Ya Arooma
1 Miiva Paulu ipottha ya Kristu kiihaniye wiira kikhale apostolu ni kithanliye wiira kilalyeere ihapari comaana ca Nluku, 2 uyo aakhuluvelihilyaawe aavarelaka nteko maporofeeta nhina Cowantikhiya Cowaarya, 3 cimmuuluma mwanawe nokhuma nloko na Davidi, 4 masi niikuru ni nnepa wowaarya uyo heehaniya mwaana a Nluku ni nlattu wowunwelelihiya (iyee, uyo khanle Yesu Kristu Apwiiyeehu, 5 naakhenleehu unamaana woonironya uthanliya ukhala maapoostolu nlattu wawawe wiira atthu otheene yiiwelele ni akhalane waamini nlattu wo ncina nawe, 6 iriyari yaatthu nyuuva ciicammo nthanliyeenyu wiira muntthare Yesu Kristu). 7 Otheene ari u Rooma anfentiya ni Nluku, athanliye wiira areerihiye:
Nkhalane unamaana woonironya ni nnema na Nluku Apaapeehu, ni na Apwiiyeehu Yesu Kristu.
8 Yoopacera, kinansukhuru Nluku mwancina na Yesu Kristu nlattu waawinyu, kontha unawuulumiya waamini winyu ituniya yotheene. 9 Kontha Nluku kinonvarelaaka nteko wowaarya ninrimaaka wotheene, kilalyeeraka ihapari comaana cimmuuluma mwanawe, khanle saahityaaka wiira akinhiyerera wuuromolani ukati unlompaaka. 10 Kilepelaka wiira wakhitiryaa vale, kiwe wuuthotolani woohipica, Nluku atthunaka. 11 Kontha kinaapheela venci uwoonananani, wiira kawuulipiheni nhina mminepani; 12 awula, wiira nilipihane nlattu wowaamini winyu ni wowaamini waka.
13 Masi mayamunna, kimpheela ncuwele wiira, ikwaha cinci kampheela wuuthotolani wiira kiwiitthucihe atthu onwo wiira akhale atthari, toko kipankilyaaka ilapo cikhwaawe; masi kinaakhottiheriya mpaka nna. 14 Miiva kihaana nrintti muulupale wowaalalyeera atthu otheene: akereeku ni ale ahikhanle akereeku ni ale arina miruku ni ale ahirina. 15 Vano, kinaapheela ciicammo waalalyeera ihapari comaana atthu ari u Rooma. 16 Kontha akinoona ihaaya nlattu wo ihapari comaana. Khweeliini, cikhanle ikuru ca Nluku wiira awoopole atthu otheene arina waamini, waapacera ayuuta ni ciicammo akereeku. 17 Kontha isariya ya Nluku, anthoonyiheriya ale arina waamini ni anlipihaca waamini waya, toko cinhimyaaya Cowantikhiya ciiraka: “Masi anasariya anaahala ukhalana ukumi nlattu wowaamini waya.”
18 Kontha Nluku owiirimu naawoonihera uviruwa wawe atthu ahimmwiiwelela, ni ahineettela isariya. Ayo anaapanka citthu cootakhala wiira yaakhottihere atthu ucuwela ikhweeli. 19 Kontha atthu otheene ahaana uncuwela Nluku, ukhala wiira uyo howoonihera citthu cinci. 20 Kontha makhalelwaawe ahinoonnya, hataa ciicammo ikuru cawe coohimala ni ukhulupalyaawe, cinoonnya noonaka citthu cumpilyaawe ntuniyani, kontha nawiithoonyihera ni citthu cumpilyaawe, phimaana ayo khaanasariya yoohincuwela Nluku. 21 Kontha unookhalaru wiira anancuwela Nluku, khanttitthimihile, ni hataa khansukhunru. Masi ayo khayuupuwenle itthu, ni nrimaaya woohinamaana khawaatthunile wiiwa. 22 Hataa yiihimyaka ukhala oocuwelaca, ayo akhanle alolo. 23 Ni uhiya unttitthimiha Nluku hinkhwa, ayo anttitthimiha ilatarato cinlikana ni pinaatamu nokhwa, asinuni, inama cometto micese ni cowiipurula.
24 Phimaana, nlattu wo citthu coohinamaana co wanrimani waya, Nluku ahaahiya yapankaka citthu coohiirya wiira ananarihe irutthwaaya. 25 Ayo ahaakakhaniha ikhweeli ca Nluku ni citthu cowoothiya, ciicammo ahoswalela ni ahovarela nteko wowaarya citthu cowumpiya, uhiya unswalela ule umpile ni unttottopela mahuku otheene. Amem. 26 Phimaana, Nluku aahiilyaawe apankaka citthu cowuulihaca muru, athiyana khampheela uruparupa ninlopwana, masi ampheela uruparupa naathiyana akhwaaya, iyo inaavirikaniha makhalelo ikhumelo Nluku wumpilyaawe apinaatamu. 27 Ciicammo, alopwana ahohiya waaruparupana athiyana, avirikanihaka makhalelo ikhumelo Nluku wumpilyaawe apinaatamu, masi ampheela uruparupa ni nlopwana nkhwaaya, apankaka citthu cowoonihaca ihaaya. Vano, anaahala uhukhumwiya nlattu wo citthu coohinamaana cimpankaaya.
28 Ukhala wiira ayo khaaphenle uncuwela Nluku, uyo haahiya yapankaka citthu coohinamaana ni wiira apanke citthu cahaalamuliyaaya upanka. 29 Ayo atthwaayo yampanka citthu cotheene coohisariya, yaari oohikiriri, anakhwilu ni ciicammo oopanka citthu coohinamaana, owaacara nttima, atthu owiiva, owaaciva waattakana, owootha ni atthu oopanka citthu cootakhala, yaari atthu oohankawaani, 30 oowuuluma pusya akhunanaya, yaanonthanya Nluku, ooveeha, owiithenca, owiicoona, owuupuwela upanka citthu coohinamaana, oohiwiiwelela asithumwanaya, 31 oohikhalana ucuwelaca, oohikhuluvelya, oohaawacera akhunanaya ni oohoonelana uthunku. 32 Uhookhalaru wiira ayo anaacuwela sana-saana wiira Nluku khacinoncivela nnyo citthunnyo, ni wiira ampanka nnyo citthunnyo unawaaphwanela wiiviya, masi uhiya paahi ayova upanka, ayo ciicammo unawaacivela uwoona atthu akhwaawe apankaka.