Yantikheliyaaya Akalasiya
2 Vano, uvira waya myaakha 14, mi ni Pernape nahokhuma nkhayi ni Titu naturuwelaka u Yerusalemu. 2 Kaaturuwenle u Yerusalemu, nlattu wonthoonyero kooniheriyaaka ni Yesu Kristu, uphiya waka nwo, kahaahimyeera mayamunna yaahoolela maloko o Yerusalemu ihapari comaana cinaalalyeeraaka amalaponi. Kaapankile iyo itthwiiyo, wiira koone wakhala wiira nteko wanvarenlyaaka Nluku waari womaana awula mena. Wakhala wiira khawaari womaana koone wiira waari womahala. 3 Uhookhalaru commo, Titu ari nkhayi ni miiva khaakhanyererihiye wuulihiya hataa ukhalaka wiira ari nkereeku. 4 Masi yirannyeele iyo itthwiiyo, nlattu wo mayamunna owootha yeetakaneelihile wanlokoni mmwiitihoni, wiira yoone utaphuwa hiiva urineehu nlattu wookhala atthari Kristu Yesu, ni wiira anikhalihe ipottha caya; 5 masi khanaahiyerenre ayo unithepya hataa vakaani, wiira ikhweeli cohapari comaana cihihiyerere ukhala ninyuuva.
6 Vano, mayamunna yooniya ukhala ofayita, ale yaahoolela mmalokoni, khiivo yaakitthucihilyaaya yonaanaano. Vano, mi akinwacera makhalelo yaarinaaya khalayi, ukhala wiira Nluku khanhukhumu aweheraka makhalelo anoonnya, masi noweha nrima wa ntthu. 7 Masi ayo woonenela waya wiira kahovahaceriya nteko wo waalalyeera ihapari comaana atthu oohuulihiya, khampa Peturu caavahaceriyaawe waalalyeera ale owuulihiya, 8 ukhala wiira Nluku nvahile ikuru Peturu wiira akhale apostolu aatthu owuulihiya, ciicammo hokivaha ikuru wiira miiva kikhale apostolu aamalaponi. 9 Tiyaku, Sefas ni Joau yaari ahooleli,* yooneehilyaaya wiira nihothoonyeriya unamaana woonironya wa Nluku, ayo yahoneesera ntata naya nonlopwana mi ni Pernape. Yaapankile commo, wiira athoonyere ukhala ananteko akhunanihu; ni yahoniirela wiira hiivano nahaana nirwaaka waalalyeera amalaponi, masi ayo yaahala waalalyeera atthu owuulihiya. 10 Ayo yaanilepenle paasi wiira nihaaliyale atthu oohuva, ni iyo phiitthu miiva ciicammo kineekurumicaaka upanka.
11 Vano, ukati Sefas aaphiilyaawe u Antiyokiya mi kahonvaha ikano, ukhala wiira ihaavo yaapankaawe yoohiloka. 12 Kontha ukati waaryaaya ahinawa alopwana yaarumiye ni Tiyaku, uyo aanaalyaana amalaponi; masi ukati waawilyaaya ayo alopwanaayo, uyo ahohiya waalyaana ni aanaasempa, ukhala wiira anwoova atthu owuulihiya. 13 Ayuuta akhwaawe ciicammo yaheetakaneeliha nwo wiipankaca nwo, ni hataa ciicammo Pernape aheehiyerera athepiyaka. 14 Vano, koonilyaaka wiira ayo khayeettela ikhweeli cohapari comaana, mi khahomwiirela Sefas uhoolo waatthu otheene co: “Weeva uhookhalaru nyuuta, unkhala khampa mmalaponi, vano unwa cani waakhanyererihaka amalaponi weettela ileema caayuuta?”
15 Hiiva niyaryaanne ilema caayuuta va ni nihinvara matampi anvaraaya amalaponi, 16 ninawaamini wiira ntthu nooniya ukhala nasariya kahi nlattu woweettela nlamulo, masi nlattu woomwaamini Yesu Kristu. Phimaana, hiivano ninaamwaamini Kristu Yesu, wiira nooniye ukhala anasariya nlattu wo iyo itthwiiyo kahi nlattu woweettela nlamulo, kontha khaavo nohala wooniya ukhala nasariya nlattu woweettela nlamulo. 17 Masi, ukhala wiira hiivano ninawooniya ukhala anamatampi ukati uneekurumiceehu wiira nooniye ukhala anasariya nlattu wa Kristu, niireke wiira Kristu naanikurumica uvara matampi? Mena vakaani! 18 Wakhala wiira kinlipihaca citthu miiva ciwulusilyaaka, paasi kikhanle ntthu namatampi. 19 Kontha nlattu wo Nlamulo kihokhwa. Masi nlattu wo Nlamulo nenno, kihonwelelihiya wiira kinswalele Nluku. 20 Nna co kihookhomeliya wanipottoni wamoca ni Kristu. Vano, ri nuukumi akinakhala miiva, masi Kristu phiri nuukumi wamoca ni miiva. Khweeliini, nnaco kiryaaka nkumi niirutthu yeepinaatamu kinkhala kimwaaminiki mwaana a Nluku, ule kifentile ni khwile wiira akoopole. 21 Mi akinakhottakeetthu* unamaana woonironya nivahilyaawe Nluku, kontha wakhala wiira isariya inwaa nlattu wo Nlamulo, khweeliini Kristu khwile mahala.