Miteko co Mapostolu
1 Tiyofilu, wiipaceroni, kihowantikhela citthu cotheene Yesu cipacenryaawe upanka ni wiitthuciha, 2 mpaka nihuku naawelihiyaawe wiirimu, namalihileene waavaha malakihero maapostolu aathanlilyaawe, avarelaka nteko nnepa wowaarya. 3 Umala waya uhuva wawe, ahaathoonyera ni citthu cinci cowoonnya aapankilyaawe, wiira uyo nanlelo aari nkumi. Ayo yahomoona mahuku 40 ni ahooluma Umwene wa Nluku. 4 Ukati Yesu waathukumannyaawe nkhayi naattharyaawe, uyo ahowiirela: “Nhikhume u Yerusalemu, masi nhihiyerere uweherera itthu Apaapa yuukhuluvelihilyaayani, toko coohimenryaakani. 5 Khweeliini, Joau hoopattisani ni maaci, masi anhaleela mahuku vakaani wiira mpattisiye ninnepa wowaarya.”
6 Vano, waathukumannyaaya, ayo yahonkoha: “Pwiiya, nenna co phinhaleenyu uhokolosera umwene u Isarayeli?” 7 Yesu ahowaakhula eeraka: “Khanvahaceriye ucuwela, ukati awula mahuku Apaapa athanlilyaaya.* 8 Masi, ukati unhaleenyu waakhela nnepa wowaarya, nnaahala ukhalana ikuru ni nnaahala ukhala masaahityaaka u Yerusalemu, ncoko wo Yuteya wotheene, u Samariya ni mapuro otheene oottayi owatuniyani.” 9 Umaliha wawe wuuluma nnya citthunnya, attharyaawe yanwehaka, Yesu ahowelihiya wiirimu ni nihutte nahonkhuneela, ni khayaakhitiri-tho umoona. 10 Yaweheehaka wiirimu ukati Yesu waawelihiyaawe, woohipica, yahaakhumelela alopwana eeli yaawanre ikuwo cootteela.* 11 Ni ayo alopwanaayo, yaheera: “Alopwana o Kalileya, mweemelenleni va nwehaka wiirimu? Yesu kusiye iriyariinyu awelihiyaka wiirimu, nohala uwa inanna imocaaru khampa cimoonileenyu arwaaka wiirimu.”
12 Vano, ayo yaahoturuwela u Yerusalemu, akhumaka umwaakoni wo Oliveera uri wakhiviru ni u Yerusalemu yaakhala ikiloometuru imoca paahi. 13 Ukati waaphiyalyaaya inupa yaamakilyaaya, yahorwaa isaala yooculu. Nwo ahaavo Peturu, ciicammo Joau, Tiyaku ni Antere, Filipe ni Tomee, Partolomeu ni Matewus, Tiyaku mwaana Alifeu, Simau, Namwiikurumica, ni Yuuta mwaana a Tiyaku. 14 Otheene caya, khayaahiyerera ulompa nkhayi naathiyana akhwaawe, unhela ciicammo Maria anumwaane Yesu ni asihimaawe.
15 Yaayo mahukwaayo, ukati waathukumannyaaya atthu oophiyaka 120, Peturu aheemela iriyaryaaya ni aheera: 16 “Mayamunna, Davidi akaviheriyaka ni nnepa wowaarya ahooluma inatiri, yaamwaaca Yuuta ni iyo inatiriiyo yaahaana yeerannyaaka. Yuutooyo phiyoole aahoolenle atthu yaarwaa untthuka Yesu. 17 Uyo, aari nkhayi ni hiiva ni aahothanliya wiira avare ula ntekoola nkhayi ni hiiva. 18 (Uyo nlopwanooyo ahothuma imatta ninsurukhu waaliviyaawe nlattu wonteko wootakhala waavanryaawe. Uyo ahomora ni umora wawe aheepwesaniha murwaawe vathi ni nthuukwa nawe nahophwya ni marupwaawe yahokhumela vate. 19 Atthu yaakhala u Yerusalemu ucuwela waya itthu yeerannyeele, niiluukaaya yaheehana iyo imatteeyo Aseltama, iyo maanaaya wiira, imatta yophome.) 20 Kontha uhantikhiya nlivuru yo Isaalimu: ‘Inupaawe ithamiye ni hikhale-tho ntthu nohala ukhala, ni ciicammo nteko waavaraawe, avare ntthu nkhwaawe.’ 21 Phimaana, nihaana umwaavya nlopwana mmoca aari nkhayi ni hi, ukati wotheene Apwiiya Yesu waavaraaya miteko caya, iriyariihu. 22 (Ukhuma nihuku naapattisiyaaya ni Joau, mpaka nihuku naawelihiyaaya wiirimu niwoonaka) akhale saahiti owunwelelihiya waya.”
23 Vano, yahaathanla alopwana eeli, Yusufu eehaniya Parisapa aacuweliya ukhala nasariya ni Matiyasi. 24 Vano, yaholompa yeeraka: “Oo Yehova, thi weeva uncuwela mirima caatthu otheene. Unoonihere ala alopwana eelyaala ntthu unthanlilyaa 25 wiira aakhele ula nteko woolalyeeroola ni akhale apostolu; miteko Yuuta cihiilyaawe wiira atthare iphirwaawe.” 26 Vano, wahopankiya mwaavi wiira ulakeliye ale alopwana eelyaaletipani aahala uthanliya, ni mwaavyuuyo wahommorela Matiyasi ni uyo ahaalikeleliya ikhurupu yo maapostolu 11.