Ya Arooma
6 Vano ninhala uhimyani-tho? Niireke khaninhala uhiya uvara matampi wiira unamaana wa Nluku utepe wuncereryaa? 2 Mena! Ukhala wiira ninkhwa nlattu wo matampi, kontha isiyani unhaleehu utepa uvara matampi? 3 Awula khannocuwela wiira hiiva nipattisiye nlattu wa Kristu Yesu, nipattisiye muukhwani wawe? 4 Phimaana, hiiva nihosikhiya wamoca nuuyo, ukhala wiira nipattisiye wiira nikhale wamoca nuuyo muukhwani. Wiira khampa Kristu onwelelihiyaawe muukhwani niikuru ca Athumwaane, hiiva ciicammo niphwanye ukumi wonaanaano. 5 Ukhala wiira hiiva ninaakhwa toko uyo khwilyaawe, khweeliini hiiva ciicammo ninaahala wunwelelihiya toko uyo unwelelihiyaawe. 6 Kontha ninaacuwela wiira makhalelweehu okhalayi ahokhomeliya wanipottoni wamoca nuuyo, wiira irutthwiihu ihikhalane-tho ikuru yo matampi, ni wiira nihiye ukhala ipottha yo matampi. 7 Kontha, ule khwile holeveleliya itampi cawe.
8 Uhiya commo, nakhwaaka ni Kristu, ciicammo nikupali wiira ninaahala ukhala nkhayi ni uyo. 9 Kontha ninaacuwela wiira nna co Kristu onwelelihiyaawe, khanhala-tho ukhwa. Ni ukhwa khunonkhitiri-tho. 10 Kontha uyo khwile ikwaha imoca paahi wiira amalihe matampi, ni uyo khanhala ukhwa-tho. Masi ukumi urinaawe nna co rina wiira apanke itthu impheelaawe Nluku. 11 Ciicammo, mwiicoone ukhala atthu ookhwa ahinvara itampi, masi akumi wiira mpanke itthu impheelaawe Nluku, nlattu wa Kristu Yesu.
12 Phimaana, nhihiyerere itampi yeettihaka ukumiinyu. Nhiiwelele citthu cimpheelaaya irutthu cinyu cinhala ukhwa. 13 Nhivaherere irutthu cinyu mmatampini khampa ikaruma co miteko coohisariya, masi mwiivaherere wa Nluku toko atthu yoopweele muukhwani wiira aphwanye ukumi woohimala. Nhihiyerere ciicammo, uvaherera irutthu cinyu wa Nluku toko ikaruma co miteko cosariya. 14 Kontha matampi khanlamuliya wuutthemani, ukhala wiira khanneettela nlamulo, masi munkhala nhina unamaana woonironya wa Nluku.
15 Vano ninhala upankani? Niireke khaninhala uhiya uvara matampi nlattu wooheettela nlamulo, nlattu ninkhala nhina unamaana woonironya wa Nluku? Mena! 16 Khannocuwela wiira, mwiivahereraka wiira nkhale ipottha ya ntthu wiira mmwiiwelele, nnokhala ipottha yo ule nnomwiiweleleenyu? Hataa nkhalaka ipottha yo matampi aniiva ni hataa nkhalaka ipottha yowiiwelela uniiriha ukhala anasariya? 17 Masi munsukhuru Nluku, kontha uhookhalaru wiira nyuuva mwaari ipottha co matampi, nhiiwelela ninrimeenyu wotheene citthu ciitthucihiyeenyu ca Nluku. 18 Vano, ukhala wiira nhoopoliya mmatampini, nhokhala ipottha cosariya. 19 Kinoohimeeryani ni moolumo aapinaatamu nlattu woololovaca irutthwiinyu; khampa nvaherenreenyu irutthwiinyu wiira mpanke citthu cootakhala cinkhottihiya ni nlamulo, nvirikanihaka nlamulo, nvaherere irutthu cinyu wiira cikhale ipottha cosariya, mpankaka citthu cowaarya. 20 Kontha ukati waariinyu ipottha yo matampi, khamwaakhanyererihiya upanka citthu comaana.
21 Ule ukatyuule mwaapanka citthu coohinamaana, vano mwaaphwanyani? Citthu cinoophwanyihani ihaaya nna co. Wuumaleloni nnyo citthunnyo ukhanle ukhwa. 22 Vano, nna co ntaphuliyeenyu mmatampini nhokhala ipottha ca Nluku; nna co nnopanka citthu cowaarya, cinhala wuuphwanyihani ukumi woohimala. 23 Kontha matampi anliveliya nuukhwa, masi itthuvo ya Nluku ukhanle ukumi woohimala uwaale ni Kristu Yesu Pwiiyeehu.