Yonayeeli ya Akorintu
10 Miiva Paulu, katakihaka unamaana ni wiiyeviha wa Kristu, kimpheela wiira mayamunna otheene nkiiwelele. Kontha ahaavo mayamunna akhwaawe ari iriyarinyu, aneera wiira kakhalaka ni nyuuva kinawiiyeviha, vano nhina iwarakha cinwantikhelaakani akineeyeviha. 2 Kinweherera wiira kawaaka nwo, ale anoopuwela wiira hiiva nineettela moopuwelelo ontuniyani, kaaphwanye anarukunusile mirima caya, wiira kihiwe waapwapwela venci. 3 Kontha hataa ukhalaka wiira ninkhala ila ituniyeela, hi khaninaana ikhotto khampa cinaanaaya atthu o ila ituniyeela. 4 Ikaruma cinvareleehu nteko khacinlikana niikaruma cinvarelaaya nteko apinaatamu, kontha cikhanle ikaruma co ikuru ya Nluku ni cinaakhitiri utankula citthu coolipa venci. 5 Hiiva ninaamalamaliha moopuwelelo otheene ni citthu cotheene cinaarikarikihela atthu uncuwela Nluku. Khampa ntthu notthukeliyaawe nkhattya, hi ninaakhitiri utthukela ayo moopuwelelwaayo, wiira akhitiri umwiiwelela Kristu, 6 ni hiiva niri owiitthenkaceene wiira ninttaruse ntthu hintthuna wiiwelela, masi wiiwelela winyunwo walikanaka.
7 Nyuuva unaawaakuvyeelani uwehera itthu pusya hataa nhicuweleehaka. Wakhala wiira haavo ntthu neera wiira khanle ntthari a Kristu, haana oopuwela ila itthwiila: khampa uyova ciryaawe ntthari a Kristu hiiva ciicammo nikhanle atthari a Kristu. 8 Mi akinoona ihaaya keettottopaka vale, ukhala wiira Apwiiya ahonivaha ukhulupale woolipiha waamini winyu, uhiya wuulolovihani. 9 Masi akinapheelaka wiira muupuwele wiira kinawiira uwoopopihani niiwarakha caka. 10 Kontha ayo aneera: “Iwarakha cinniveleeliheraawe cinkhala cokuru ni cowoopopiha, masi awaaka imwaneennyaawe, khanoopipiha ni moolumwaawe ankhala oohicuwannyaaca.” 11 Masi ayo atthwaayo acuwele wiira itthu hiiva ninoolumeehu nhina iwarakha cinooveleelihereehuni, phiitthu inhaleehu upanka hiiva nawaaka nwo. 12 Hiiva khanimpheela wiitakaneeliha ikhurupu yaatthu owiithenca, ni khanimpheela ulikana hataa vakaani naayo. Ayo anaawehera meettelwaaya yattharaka itthu anoonaaya ukhala yomaana. Nlattu wo iyo itthwiiyo ayo anawoonihera wiira khweeliini khaarina ankhili.
13 Masi hiiva khanineettottopa ninteko nihivahaceriyeehu uvara, masi nineettottopa ninteko ninkhitiriihu uvara nivahaceriyeehu ni Nluku, ni uyo ntekooyo unawuuhelani nhina nyuuva. 14 Ukhala wiira ncoko nivahaceriyeehu unawuuhelani nhina nyuuva, hiiva khaninaavyaavya micoko cikhwaawe nihivahaceriyeehu, ukhalaka toko wiira nnyo micoko civahaceriyeehunnyo khacinoohelani nhina nyuuva, kontha thi hiiva nipacenre wuulalyeerani ihapari comaana cimmuuluma Kristu. 15 Mena, hi khanineettottopa nimiteko nihivahaceriyeehu uvara, iyo maanaaya wiira, nimiteko cinvaraaya atthu akhwaawe. Masi ninweherera wiira, ukati waamini winyu unhalaaya uvira watepaka winciva, nteko hiiva unvareehu utepe urwa uhoolo, nhina ncoko hiiva uvahaceriyeehu uvara. Ni nteko unvareehu wuncerera, 16 wiira nikhitiri ulalyeera ihapari comaana micoko cikhwaawe, wiira nihiittottope nlattu wo nteko uvanryaaya atthu akhwaawe ncoko waavahaceriyaaya. 17 “Masi ule neettottopa, eettottope nlattu wa Yehova.” 18 Kontha ntthu unomphwanela uvara ula ntekoola, kahi phuule neethanla imwanennyaawe, masi ule nothanliya ni Yehova.