Miteko co Mapostolu
18 Vano, ahokhuma u Ateena ni ahorwaa u Korintu. 2 Uphiya wawe nwo, ahomphwanya nyuuta mmoca eehaniya Aakila aari o Pontu, uyo aawile phiyaaru akhumaka u Italia nkhayi ni amwaarawe yeehaniya Prisiila, kontha Klautiyu ahoruma wiira ayuuta otheene akhume u Rooma. Vano, Paulu ahorwaa waathotola, 3 ni ukhala wiira ayo yaavara nteko mmocaaru, ahokhala nkhayi uwannyaya aavaranaka nteko, ukhala wiira ayo ciicammo yaanaapanka aheema. 4 Isaapatu cotheene, Paulu antaphulela mwaha nsinakooka ni anwiiriha ayuuta ni akereeku waamini.
5 Ukati Sila ni Timotiyu waaphiilyaaya u Masetoniya, Paulu aaneekurumica ulalyeera nuulumo na Nluku, aavahaka usaahiti ayuuta otheene wiira Yesu aari Kristu. 6 Masi, ukhala wiira ayo khayaamwiiwelela ni yaanonruwanakaca, uyo ahotatha ntthupi nkuwoni wawe ni aheera: “Iphomeenyu yuumwaryeeleni mmuruni winyu. Mi kihoohimeryani, ukhuma ilelo, mi kinrwaa waalalyeera atthu oohikhala ayuuta. 7 Vano, ahokhuma ni ahorwaa uwannyawe nlopwana mmoca eehaniya Tisiyu Justu, answalela Nluku, inupaawe uyo nlopwanooyo yaari wakhiviru nuusinakooka. 8 Vano, Krispu nhooleli oosinakooka, nkhayi naamucyaawe otheene yahowaamini Apwiiya. Ni atthu enci o Korintu wiiwa waya ihapari yahaamini ni yahopattisiya. 9 Uhiya commo, Apwiiya yahomwiirela Paulu uhiyu arupaka: “Uhoove, uhihiyerere ulalyeera, 10 kontha mi kiri ni weeva, ni khaavo ntthu nohala wuupanka pusya. Kontha atthu otheene o ila isittattiila akhanle aawaka.” 11 Vano, uyo ahokhala nwo mwaakha mmoca ni myeeri 6, awiitthucihaka nuulumo na Nluku.
12 Ukati Kaaliyu aaryaawe nhooleli o distritu yo Akaya, ayuuta yahonvara Paulu ni yahonrwaana utiripunaali, 13 yiiraka: “Ula nlopwanoola nawaakhanyereriha atthu unswalela Nluku nimananna anvirikaniha nlamulo.” 14 Vano, ukati Paulu waapheelaawe upacera wuulumaca, Kaaliyu ahowiirela ayuuta co: “Unari wiira ula nlopwanoola aapankile itthu yoohinamaana ni ikhirini yowoopiha, mi kanhala wuuviriyanani sana-saana. 15 Masi, wakhala wiira nnonyakulihana nlattu wo moolumo, nlattu wo macina ni nlattu wo nlamulo ninyu, iyo thi nyu nnocuwela. Mi akimpheela ukhala suwiisi nlattu wo nnyo citthunnyo.” 16 Vano, ahowoomolaca utiripunaalinwo. 17 Vano, yahonvara Sosetene, nhooleli oosinakooka, ni yahopacera umwaattakaca utiripunaali. Masi, Kaaliyu khaapheela wiikelakeliha nnyo citthunnyo.
18 Ukhala wawe mahuku menci nwo, Paulu ahaaleeha mayamunna, Prisiila ni Aakila, yahonveleela Paulu u Siiriya. Uphiya wawe u Senkiriya, ahomettha mputu kontha aahompanka natiri. 19 Vano, ayo yahophiya u Efesu, ni uyo ahaahiya nwo, ahorwaa uwiitthuciha ayuuta nsinakooka. 20 Waahookhalaru wiira aahoolepeliya wiira akhale ukati mwinci, uyo khaatthunne, 21 masi ahaaleeha ni ahowiirela: “Kinaahala uturuwela-tho uno, Yehova atthunaka.” Vano, ahowela ikalawa u Efesu 22 ni ahorwaa u Sesareya. Ahorwaa* ni ahaasalaamiha mayamunna, ni ahopwahera u Antiyokiya.
23 Vano, ukhala wawe nwo mahuku vakaani, ahokhuma ni ahorwaa ni ahovira ncoko wotheene wo Kalaasiya ni wo Firiisiya, aalipihaka atthari.
24 Vano, ahaavo nyuuta mmoca eehaniya Apolu, aayariye u Alexantriya, ni ahorwaa u Efesu. Ni aari nlopwana aawiiriha atthu uhiya moopuwelelwaaya oohiloka ni ancuwela sana-saana cowantikhiya cowaarya. 25 Uyo nlopwanooyo, aheetthucihiya sana-saana iphiro ca Yehova, ni anlipa nhina mminepani, aanooluma ni aaneetthuciha sana-saana amuulumaka Yesu, masi aacuwela paahi mpattiso wa Joau. 26 Uyo, ahopacera wuuluma nsinakooka alipaka nrima. Prisiila ni Aakila umwiiwa waya, yahomwiihana ni anari veekha caya, yahomwiitthuciha sana-saana iphiro ca Nluku. 27 Uhiya commo, ukhala wiira Apolu aapheela urwaa u Akaya, mayamunna yahantikha iwarakha, yaalepelaka mayamunna wiira amwaakhelele saana. Uphiya wawe nwo, ahaakavihera atthu enci yaamwaaminni Nluku nlattu woonamaana woonironnya wa Nluku. 28 Kontha, waatthuni ni alipakoono nrima, uyo anthoonyera wiira ayuuta yaanootha, aathoonyiheraka nhina cowantikhiya cowaarya wiira Yesu aari Kristu.