Iwarakha yoopacera yantikheliyaaya akorintu
2 Phimaana, ukati waaryaaka ni nyuuva mayamunna, akuuhimenryeni isiiri ya Nluku kooniheraka ucuwelaca ni ciicammo nimoolumo oorikarika wiiweeha. 2 Kontha kiholakela uhithoonyera ucuwelaca iriyariinyu, uhikhanle wuuluma myaha ca Yesu Kristu, ule eeviye wanipottoni. 3 Ni ukati waaryaaka wamoca ni nyuuva, mi kaari ntthu oohilipalipa, kanttettemela venci ni kaanoova; 4 ni moolumo yoolumaaka ukati waalalyeeraka, kahi yoovarani nrima nlattu woocuwelaca waka, masi yoovarani nrima nlattu wokuru cirinaaya nnepa wowaarya, 5 wiira waamini winyu uhilipihereriye nuucuwelaca waapinaatamu, masi niikuru ca Nluku.
6 Vano, ucuwelaca unoolumeehuula vaa, khunakhala ucuwelaca wo ula ulumwenku woohinamaanoola ni hataa khunakhala ucuwelaca waahooleli wo ula ulumwenku woohinamaanoola, anhala umalamalihiya woohipica. 7 Vaa ninooluma ucuwelaca wa Nluku waahimiye nhina isiiryaawe, ucuwelaca waavithiye, waahimilyaawe Nluku khalayi uhinaaya wancera ulumwenku wo citthu coohinamaana, wiira nittitthimihiye. 8 Uno phikhanle ucuwelaca akhulupale o ula ulumwenku wo citthu coohinamaanoola uhicuwenlyaaya, kontha yaacuwenle, khayaahala uwiiva Apwiiya oottitthima. 9 Masi toko cantikhiyaaya: “Niitho khanoonile ni nnyaru khaniiwile ni hataa khaceesiye wanrimani waya citthu Nluku caatthenkacenryaawe ale anonfenta.” 10 Kontha Nluku nicuwelihile hiiva avarelaka nteko nnepa wowaarya, ukhala wiira nnepa wowaarya unaatotha* citthu cotheene, hataa citthu coorikarika ca Nluku.
11 Iriyari yaatthu niireke haavo nokhitiri ucuwela moopuwelelo antthu nkhwaawe? Mena, khaavo nokhitiri ucuwela uhikhale nrimaawe paasi. Inanna imocaaru, khaavo nokhitiri ucuwela moopuwelelo a Nluku uhikhale nnepaawe paasi. 12 Ni hi khanivahiye moopuwelelo o ila ituniyeela, masi nivahiye moopuwelelo a Nluku, wiira nicuwele citthu nivahiyeehu ni Nluku nlattu wo unamaana urinaawe. 13 Wootaphulela citthu coominepani ni moolumo oominepani, hiiva ciicammo ninawuulumaka nnyo citthunyo kahi nimeetthucihero apinaatamu, masi nimeetthucihero o nnepa wowaarya.
14 Ntthu cinoncivela citthu co ila ituniyeela, uyo khacinoncivela citthu ca Nluku; kontha noona ukhala citthu coohifayita ni khancuwela, ukhala wiira nnyo citthunyo ntthu nototha akaviheriyaka ninnepa wowaarya wa Nluku. 15 Masi nlopwana neettiheriya ninnepa wowaarya wa Nluku, naatotha nnyo citthunyo, uhookhalaru commo khaavo nonhukhumu uyova. 16 Commo “tipani nocuwela moopuwelelo a Yehova wiira amwiitthucihe?” Kontha hiiva nirina moopuwelelo a Kristu.