Miteko co Mapostolu
15 Alopwana yaakhuma u Yuteya, yaahopacera uwiitthuciha mayamunna yeeraka: “Mwaahuulihiyeke toko cinhimyaaya nlamulo na Moceesi, nyuuva khannohala woopwa. 2 Masi, Paulu ni Pernape waanyakulihanana waya ayo alopwanaayo, waaholakeliya wiira Paulu ni Pernape ni atthu akhwaawe arwee u Yerusalemu, wiira wawaceriye uyo mwahooyo ni maapostolu ni mahumu.
3 Uveleeliya waya ni mayamunna mpaka ncoko iriyari, ayo alopwanaayo yaahovira u Feniisiya ni u Samariya yaattonkaceraka mananna amalaponi waatthunnyaaya ukhala makristau ni mayamunnaayo yaahotteeliya. 4 Waaphilyaaya u Yerusalemu, yahaakheliya sana-saana wanlokoni ni maapostolu nkhayi ni mahumu, ni yahaattonkela citthu Nluku capankilyaawe aavarela nteko ayova. 5 Masi, ale yaatthara ittiini yo mafariseu khalayi ni yaakhanle atthari, yahonwa nipuro yonkomilyaaya ni yaheera: “Ahaana yuulihiyaka ni uwiirela wiira ahaana yattharaka nlamulo na Moceesi.”
6 Vano, maapostolu ni mahumu yaahothukumana wiira yoopele mwaha iyo itthwiiyo. 7 Uviriha waya ukati mwinci yavaanyihanaka, Peturu ahunwa ni aheera: “Alopwana, mayamunna, wiipaceroni nnaacuwela wiira Nluku hokithanla iriyariinyu wiira kaalalyeere amalaponi ihapari comaana ni yaamini. 8 Ni Nluku nocuwela mirima cihu, hothoonyera wiira nawaatthuna aavahaka nnepa wowaarya toko caanivahilyaawe hiiva. 9 Ni uyo khanaawayanihile hiiva naayo, masi horeeriha mirima caya nlattu wowaamini waya. 10 Vano, nlattuni nyuuva nnonttehatteheenyu Nluku, mwaavahaka mirintti atthari, anhiya-taateehu ni hataa hiiva nihikhitinriihu uteesa? 11 Uhiya commo, ninawaamini wiira nihoopoliya nuunamaana woonironya wa Yesu, khampa ayo coopoliyaaya.”
12 Vano, ikhurupu yotheene yaahomaala, ni yahopacera unviriyana Paulu ni Pernape yahimyacaka mathoonyero ni miiriirya Nluku caapankilyaawe aavarelaka nteko ayova iriyari yaamalaponi. 13 Umaliha waya wuulumaca, Tiyaku aahopacera wuulumaca eeraka: “Alopwana, mayamunna nkiviriyane. 14 Simeawu hohimyaca sana-saana mananna Nluku caawacenryaawe amalaponi ikwaha yoopacera, wiira aatthanle apoovu anhala ucisa ncina nawe. 15 Ala moolumwaala anaavaranaca ni moolumo maporofeeta yaahimilyaaya, yeeraka: 16 ‘Camalaka nnya citthunnya kinaaturuwa ni kinaahala uteka-tho inupa ya Davidi imonre, kinaahala ulokihaca mapuro atankuwilyaaya ni kinaahala uturusela khampa caaryaaya. 17 Wiira atthu anhala uhala answalele Yehova, nkhayi naamalaponi anhala wiihaneliya ncina naka, neera Yehova, ule nopanka nnya citthunya, 18 cicuweliye ikhumelo yokhalayi. 19 Phimaana, itthu ilakenlyaaka, ukhanle uhaarikarikiha ale ammwaamini Nluku, 20 masi uwantikhela wiira anyeme citthu coohiirihiya nanluku oohikhweeli, urupihana woohiloka, ukhuura inama cowiiviya makhuce ni ulya iphome. 21 Ikhumelo yo khalayi ahaavo anlalyeera moolumo a Moceesi khula isittatti, kontha ayo anaasomiya mmasinakoka khula isaapatu.”
22 Vano, maapostolu ni mahumu ni nloko notheene, yaholakela waaveleeliha alopwana oothanliya iriyaryaaya u Antiyokiya, yaveleeliyaka ni Paulu ni Pernape, yahonveleeliha Yuuta eehaniya Parisapa, ni Sila, alopwana yaahoolela mayamunna. 23 Yahantikha ila iwarakheela ni yahaavelelihera, yiiraka:
“Maapostolu ni mahumu, mayamunneenyu, anawaaveleelihera isalamu mayamunna ahikhanle ayuuta, ari u Antiyokiya, u Siiriya ni u Siliisiya. 24 Niheewa wiiriyaka wiira yahokhuma alopwana iriyariihu, ni yahowa wuuwaanelani masakha niitthu yoolumilyaaya, ni yahomananiha wuurikarikihelani, hataa ukhalaka wiira hi khanaavahile malakihero. 25 Phimaana, niholakela wuuveleeliherani alopwana nkhayi ni mayamunneehu Pernape ni Paulu, 26 yiivaherenre mwancina na Apwiiyeehu Yesu Kristu. 27 Phimaana, nihooveleeliherani Yuuta ni Sila, wiira yuuhimeryeni sana-saana nnyo citthunnyo. 28 Kontha, nnepa wowaarya hataa ni hiiva, nihoona wiira ikhanle itthu yomaana uhuuvahani mirintti cuulupale cihikhanle nnya: 29 wiira nhihiyerere unyema itthuvo coovahiya anluku oohikhweeli, iphome, inama cowiiviya makhuce, ni urupihana woohiloka. Nyuuva mwanyemaka nnya citthunnya, nnaahala ukhala saana. Isalamu!”
30 Vano, umwarusiya waya, ayo alopwanaayo yahorwaa u Antiyokiya, yahothukumaniha ikhurupu yotheene ni yahaavaha iyo iwarakheeyo. 31 Ayo, usoma waya iyo iwarakheeyo, yahotteeliya nlattu woolipihiya. 32 Ukhala wiira Yuuta ni Sila, ciicammo yaari maporofeeta, ayo yahaataphulela mayamunna myaha ni yaahaalipiha. 33 Uviriha waya ukati vakaani anari nwo, mayamunna yahaaveleeliha ninnema, wiira aturuwele waakhumaaya. 34 —— 35 Masi, Paulu ni Pernape, yahohala u Antiyokiya yiitthucihaka ni yalalyeeraka nkhayi ni mayamunna makhwaawe, ihapari comaana ca Yehova.
36 Uvira waya mahuku vakaani, Paulu ahomwiirela Pernape: “Vano, nttwee naathotole mayamunna o khula isittatti nivinreehu nilalyeeraka nuulumo na Yehova, wiira nawoone mananna ciryaaya.” 37 Pernape aalakenle unkusa Joau, eehaniya Markus. 38 Masi, Paulu khaatthuna unkusa Joau, ukhala wiira uyo aahaahiya u Panfiiliya, ni khaatthunne waakavihera miteko caavaraaya. 39 Phimaana, Paulu ni Pernape yahonyakulihana venci, mpaka yahomwaryaana. Vano, Pernape ahonkusa Markus ni ahowela ikalawa arwaaka u Siipere. 40 Mayamunna umoonihera waya unamaana woonironnya wa Yehova, Paulu ahonthanla Sila ni ahorwaa. 41 Uyo ahovira u Siiriya ni u Siliisiya, alipihaka maloko.