowuupuwela wanrimani winyu. 6 Phimaana nyuuva nnoliveenyu nsokho, kontha ayo arumiye ni Nluku ni khanhiyerera uvara uyo ntekooyo. 7 Munvahe khula ntthu ile inomphwanela uvahiya: ule nohala wuuliviha nsokho, munlive nsokho; ule nohala wuulepelani nsurukhu wa kuvernu, munvahe nsurukhu wa kuvernu; ule nopheela wooviya, mmoove; ule nohala wuulepelani uttitthimihiya, munttitthimihe.
8 Nhinkopele ntthu itthu ihinhaleenyu ukhitiri uliva, masi nfentane, kontha ule nonfenta nkhunanawe naweettela nlamulo. 9 Malamulo aneera “uheette uluva, uhiive, uhinnye, uhikhalane nttima,” ni malamulo makhwaawe otheene ammaliheriya ni ala moolumwaala: “Munfente nkhunaninyu toko cineefenteenyu.” 10 Ule nofenta khanompanka pusya nkhunanawe, kontha nifento ukhanle utthara nlamulo.
11 Ni mpanke iyo kontha nnaacuwela ula ukati niriihuula, wiira khunakhala ukati woorupa. Kontha woopoliya wihu uhaattamela, khunlikana ukati waapacenreehu waamini. 12 Niri uhiyu iriyari; uhanle usa. Phimaana, ninyeme miteko cowapiphini ni nicise ikaruma conthuko. 13 Nikhalaneke meettelo omaana, khampa nineetta uthana, wooheetta mmafestani coohiloka ni woohihapaliya, hataa weetta uluva ni meettelo oohinamaana anoonihera uhoona ihaaya, woohinyakulihana ni woohunlelana ihace. 14 Mwaatakihe Apwiiya Yesu Kristu ni nhilakelele upanka citthu cinciveliha irutthu.