Yonayeeli ya Peturu
3 Mayamunna oofentiya, ila ikhanle iwarakha yonayeeli kinwantikhelaakani, toko kiwantikhenlyaakani iwarakha yoopacera, kookurumicakani ni kiwuupuserakani wiira nvarele nteko saana moopuwelweenyu, 2 wiira nyuuva muupuwele citthu caahimilyaaya* maporofeeta khalayi, ni malamulo a Pwiiyeehu ni Moopoliihu, ahimilyaaya maapoostolweenyu. 3 Ihinaaya itthu, ncuwele wiira mahuku ookhicera anaahala ukhumelela anamatarawa, nuutarawawayanwo yapankaka citthu cinaacivela paasi; 4 ayo anaahala wiira: “Ri vayi yeeriya wiira naahala uwooyo? Kontha ikhumelo yo khalayi asinhiya-taateehu akhwilyaaya mpaka nna, khiivo invirikana, cinaalikana khampa ukati ilapo yumpiyaaya naanaano.”
5 Ayo khampheela wuupuwela ila ikhweeliila: ikhumelo yo khalayi yaahaavo irimu ni Nluku ahovarela nteko nuulumo nawe wiira amwalanihe itthaya ni maaci iriyari yo maaci. 6 Nlattu wo nnya citthunnya, ituniya yo ule ukatyuule yaahotankanyiya ukati waacanryaaya maaci. 7 Inanna imocaaru, irimu ni itthaya cihosunkeriya mooro nihuku ninhalaaya uhukhumwiya ni utankanyiya atthu ootakhala nrima.
8 Vano mayamunna, nhiliyale ila itthwiila: Yehova* noona ukhala nihuku nimoca caviraka myaakha 1.000, ni myaakha 1.000 nihuku nimoca. 9 Yehova* khampica-pica wiiraneeha ile inkhuluvelihaawe, toko atthu akhwaawe anoopuwelaaya,* masi uyo nawuuvilelani, kontha khampheela wiira atankanyiye ntthu, masi nopheela wiira atthu otheene attharuwe. 10 Masi nihuku na Yehova* ninhala uwa khampa latarawu, nno nihukunno irimu inaahala urimela ni inaahala unyakula itthu,* citthu cinaahala uviha cinene ni cinaahala utothwaa, ni citthu cotheene co watuniyani cinaahala wooniheriya.
11 Vano ukhala wiira nnyo citthunnyo cinaahala utotosiya, muupuwele makhaleloni nyuuva nnolamuliyeenyu ukhalana. Nhaana nkhalaka atthu omeettelo omaana, ni uvara miteko cinoonihera unswalela Nluku paasi, 12 nwehereraka ni nhiliyalaka* nihuku na Yehova,* nno nihukunno irimu inaahala upahiya ni mooro ni citthu cinaahala utothwaa, kontha unaahala uviha cinene. 13 Masi, ihaavo irimu yonaanaano ni ituniya yonaanaano inweherereehu toko uyo cinikhuluvelihalyaawe, ni nwo inaahala ukhala isariya.
14 Phimaana mayamunna, ukhala wiira nnaaweherera nnya citthunnya, mpanke yotheene inkhitiriinyu wiira Nluku oophwanyeni woohimahirihiri ni hataa woohipahuwa, masi nnari ni nnema. 15 Uhiya commo, nwehere uvilela wa Apwiiya ukhala woopoliya winyu, toko munneehu Paulu wantikhenlyaaweni, avarelaka nteko ucuwelaca uvahiyaawe, 16 oolumaka nhina nnyo citthunnyo, toko cipankilyaawe niiwarakha cikhwaawe. Vano, citthu cikhwaawennyo coorika wiiweeha, ni nnyo citthunnyo ahaavo atthu ahinaamini* ahirina ulipa mmoopuweleloni waya, toko cimpankaaya Cowantikhiya cikhwaawe, yiiwaanelaka utankanyiya.
17 Phimaana mayamunna, ukhala wiira nhocuwela cihinaaya wiirannya nnya citthunnya, nkhikicere moopuwelelweenyu wiira nhihapusiye naatthu ootakhala nrima, wiira waamini winyu uhivukuwe.* 18 Uhiya commo, nhihiyerere wuunuwa nhina unamaana woonironya ni ucuwelaca wa Apwiiya ni Moopoliihu Yesu Kristu. Uyo attitthimihiye ukhuma nenna co ni mpaka. Amem.