Yoopacera ya Tiyaku
2 Mayamunna, niireke wiira nyuuva nnaawaamini Apwiiyeehu oottitthima Yesu Kristu ni ukati yooyo umoonihera unamaana ntthu nkhwaawe ni nkhwaawe mena? 2 Wakhalaka wiira ntthu naakela wankutthaanoni winyu naawanre aneli owooru ni ikuwo cooreera, masi naakela ciicammo ntthu oothwennya nawanre ikuwo coonanara, 3 niireke nnaamwaakhela saana ule wanre ikuwo cooreeroole ni nnaamwiirela: “Wonkomeke va, nipuro nooreera”, masi nnaamwiirela ule oothwenyoole: “Weemeleke” awula: “Wonkomeke vale vathi vale, nipuro kinkhikiceraaka metto caka”? 4 Wakhala wiira iyo itthwiiyo inawiirannya, khannokupali wiira nyuuva nnawaathanla aatthu nlattu wo citthu cirinaaya ni nhokhala masuwiisi anlakela citthu coohiloka?
5 Nviriyane mayamunna oofentiya, khannokupali wiira Nluku haathanla atthu anooniya ukhala amasikhini ntuninyani wiira akhale mathaciri nhina waamini ni yaakhele Umwene uyo aakhuluvelihilyaawe ale anonfenta? 6 Masi nyuuva khannonhisima masikhini. Khaanakhala mathaciri anoohuvihani yuurwanakani mmatiripunaali? 7 Khaanakhala yaayo anveeha ncina noohisimiya nvahiyeenyu? 8 Wakhala wiira nnaweettela nlamulo nomaana, toko cantikhiyaaya: “Munfente nkhunaninyu toko cineefenteenyu”, nnaapanka saana. 9 Masi mwaahihiyerereke uwoonihera unamaana atthu akhwaawe ni akhwaawe mena, nyuuva nnovara itampi ni nnaahukhumwiya ni nlamulo khampa atthu oohicuwela nlamulo.
10 Kontha ntthu eettelaka nlamulo notheene, masi avonyanihaka nlamulo nimoca, nokhala ntthu oohiiwelela nlamulo notheene. 11 Kontha ule enre: “Nheette uluva.” Ciicammo heera: “Nhiive.” Vano wakhalaka wiira nyuuva khanneetta uluva, masi nnawiiva, nnokhala ntthu oohiiwelela nlamulo. 12 Muulume ni nkhale toko ntthu nohala uhukhumwiya ni nlamulo naapoovu ootaphuwa.* 13 Kontha ule himmoonela nkhunanawe ikiriri nohala uhukhumwiya woohikiriri. Ikiriri ikhanle yofayita uvikana uhukhumu.
14 Mayamunna, nlattuni ntthu nohalaawe wiira haana waamini, hipankaka citthu comaana? Niireke nwo waamini nwo unaahala umoopola? 15 Wakhalaka wiira munna awula nuunu kharina itthu yoowara,* hataa iyoolya yootosera nihuku nimoca, 16 ni nyuuva nnaamwiirela: “Urweeke ninnema; weekhuneeleke ni walye saana”, masi khannonvaha itthu impheelaawe mwiirutthuni wawe, niireke iyo inankavihera? 17 Inanna imocaaru, waamini woohooniheriya ni miteko unkhala waamini wookhwa.
18 Masi, ntthu pooti uhalaka wiira: “Weeva uhaana waamini ni mi kihaana miteko. Ukoonihere waamini wa woohimiteko, ni mi kinaawoonihera waamini waka ni miteko caka.” 19 Unaakupali wiira Nluku ri mmoca paasi? Unaapanka saana. Kontha hataa ciicammo maciini anaakupali wiira Nluku haavo ni anaamoova. 20 We ntthu oohankhili, khuncuwela wiira waamini woohimiteko ukhanle waamini woohifayita? 21 Apaapeehu Aparahaamu khaahimiye ukhala nasariya nlattu wo miteko caya unvaherera waya mwanaya Isaaki wakhilompini? 22 Moone wiira waamini wawe, oonihenre nkhayi ni miteko cawe ni waamini wawe uhokhala woohipahuwa nlattu wo miteko cawe, 23 ni iheerannya itthu imphwanyannya nhina Cowantikhiya Cowaarya ineera: “ Aparahaamu aahomwaamini Yehova, ni iyo itthwiiyo yahomwiiriha wooniya ukhala nasariya,” ni mpaka uyo heehaniya mpatthannyaawe Yehova.
24 Moone wiira ntthu nohala uhimiya ukhala nasariya nlattu wo miteko cawe, ni kahi paahi nlattu wo waamini wawe. 25 Inanna imocaaru, khooniye Raapi, namararuwa, ukhala nasariya nlattu wo miteko cawe, uwaakhela wawe saana atthu yaarumiye ni uwiirela wawe avire iphiro ikhwaawe? 26 Khweeliini, irutthu ihirina ukumi iri yookhwa, ciicammo waamini woohimiteko ukhanle waamini wookhwa.