Yonayeeli ya Peturu

2 Yaahaavo ciicammo maporofeeta owootha iriyari ya apoovu, toko cinhalaaya ukhumelela amwiitthucihi owootha iriyariinyu. Anaahala ukumihera ittiini cowootha ni anaahala unkhotta ule wooponle, yiiwaanelaka asineennyaaya utankanyiya woohipica. 2 Uhiya commo, atthu enci anaahala uttharihelela meettelwaaya oohinamaana,* ni nlattu wo ayo atthwaayo, atthu enci anaahala wuuluma pusya iphiro yeekhweeli. 3 Ciicammo nlattu woohitosiya waya, ayo anaahala umananiha wuuthepyani ni moolumwaaya owootha. Vano uhukhumwiya waya, uhimiye nenne nokhalayi unaahala uwa woohipica, ni utankanyiya waya khunhala upica.

4 Khweeliini, Nluku ahottarusa malayikha yankosenre, ni uyo ahovonyera nipuro nineehaniya Tartaru,* nipuro* nooripela cinene ni awehereraka nihuku noohala uhukhumu. 5 Nluku ciicammo khaalevelenle atthu okhalayi ukati wa Nowee, masi aamooponle Nowee aalalyeeraka isariya, nkhayi ni atthu 7, ukati waawaanilyaawe ucara wo maaci ntuniyani aatankanyaka atthu otheene ootakhala nrima. 6 Ciicammo Nluku ahotankanya isittatti yo Sotoma ni yo Komora, yaahanle ittuura paahi, iyo inanneeyo ahowoonihera atthu ootakhala nrima itthu inhala waakhumelela wahoolo. 7 Masi uyo ahomoopola nlopwana mmoca nasariya eehaniya Lo, aakhala oosanka nlattu wo meettelo oohiloka* aatthu yaakhala ile ilapweele. 8 (Kontha, ukati waakhalanaawe ayo atthwaayo uyo nlopwana nasariyooyo, awoonaka ni awiiwaka yapankaka citthu cinvirikaniha nlamulo waananriipa nrima cinene.) 9 Phimaana, Yehova naakhitiri uwoopola ale anonswalela ni anaanana masakha, masi waahiya ale oohinamaana wiira yatankanyiye* nihuku noohukhumwiya, 10 venci-venci ale anwuulihihaca muru akhunanaya ni ahinaahisima ahooleli.*

Atthu oohihisima ni oohitthuna uhimeriya, khaanoova wuuluma pusya malayikha, 11 masi uhookhalaru wiira malayikha ahaana ikuru, khanwootherya ni khaanaaveeha ayo atthwaayo, nlattu wonhisima Yehova.* 12 Ayo atthwaayo, ari khampa inama contakhwani cihinoopuwela ni cinnyariya wiira civarihiye ni citankanyiye, anawuuluma pusya citthu cihincuwelaaya. Ayo atthwaayo anaahala utankanyiya nlattu wo meettelwaaya oohinamaana, 13 ayo atthwaayo anaahala ulivyaaniheriya nlattu wo citthu cootakhala cipankilyaaya.

Unawaacivela wooniya yapuhaka, uthana iriyari. Ayo atthwaayo ankhala khampa mahirihiri, ni unawaacivela* wiitthuciha citthu cowoothiya ukati unlyaaya nkhayi ni nyuuva. 14 Ni ayo atthwaayo unawaacivela cinene weetta uluva ni khankhitiri uhiya uvara matampi, ni anaawiiriha ukosa* ale ahirina waamini woolipa. Wanrimani waya khantosiya. Ayo akhanle atthu oolaphakaciya. 15 Ahohiya iphiro yomaana ni ahohapuwa. Ahotthara iphiro ya Palahawu mwaana a Peyoori, aafentile itthuvo yoohisariya, 16 masi aholakiya nlattu woopanka itthu yootakhala. Vano, Puuru ahooluma ni ncu neepinaatamu, ankhottiheraka uyo porofeetooyo upanka itthu yoohinamaana.

17 Ayo atthwaayo anlikana ni iluusi yoohikhalana maaci ni itthapwe immalamalihiya ni iphyoo yuulupale, ni ahosunkeriya ipiphi yuulupale. 18 Ayo atthwaayo anawuuluma citthu cinkhala toko cofayita, masi cihirina ifayita. Cinawaacivela citthu comwiirutthuni ni meettelo oohinamaana,* ni anaawiiriha atthu akhwaawe upanka citthu coohiloka caahiyalyaaya. 19 Uhookhalaru wiira anawaakhuluveliha utaphuwa ayo atthwaayo, akhanle ipottha o citthu cootakhala; kontha otheene ule notthemiya ni nkhunanawe nokhala ipottha yo uyo ntthuuyo.* 20 Khweeliini, ayo atthwaayo anahiileene upanka citthu coohinamaana co ila ituniyeela nlattu woncuwela Pwiiya ni Moopoli Yesu Kristu, nanlelo anaaturuwela upanka nnyo citthunnyo ni anaatthemiya ni nnyo citthunnyo, ni anaatepa uvara nnyo citthunnyo uvikana wiipaceroni. 21 Phataari ayo atthwaayo ahicuwenle iphiro yosariya, uhiya ucuwela ikhweeli nuuhapuwa malamulo owaarya yaakhenlyaaya. 22 Ayo atthwaayo ihowiirannyeela ineeriyakeele: “Mwalapwa hoturuwela ulya maraphyaawe, ni ikuluwe urapihiya waya ihoturuwela urwaa wa maroveni.”